ବେଲୁର,୧ା୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର କର୍ନାଟକରେ ନିର୍ବାଚନ ପ୍ରଚାର ବେଳେ କଂଗ୍ରେସରେ ଚାଲିଥିବା ଗୋଷ୍ଠୀକନ୍ଦଳକୁ ନେଇ ଉପହାସ କରିଛନ୍ତି। ବେଲୁରରେ ଏକ ସଭାକୁ ସମ୍ବୋଧିତ କରି ମୋଦି କହିଛନ୍ତି, ରାଜସ୍ଥାନ ହେଉ କି ଛତିଶଗଡ଼, ଯେଉଁଠି କଂଗ୍ରେସ ସରକାର ଗଢ଼ିଛି ସେଇଠି କ୍ଷମତାକୁ ନେଇ ଦଳ ଭିତରେ ଅନ୍ତର୍କଳହ ଦେଖିବାକୁ ମିଳିଛି।
ଅବସରରେ ପ୍ରଧାନମନ୍ତ୍ରୀ ରାଜ୍ୟର ପ୍ରମୁଖ ପ୍ଲେୟାର ଏଚ୍.ଡି. ଦେବେଗୌଡ଼ାଙ୍କ ଧର୍ମନିରପେକ୍ଷ ଜନତା ଦଳ (ଜେଡିଏସ୍)କୁ ମଧ୍ୟ ଟାର୍ଗେଟ କରିଛନ୍ତି। ସେ କହିଛନ୍ତି, କଂଗ୍ରେସ ଏବଂ ଜେଡିଏସ୍ ଉଭୟ ଅସ୍ଥିରତାର ପ୍ରତୀକ। ଯେଉଁ ରାଜ୍ୟେରେ କଂଗ୍ରେସ କ୍ଷମତାକୁ ଅସିଛି ଦଳୀୟ ନେତା ନିଜ ନିଜ ମଧ୍ୟରେ ଲଢ଼େଇ କରୁଛନ୍ତି। ରାଜସ୍ଥାନ ଓ ଛତିଶଗଡ଼ରେ ନିର୍ବାଚନ ବେଳେ ଦେଇଥିବା ମିଛ ପ୍ରତିଶ୍ରୁତିକୁ ନେଇ ଏବେ ସେମାନଙ୍କ ମଧ୍ୟରେ କଳହ ସୃଷ୍ଟି ହୋଇଛି। କଂଗ୍ରେସ ନେତାମାନେ ନିଜ ନିଜ ମଧ୍ୟରେ ଲଢ଼େଇ କରୁଥିବାବେଳେ ଏହାର ବି’ ଟିମ୍ ଜେଡିଏସ୍ କ୍ଷମତା ପାଇଁ ସ୍ବପ୍ନ ଦେଖୁଛି। ଏହି ଦଳ ଯେନତେନ ପ୍ରକାରେ ୧୫ରୁ ୨୦ ଆସନ ଦଖଲ କରି ଲୁଟ୍ରେ ସାମିଲ ହେବାକୁ ଉଦ୍ୟମ ଚଳାଇଛି।
ମୋ ଭାଇଙ୍କଠୁ ଶିଖ
କର୍ନାଟକ ବିଧାନସଭା ନିର୍ବାଚନକୁ ଆଉ ମାତ୍ର ୧୦ ଦିନ ବାକି ଥିବାବେଳେ ଉଭୟ ଶାସକ ଭାଜପା ଏବଂ ବିରୋଧୀ କଂଗ୍ରେସ ପରସ୍ପରକୁ ଟାର୍ଗେଟ କରିବାରେ ଲାଗିଛନ୍ତି। କଂଗ୍ରେସ ନେତାମାନେ ଅଦ୍ୟାବଧି ତାଙ୍କୁ ୯୧ ଥର ଗାଳି କରିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କହିଥିଲେ। ଏହାର ଜବାବରେ ରବିବାର କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ବଗଲକୋଟର ଏକ ସଭାରେ କହିଛନ୍ତି, ସାଧାରଣ ଜୀବନରେ ଏଭଳି ଟାର୍ଗେଟକୁ ନିଜ ସପକ୍ଷକୁ ନେବା ଉଚିତ। ମୋ ଭାଇ ରାହୁଲ ଗାନ୍ଧୀଙ୍କଠାରୁ ଶିକ୍ଷାଲାଭ କରନ୍ତୁ। ସେ ଦେଶର ସ୍ବାର୍ଥ ପାଇଁ ଗୁଳିମାଡ଼ ଖାଇବାକୁ ମଧ୍ୟ ପ୍ରସ୍ତୁତ। ଭାଜପା ନେତାମାନେ ଆମ ପରିବାର ବିରୋଧରେ ବ୍ୟବହାର କରିଥିବା ଅପମାନଜନକ ଭାଷାର ତାଲିକା ପ୍ରସ୍ତୁତ କଲେ ଅନେକ ବହି ପ୍ରକାଶ କରାଯାଇପାରିବ। କିନ୍ତୁ ପ୍ରଧାନମନ୍ତ୍ରୀ ମୋଦି ଆପଣମାନଙ୍କ ସାମ୍ନାକୁ ଆସି ଦୁର୍ବ୍ୟବହାରର ଶିକାର ହୋଇଥିବା କହି କାନ୍ଦୁଛନ୍ତି। ମୋଦିଙ୍କ ଅଫିସ (ପିଏମ୍ଓ)ର କେହି ଜଣେ ତାଙ୍କ ପାଇଁ ଅପଶବ୍ଦର ତାଲିକା ପ୍ରସ୍ତୁତ କରିଥିବେ। ସମ୍ପୃକ୍ତ ଅଧିକାରୀ ଜଣକ ଲୋକଙ୍କ ସମସ୍ୟାକୁ ନେଇ ତାଲିକା କରିଥିଲେ ଭଲ ହୋଇଥାଆନ୍ତା ବୋଲି ପ୍ରିୟଙ୍କା ତାଚ୍ଛଲ୍ୟ କରିଛନ୍ତି।