ନୂଆଦିଲ୍ଲୀ, ୨।୭ : କହ୍ନେୟା ଲାଲଙ୍କ ହତ୍ୟା ମାମଲାରେ ମୁଖ୍ୟ ଅଭିଯୁକ୍ତ ମହମ୍ମଦ ରିୟାଜ ଅତାରିଙ୍କ ରାଜନୈତିକ ଭାଜପା ଲିଙ୍କ୍ ନେଇ ଭାଜପା-କଂଗ୍ରେସ ମଧ୍ୟରେ କାଦୁଅ ଫିଙ୍ଗା ଆରମ୍ଭ ହୋଇଛି। କଂଗ୍ରେସର ଜାତୀୟ ମୁଖପାତ୍ର ପୱନ ଖେଡା ଶନିବାର ଅପରାହ୍ନରେ ଦିଲ୍ଲୀରେ ଏକ ଗଣମାଧ୍ୟମ ସମ୍ମିଳନୀରେ କହିଛନ୍ତି ଯେ କହ୍ନେୟାଙ୍କ ଏହି ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ରିୟାଜ ଅତାରତଙ୍କ ସହ ଦୁଇ ଭାଜପା ନେତା ଇରଶାଦ ଚେନୱାଲା ଏବଂ ମହମ୍ମଦ ତାହିରଙ୍କ ଥିବା ଫଟୋରୁ ସାବ୍ୟସ୍ତ ହୋଇଛି ଯେ ହତ୍ୟାକାରୀଙ୍କ ସହିତ ଭାଜପାର ଘନିଷ୍ଠ ସମ୍ପର୍କ ରହିଛି।
ଏହା ମଧ୍ୟ ସାମ୍ନାକୁ ଆସିଛି ଯେ ରାଜସ୍ଥାନ ଭାଜପାର ଜଣେ ବରିଷ୍ଠ ନେତା ତଥା ରାଜ୍ୟର ପୂର୍ବତନ ଗୃହମନ୍ତ୍ରୀ ଗୁଲାବଚନ୍ଦ କାଟରିଆଙ୍କ କାର୍ଯ୍ୟକ୍ରମରେ ରିୟାଜି ବାରମ୍ବାର ଅଂଶଗ୍ରହଣ କରୁଥିଲେ। ଭାଜପାର ରାଜସ୍ଥାନ ସଂଖ୍ୟାଲଘୁ ୟୁନିଟର ବୈଠକରେ ଯୋଗ ଦେଇଥିବା ରିୟାଜଙ୍କ ଫଟୋ ବର୍ତ୍ତମାନ ବିଶ୍ୱ ସାମ୍ନାରେ ଅଛି। ଏହା ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି।
ଖେଡା କହିଛନ୍ତି, ଫେସବୁକରେ ଭାଜପା ନେତା ଇରଶାଦ ଚେନୱାଲା ଏବଂ ମହମ୍ମଦ ତାହିରଙ୍କ ଦ୍ୱାରା ୩୦ ନଭେମ୍ବର ୨୦୧୮, ୩ ଫେବୃଆରୀ ୨୦୧୯, ୨୭ ଅକ୍ଟୋବର ୨୦୧୯, ୨୮ନଭେମ୍ବର ୨୦୧୯ ଏବଂ ୧୦ ଅଗଷ୍ଟ ୨୦୨୧ ରେ ପୋଷ୍ଟ କରାଯାଇଥିବା ଫଟୋରୁ ଏହା ସ୍ପଷ୍ଟ ହୋଇଛି ଯେ ଉଦୟପୁରରେ ଦୋକାନୀ କହ୍ନେୟାଙ୍କ ହତ୍ୟା କରିଥିବା ଅଭିଯୁକ୍ତ ରିୟାଜ କେବଳ ଭାଜପା ନେତାଙ୍କ ନିକଟତର ନୁହଁନ୍ତି, ସେ ଭାଜପାର ଜଣେ ସକ୍ରିୟ ସଦସ୍ୟ ମଧ୍ୟ।
ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଏହି ମାମଲାକୁ ଏନଆଇଏକୁ ହସ୍ତାନ୍ତର କରିବା ନିଷ୍ପତ୍ତିକୁ ସ୍ବାଗତ ମଧ୍ୟ କରିଛନ୍ତି। କିନ୍ତୁ ନୂଆ ତଥ୍ୟ ଆସିବା ପରେ ପ୍ରଶ୍ନ ଉଠିଛି ଯେ କେନ୍ଦ୍ର ସରକାର ଏହି ଘଟଣା ଶୀଘ୍ର ଏନଆଇଏକୁ ହସ୍ତାନ୍ତର କରିବା ନିଷ୍ପତ୍ତି ଭାଜପା ଲିଙ୍କ୍ ଯୋଗୁ ନେଇଛନ୍ତି କି? ବୋଲି ଖେଡା ପ୍ରଶ୍ନ କରିଛନ୍ତି। ଏହି କାରଣ ତ୍ୱରିତ ଭାବରେ କେନ୍ଦ୍ର ସରକାର ଏନଆଇଏକୁ ହସ୍ତାନ୍ତର କରିଛି କି ବୋଲି ଖେଡା ସନ୍ଦେହ ପ୍ରକାଶ କରିଛନ୍ତି।
ଅପରପକ୍ଷରେ ଅଜମେର ଦକ୍ଷିଣର ଭାଜପା ବିଧାୟକ ଅନୀତା ଭଦେଲ ରିୟାଜଙ୍କ କଂଗ୍ରେସ ସହ ସମ୍ପର୍କ ଥିବା ଦାବି କରିଛନ୍ତି। ସେ କହିଛନ୍ତି ଯେ ଅଭିଯୁକ୍ତ ଅଜମେରରେ ଦଙ୍ଗା କରିବାକୁ ଚାହୁଁଥିଲେ। ଏଥିପାଇଁ ଅନେକ ହ୍ବାଟସ ଆପ ଗ୍ରୁପ ସୃଷ୍ଟି କରାଯାଇଥିଲା। ସେ ଦାବି କରିଛନ୍ତି ଯେ ଅଭିଯୁକ୍ତଙ୍କ ପରିବାର ସଦସ୍ୟ କଂଗ୍ରେସର ପଦାଧିକାରୀ ଏବଂ ସଦସ୍ୟ ଅଛନ୍ତି।