ସୋନପୁର,୨୪।୧୦(ନି.ପ୍ର.): ସୁବର୍ଣ୍ଣପୁର ସହର ମଝିପଡାରେ ୫୪ତମ ସାର୍ବଜନୀନ କାଳୀପୂଜା ୨୪ ତାରିଖ ସୋମବାର ରାତିରୁ ଆରମ୍ଭ ହେବ। ରାମଧୂନ କ୍ଲବ ମଝିପଡା ପକ୍ଷରୁ ଏହି ପୂଜା ମହୋତ୍ସବ ମହା ସମାରୋହରେ ଆୟୋଜିତ ହେବ ବୋଲି ପୂଜା କମିଟି ପକ୍ଷରୁ ରବିବାର ଏକ ଖବରଦାତା ସମ୍ମିଳନୀରେ ସୂଚନା ଦିଆଯାଇଛି। କରୋନା ମହାମାରୀ ପାଇଁ ଗତ ଦୁଇବର୍ଷ ନିରାଡମ୍ବର ଭାବେ ପୂଜା ଆୟୋଜନ ହୋଇଥିଲା। ତେଣୁ ଚଳିତ ବର୍ଷ କାଳୀପୂଜା ମହୋତ୍ସବ ଆଡମ୍ବର ସହକାରେ ପାଳନ ହେଉଛି। ପୂଜାରେ ସାଜସଜ୍ଜା, ଆଲୋକ ସଜ୍ଜା, ରକ୍ତଦାନ ଶିବିର, ଦଣ୍ଡନୃତ୍ୟ, ସୁନ୍ଦରାକାଣ୍ଡ ପାରାୟଣ ଓ ଭଜନ, ନୃତ୍ୟ ପ୍ରତିଯୋଗିତା, ସମ୍ବଲପୁରୀ ଲୋକନୃତ୍ୟ ଏବଂ ମେଲୋଡି ଭଳି ସାଂସ୍କୃତିକ କାର୍ଯ୍ୟକ୍ରମ ପାଇଁ ପ୍ରାୟ ୧୧ ଲକ୍ଷ ଟଙ୍କାର ଅଟକଳ କରାଯାଇଛି। ପୂଜା ମଣ୍ଡପ ଓ ପଡାର ସମସ୍ତ ରାସ୍ତାକୁ ଆଲୋକମାଳାରେ ସଜ୍ଜିତ କରାଯାଇଛି। ୩୧ ତରିଖରେ ଶହୀଦ ପ୍ରତାପ କୁମାର ନାଏକଙ୍କ ସ୍ମୃତିରେ ଏକ ରକ୍ତଦାନ ଶିବିର ଅନୁଷ୍ଠିତ ହେବ।
୫୪ ବର୍ଷ ପୂର୍ବରୁ ପଡାର ହିନ୍ଦୁ ଓ ମୁସଲିମ୍ ସମ୍ପ୍ରଦାୟର ଲୋକ ମିଳିତ ହୋଇ କାଳୀପୂଜା ଆରମ୍ଭ କରିଥିଲେ। ମୁସଲିମ୍ ସମ୍ପ୍ରଦାୟର ଲୋକେ ଏହି ପୂଜା କମିଟିର କର୍ମମର୍ତ୍ତା ଓ ସଭ୍ୟ ରହି ଆସୁଛନ୍ତି। ଏହି ପଡାରେ ପ୍ରାୟ ୮୦ ମୁସଲିମ ପରିବାର ବସବାସ କରୁଛନ୍ତି। ପୂଜାରେ ସର୍ବଧର୍ମ ସମନ୍ବୟ ଓ ହିନ୍ଦୁ-ମୁସଲିମ୍ ଭାଇଚାରାର ବାର୍ତ୍ତା ଦେଖିବାକୁ ମିଳିଥାଏ। ଚଳିତ ବର୍ଷ ମା’ କାଳୀଙ୍କ ମୃଣ୍ମୟୀ ମୃର୍ତ୍ତି ବେଶ ଆକର୍ଷଣୀୟ ହୋଇଛି। ପୂଜା ଉପଲକ୍ଷେ ହାତୀଶାଳ କଲ୍ୟାଣ ମଣ୍ଡପରେ ରବିବାର ଠାରୁ ମୀନାବଜାର ଖୋଲିଛି। ଛୋଟ ପିଲା ମାନେ ମୀନାବଜାରର ବେଶ ମଜା ନେଉଛନ୍ତି। କମିଟି ଉପଦେଷ୍ଟା ତଥା ପ୍ରାକ୍ତନ ନଗରପାଳ କଇରୁ ସ୍ବାଇଁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଖବରଦାତା ସମ୍ମିଳନୀରେ ରାମଧୂନ କ୍ଲବର ସମ୍ପାଦକ ବିକାଶ ପଣ୍ଡା ସଂଯୋଜନା କରିଥିଲେ। କ୍ଲବ ସମ୍ପାଦକ ପୀୟୁଷ କୁମାର ପଣ୍ଡା, ପୂଜା କମିଟି ସଭାପତି ସୁରଜ ସାହୁ, ସମ୍ପାଦକ ପୂରନ ନାଏକ, କୋଷାଧ୍ୟକ୍ଷ ରାଜୀବ ସାହୁ, କମିଟିର ଉପଦେଷ୍ଟା ଲଡୁକିଶୋର ମଲ୍ଲିକ, ବରିଷ୍ଠ ସଭ୍ୟ ହରିନାରାୟଣ ସାହୁ, ଶେଷଦେବ ମେହେର, ମାଧବ ଦାସ, ଜଗତବନ୍ଧୁ ତ୍ରିପାଠୀ, ଭକ୍ତିରଞ୍ଜନ ଦଳେଇ, ଜାଭେଦ ଖାନ, ରାଜ ମହମ୍ମଦ, ଅରବାଜ ଖାନ ଓ ମନୋରଞ୍ଜନ ତ୍ରିପାଠୀ ସମ୍ମିଳନୀରେ ଉପସ୍ଥିତ ରହି ପୂଜା, ରକ୍ତଦାନ ଶିବିର, ସାଂସ୍କୃତିକ କାର୍ଯ୍ୟକ୍ରମ ଓ ନଭେମ୍ବର ୮ତାରିଖରେ ଭସାଣୀ ଶୋଭାଯାତ୍ରା ସମ୍ପର୍କରେ ସୂଚନା ଦେଇଥିଲେ।