ରାୟଗଡ଼ା,୩୧ା୫(ସ୍ବ.ପ୍ର.): ରାୟଗଡ଼ା ସହରସ୍ଥିତ ଏସ୍ପିଙ୍କ ବାସଭବନ ନିକଟରେ ଥିବା କାଳୀ ମନ୍ଦିରରୁ ହୋଇଥିବା ଚୋରିର ପର୍ଦ୍ଦାଫାଶ କରିଛି ପୋଲିସ। ଏନେଇ ବୁଧବାର ସନ୍ଧ୍ୟାରେ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି ରାୟଗଡ଼ା ଏସ୍ଡିପିଓ ଦେବଜ୍ୟୋତି ଦାସ। ପୋଲିସ ଘଟଣାର ଏତଲା ପାଇବା ପରେ ତଦନ୍ତ ଆରମ୍ଭ କରିଥିଲା। ତଦନ୍ତରୁ ୩ ଜଣ ଏହି ଚୋରି କାଣ୍ଡ ଭିଆଇଥିବା ଜାଣିପାରିଥିଲା ପୋଲିସ। ଟ୍ରାକ୍ କରି ପୋଲିସ ଉକ୍ତ ୩ଜଣଙ୍କୁ ଗିରଫ କରିଛି। ଗିରଫ ୩ ଜଣ ହେଲେ ରାୟଗଡ଼ା ବ୍ଲକ ଜେକେପୁରର ବିଟାକା ଶ୍ରୀନୁ, ରାଉରକେଲାର ଆନନ୍ଦ କୁମାର ମୁଦୁଲି ଏବଂ ଆନ୍ଧ୍ରପ୍ରଦେଶ ବିଜୟନଗରମର ପେଣ୍ଟା କ୍ରିଷ୍ଣା। ତେବେ ଲକ୍ଷାଧିକ ଟଙ୍କା ଚୋରି ହୋଇଥିବା ବେଳେ ସେମାନଙ୍କଠାରୁ ମାତ୍ର ୨ହଜାର ୭ଶହ ଟଙ୍କା, ଦୁଇଟି ଛୁରି ଏବଂ ଦୁଇଟି ଲୁହା ଛଡ଼ ପୋଲିସ ଜବତ କରିଛି। ତେବେ ଚୋରି ହୋଇଥିବା ଗହଣା ପୋଲିସକୁ ମିଳିନାହିଁ । ବଳକା ଟଙ୍କା ସେମାନେ ଖର୍ଚ୍ଚ କରିଦେଇଥିବା ପୋଲିସକୁ କହିଥିବା ନେଇ ଏସ୍ଡିପିଓ ଦାସ ସୂଚନା ଦେଇଛନ୍ତି। ଏହି ଖବରଦାତା ସମ୍ମିଳନୀରେ ଏସ୍ଡିପିଓ ଦାସଙ୍କ ସମେତ ରାୟଗଡ଼ା ଟାଉନ ଥାନା ଆଇଆଇସି କେକେବିକେ କହଁର, ଅତିରିକ୍ତ ଥାନା ଅଧିକାରୀ ଅମଳ ସର୍ଦ୍ଦାର, ଏସ୍ଆଇ ସନ୍ଧ୍ୟା ତିର୍କୀ ପ୍ରମୁଖ ଉପସ୍ଥିତ ଥିଲେ।