ଭବାନୀପାଟଣା,୧୭।୯(ଉତ୍ତମ କୁମାର ଦାଶ)ରାଜ୍ୟ ବାହାରେ କଳାହାଣ୍ଡିର କଳାକାରମାନଙ୍କ କମାଲ ଦେଖିବାକୁ ମିଳିଛି। ମହାରାଷ୍ଟ୍ରର ନାଗପୁରଠାରେ ସଂସ୍କାର ଭାରତୀ ପକ୍ଷରୁ ‘କ୍ରାନ୍ତିଗାଥା’ ଶୀର୍ଷକରେ ଅଖିଳ ଭାରତୀୟ ବହୁଭାଷୀ ନାଟ୍ୟ ମହୋତ୍ସବରେ କଳାହାଣ୍ଡିର ନାଟକ ‘ରିନ୍ଦୋ-୧୮୫୫’ ମଞ୍ଚସ୍ଥ ହୋଇଯାଇଛି। ଓଡ଼ିଶାରୁ ମନୋନୀତ ଏକମାତ୍ର ନାଟକ ଭାବେ ଏହା ପ୍ରଦର୍ଶିତ ହୋଇଥିଲା। କାର୍ଯ୍ୟକ୍ରମକୁ ମହାରାଷ୍ଟ୍ର ସଂସ୍କୃତି ମନ୍ତ୍ରୀ ସୁଧୀରଜି ମୁନଙ୍ଗ ଟିୱାର, ସଂସ୍କାର ଭାରତୀ ଉପାଧ୍ୟକ୍ଷ ତଥା ସିନେ ତାରକା ନୀତିଶ ଭରଦ୍ୱାଜ, ସଙ୍ଗୀତ ନାଟକ ଏକାଡେମୀ ସଚିବ ସା ପୁରେଚା ପ୍ରମୁଖ ଉଦ୍ଘାଟନ କରିବା ସହ ନାଟକଟିକୁ ଉପଭୋଗ କରିଥିଲେ। କବିବର ସୁରେଶ ଭଟ୍ଟ ସଭାଗୃହରେ ଆୟୋଜିତ ଏହି ନାଟକ ଉତ୍କଳ ପଶ୍ଚିମ ପ୍ରାନ୍ତ ଓଡ଼ିଶା ପକ୍ଷରୁ ପ୍ରଯୋଜିତ ହୋଇଥିବାବେଳେ ପରମେଶ୍ୱର ମୁଣ୍ଡ ରଚନାରେ ଯୁବ ନିର୍ଦ୍ଦେଶକ ସୌରଭ ମହାପାତ୍ର ନିର୍ଦ୍ଦେଶନା ଦେଇଥିଲେ। ବିଭିନ୍ନ ଭୂମିକାରେ ମାନସ ପଣ୍ଡା, ରାମେଶ୍ୱର ତ୍ରିପାଠୀ, ତ୍ରିମୋହନ ସାହୁ, ଶୁଭମ ବେହେରା, ଅମରେନ୍ଦ୍ର ମହାନ୍ତି, ଡିଲେଶ୍ୱର ରଣା, ଧନଞ୍ଜୟ ସାହୁ, ଆଲୋକ କୁମାର ସାହୁ, ଅନୀଲ ବୈଠାରୁ, କେ. ଗୋପୀଧର ନାୟର, ସନମତ ପ୍ରଧାନ, ଅବିନାଶ ଅଗସ୍ତି, ମାନସିପ୍ରଭା ନାୟକ, ଶାଲିନୀ ପ୍ରଧାନ ଅଭିନୟ କରିଥିଲେ। କଳାହାଣ୍ଡି କଳାକାରମାନଙ୍କ ଚମତ୍କାର ଅଭିନୟ ସମସ୍ତଙ୍କୁ ମନ୍ତ୍ରମୁଗ୍ଧ କରିଥିଲା। କଳାହାଣ୍ଡିର କଳାକାର ପୁଣି ନିଜର ଚମକ ଦେଖାଇଥିଲେ। ସଙ୍ଗୀତ ପରିଚାଳନା କରିଥିଲେ ଚକ୍ରଧର ମହାରଣା, ପ୍ରେମଲାଲ ନାଏକ ଓ ଲିପ୍ସା ମହାରଣା। ରୂପ ଓ ମଞ୍ଚସଜ୍ଜା ଦାୟିତ୍ୱରେ ଥିଲେ ଗୁରୁ ପ୍ରଭାସଚନ୍ଦ୍ର ମିଶ୍ର। ଏଥିରେ ଭାରତବର୍ଷର ବିଭିନ୍ନ ରାଜ୍ୟରୁ ନାଟକଗୁଡିକ ମଞ୍ଚସ୍ଥ ହୋଇଥିଲା। କଳାହାଣ୍ଡି କଳାକାରଙ୍କ ମଞ୍ଚସ୍ଥ ନାକଟ ସମସ୍ତଙ୍କଠାରୁ ସ୍ବତନ୍ତ୍ର ହୋଇଥିଲା।