ନୂଆଦିଲ୍ଲୀ, ୨୩।୮: ଚଳିତ ବର୍ଷ ଲାଗି ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ହଲ୍ ଅଫ୍ ଫେମ୍ ତାଲିକା ଘୋଷିତ ହୋଇଯାଇଛି। ଦକ୍ଷିଣ ଆଫ୍ରିକାର ପୂର୍ବତନ ମହାନ୍ ଅଲ୍ରାଉଣ୍ଡର ଜ୍ୟାକ୍ କାଲିସ, ପାକିସ୍ତାନର ପୂର୍ବତନ କିମ୍ବଦନ୍ତୀ ବ୍ୟାଟ୍ସମ୍ୟାନ ଜାହିର ଆବାସ ଓ ଅଷ୍ଟ୍ରେଲିଆ ମହିଳା କ୍ରିକେଟ୍ ଦଳର ବିଶ୍ୱକପ୍ ବିଜୟୀ ଅଲ୍ରାଉଣ୍ଡର ଲିସା ସାଥଲେକରଙ୍କୁ ସମ୍ମାନଜନକ ଆଇସିସି ହଲ୍ ଅଫ୍ ଫେମ୍ରେ ସ୍ଥାନିତ କରାଯାଇଛି। କରୋନା ମହାମାରୀ ଲାଗି ଆଇସିସି ପକ୍ଷରୁ ରବିବାର ଭର୍ଚ୍ୟୁଆଲ ସମାରୋହ ଆୟୋଜନ କରାଯାଇଥିଲା। ଏଥିରେ ଦକ୍ଷିଣ ଆଫ୍ରିକାର ପୂର୍ବତନ କ୍ରିକେଟର୍ ସନ୍ ପୋଲକ୍, ସୁନୀଲ ଗାଭାସ୍କରେ ମେଲ୍ ଜୋନ୍ସ ପ୍ରମୁଖ ଅଂଶଗ୍ରହଣ କରିଥିଲେ।
ସମ୍ମାନ ପାଇବାରେ କାଲିସ ଦକ୍ଷିଣ ଆଫ୍ରିକାର ୪ର୍ଥ କ୍ରିକେଟର୍ ହୋଇଛନ୍ତି। ବିଶ୍ୱ କ୍ରିକେଟ୍ ଇତିହାସରେ କାଲିସ ଅନ୍ୟତମ ଶ୍ରେଷ୍ଠ ଅଲ୍ରାଉଣ୍ଡର ମାନ୍ୟତା ଲାଭ କରିଛନ୍ତି। କ୍ରିକେଟ୍ ଇତିହାସରେ ଏକମାତ୍ର ଖେଳାଳି ଭାବେ ସେ ଉଭୟ ଟେଷ୍ଟ ଓ ଦିନିକିଆ କ୍ରିକେଟ୍ରେ ୧୦ ହଜାରରୁ ଊର୍ଦ୍ଧ୍ୱ ରନ୍ ସଂଗ୍ରହ କରିବା ସହିତ ୨୫୦ ଉଇକେଟ୍ ଅକ୍ତିଆର କରିଛନ୍ତି। ଟେଷ୍ଟରେ ସେ ୨୩ଥର ମ୍ୟାନ୍ ଅଫ୍ ଦି ମ୍ୟାଚ୍ ହୋଇଛନ୍ତି। ଉଭୟ ଦିନିକିଆ ଓ ଟେଷ୍ଟରେ ସେ ଦକ୍ଷିଣ ଆଫ୍ରିକାର ସର୍ବାଧିକ ରନ୍ ସଂଗ୍ରହକାରୀ ବ୍ୟାଟ୍ସମ୍ୟାନ ହେବାର ସୌଭାଗ୍ୟ ଲାଭ କରିଛନ୍ତି।
ଆବାସ ପାକିସ୍ତାନ ପକ୍ଷରୁ ୭୮ ଟେଷ୍ଟ ଓ ୬୨ ଦିନିକିଆ ମ୍ୟାଚ୍ ଖେଳିଛନ୍ତି। ଉଭୟ ଫର୍ମାଟ୍ରେ ତାଙ୍କ ବ୍ୟାଟିଂ ଆଭରେଜ ୪୦ରୁ ଊର୍ଦ୍ଧ୍ୱ ରହିଛି। ବିଶ୍ୱର ପ୍ରଥମ ବ୍ୟାଟ୍ସମ୍ୟାନଭାବେ ଲଗାତର ୫ ମ୍ୟାଚ୍ରେ ଶତକ ହାସଲ କରିବାର କୀର୍ତ୍ତିମାନ ଆବାସଙ୍କ ନାମରେ ରହିଛି। ଏସିଆର ଏକମାତ୍ର ବ୍ୟାଟ୍ସମ୍ୟାନ ଭାବେ ସେ ପ୍ରଥମ ଶ୍ରେଣୀ କ୍ରିକେଟ୍ରେ ୧୦୦ ଶତକ ହାସଲ କରିଛନ୍ତି।
ଅପରପକ୍ଷରେ ଅଷ୍ଟ୍ରେଲିଆ ମହିଳା କ୍ରିକେଟ୍ ଦଳର ପୂର୍ବତନ ଖେଳାଳି ୪୧ ବର୍ଷୀୟା ଲିସା ୨୦୦୫ ଓ ୨୦୧୩ ବିଶ୍ୱକପ୍ ଜିତିବାର ସୌଭାଗ୍ୟ ଲାଭ କରିଥିଲେ। ସେ ମଧ୍ୟ ୨୦୧୦ ଓ ୨୦୧୨ ବିଶ୍ୱକପ୍ ବିଜୟୀ ଅଷ୍ଟ୍ରେଲିଆ ଦଳର ପ୍ରମୁଖ ସଦସ୍ୟା ରହିଥିଲେ। ଅନ୍ତର୍ଜାତୀୟ କ୍ରିକେଟ୍ରେ ପ୍ରଥମ କ୍ରିକେଟର୍ ଭାବେ ସେ ୧୦୦ ଉଇକେଟ୍ ନେବା ସହ ଏକ ହଜାର ରନ୍ ପୂରଣ କରିଥିଲେ। ଏଠାରେ ଉଲ୍ଲେଖଯୋଗ୍ୟ, ୨୦୦୯ରେ ପ୍ରଥମ ଥର ଲାଗି ଆଇସିସି ହଲ୍ ଅଫ୍ ଫେମ୍ ଆରମ୍ଭ କରାଯାଇଥିଲା। ପ୍ରଥମ ଭାରତୀୟ ଭାବେ ଗାଭାସ୍କର ଓ ବିଶନ ସିଂ ବେଦୀ ଏଥିରେ ସ୍ଥାନ ପାଇଥିଲେ। ଏହାପରେ କପିଳ ଦେବ (୨୦୧୦), ଅନିଲ କୁମ୍ବଲେ (୨୦୧୫), ରାହୁଲ ଡ୍ରାଭିଡ୍ (୨୦୧୮) ଓ ସଚିନ ତେନ୍ଦୁଲକର (୨୦୧୯) ଏଥିରେ ସ୍ଥାନ ପାଇଛନ୍ତି।