ଦିଗପହଣ୍ଡି,୭।୮(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ଟାଉନ୍ ରୋଡ ଜନତାଲେନ୍ – ଆଠଗଡ଼ିଆ ସାହି ଛକରେ କୋଭିଡ଼ -୧୯ ନିୟମ ଉଲ୍ଲଂଘନ କରି କବାଡି ଖେଳୁଥିବା ୧୬ ଜଣଙ୍କ ନାଁ ରେ ମାମଲା ରୁଜୁ କରି ତଦନ୍ତ ଚଳାଇଛି ପୋଲିସ। ଦିଗପହଣ୍ଡି ତହସିଲଦାର ତଥା ଏକ୍ଜିକ୍ୟୁଟିଭ ମାଜିଷ୍ଟ୍ରେଟ ଅଦୈତ କୁମାର ସ୍ବାଇଁଙ୍କ ଏତଲା କ୍ରମେ ଥାନା ମାମଲା ନଂ.୧୬୬/୨୦ ସେମାନଙ୍କ ନାଁ ରେ ମାମଲା ରୁଜୁ କରାଯାଇଥିବା ଆଇ ଆଇ ସି ବସନ୍ତ କୁମାର ସେଠୀ କହିଛନ୍ତି।
ଗତ ଗହ୍ମାପୂର୍ଣ୍ଣମା ଅବସରରେ ସୋମବାର ରାତି ପ୍ରାୟ ୧୦ ଟାରେ ବିଭିନ୍ନ ସାହିର ଯୁବକମାନେ ସଂଘବଦ୍ଧ ହୋଇ ଆଠଗଡ଼ିଆ ସାହି ଛକରେ କବାଡି ଖେଳି ଥିଲେ। କବାଡି ଖେଳର ଫଟୋ ଓ ଭିଡିଓ ଉତ୍ତୋଳନ କରି କେହି ବ୍ୟକ୍ତି ଜିଲାପାଳଙ୍କୁ ପଠାଇଥିଲେ। ଏ ନେଇ ତଦନ୍ତ କରିବାକୁ ସେ ସ୍ଥାନୀୟ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଦିଗପହଣ୍ଡି ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ପ୍ରଫୁଲ୍ଲ ଚନ୍ଦ୍ର ଡାକୁଆଙ୍କ ସହ ତହସିଲଦାର। ଘଟଣାସ୍ଥଳକୁ ଯାଇ ଅନୁସନ୍ଧାନ କରିବାପରେ ସେଥିରେ ସତ୍ୟତା ଥିବା ଜଣାପଡିଥିଲା। ବ୍ରହ୍ମପୁର ଉପଜିଲାପାଳଙ୍କ ନିର୍ଦ୍ଦେଶକ୍ରମେ ଥାନାରେ ଏତଲା ଦିଆଯାଇଥିବା ତହସିଲଦାର କହିଛନ୍ତି।