ଗାନ୍ଧୀନଗର,୬।୧: ଗୁଜରାଟର ଷ୍ଟାଚ୍ୟୁ ଅଫ୍ ୟୁନିଟି ନିକଟରେ ଥିବା ଜଙ୍ଗଲ ସଫାରିରେ ଏକ କଲରାପତରିଆ ବାଘ ପ୍ରବେଶ କରି ଗୋଟିଏ କୃଷ୍ଣସାର ମୃଗକୁ ମାରିବା ପରେ ଭୟରେ ଆଉ ୭ଟି ମୃଗଙ୍କ ମୃତ୍ୟୁ ଘଟିଛି। ଜାନୁଆରୀ ୧ ତାରିଖ ଭୋର ସମୟରେ ଏହି ଘଟଣା ଘଟିଥିବାବେଳେ ସ୍ଥାନୀୟ ବନବିଭାଗ ଏହାର ତଦନ୍ତ ଚଳାଇଛି। ବନ ଅଧିକାରୀଙ୍କ କହିବା ଅନୁଯାୟୀ, କଲରାପତରିଆଟି କୌଣସି ପ୍ରକାରେ ବାଡ଼ ଅତିକ୍ରମ କରି କେଭାଡିଆ ଫରେଷ୍ଟ ଡିଭିଜନ୍ ଅନ୍ତର୍ଗତ ପାର୍କରେ ପଶିଥିଲା। ଷ୍ଟାଚ୍ୟୁ ଅଫ୍ ୟୁନିଟିକୁ ଘେରିରହିଥିବା ଶୁଲପନେଶ୍ୱର ବନ୍ୟପ୍ରାଣୀ ଅଭୟାରଣ୍ୟ କଲରାପତରିଆ ପାଇଁ ବେଶ୍ ଜଣାଶୁଣା। ପାର୍କ ଭିତରେ କଲରାପତରିଆ ଆକ୍ରମଣ କରି ଗୋଟିଏ କୃଷ୍ଣସାର ମୃଗକୁ ମାରିଥିବା ବେଳେ ଅବଶିଷ୍ଟ ୭ ମୃଗ ଦୁଃଖ ତଥା ଭୟଭୀତ ହୋଇ ପ୍ରାଣ ହରାଇଥିବା ବିଶ୍ୱାସ କରାଯାଉଛି। ୮ଟି ମୃତଦେହକୁ ବ୍ୟବଚ୍ଛେଦ କରାଯିବା ପରେ ସମାଧି ଦିଆଯାଇଛି। ସଫାରି ପାର୍କରେ କଲରାପତରିଆ ପଶିବା ପ୍ରଥମ ଘଟଣା ବୋଲି ଉପ ବନ ସଂରକ୍ଷକ (ଡିସିଏଫ୍) ଅଗ୍ନିଶ୍ୱର ବ୍ୟାସ କହିଛନ୍ତି।
