ରସୁଲପୁର,୧୬ା୫(ଡି.ଏନ.ଏ.): ରସୁଲପୁର ବ୍ଲକ ଅଞ୍ଚଳରେ ସୋମବାର ଅପରାହ୍ନରେ କାଳବୈଶାଖୀ ପ୍ରଭାବରେ ବର୍ଷାପବନ ସହ କୁଆପଥର ମାଡ଼ ହୋଇଛି। ବାତ୍ୟା ଅତିକ୍ରାନ୍ତ ହେବାର ଦିନକ ପରେ କାଳବୈଶାଖ ଯୋଗୁ ଏହି ବ୍ଲକର୍ ଲକ୍ଷ୍ମୀନଗର, ପହଁଗା ଆଦି ପଞ୍ଚାୟତରେ ବିଦ୍ୟୁତ୍ ଖୁଣ୍ଟ ଭୁଶୁଡ଼ି ପଡ଼ିବା ସହ କୁଆଖିଆ ସେକ୍ସସନ ଅଞ୍ଚଳର ଭୋଟକା, ରସୁଲପୁର, ବାହାଦଳାପୁର, ମୁଗୁପାଳ, ରାହାମ୍ବା, ପ୍ରଥମାଖଣ୍ଡି ଭଳି ୧୦ ପଞ୍ଚାୟତରେ ଅପରାହ୍ନ ୪ଟାରୁ ରାତି ୯ଟା ପର୍ଯ୍ୟନ୍ତ ବିଦ୍ୟୁତ୍ ସେବା ବ୍ୟାହତ ହୋଇଥିଲା। ବିଦ୍ୟୁତ୍ ସରବରାହ ଦାୟିତ୍ୱରେ ଥିବା ଟାଟା ପାଓ୍ବାର କମ୍ପାନୀ ପକ୍ଷରୁ ମରାମତି ଆଳରେ ଏକାଧିକ ଘଣ୍ଟା ବିଦ୍ୟୁତ୍ ସେବା ବନ୍ଦ କରାଯାଇଥିଲା। ବିନା ବିଜୁଳିରେ ଲୋକେ ଗରମ ଗୁଳଗୁଳିରେ ଅସ୍ତବ୍ୟସ୍ତ ହୋଇ ପଡିଥିଲେ। କୁଆଖିଆ ସେକ୍ସନ ଅଧୀନରେ ଝଡ଼ ପ୍ରଭାବ ସେତେ ଅଧିକ ନ ଥିବା ସତ୍ତ୍ୱେ ଘଣ୍ଟାଘଣ୍ଟା ଧରି ବିଜୁଳି କଟିବାକୁ ସାଧାରଣରେ ନିନ୍ଦା କରାଯାଇଛି।