ଭବାନୀପାଟଣା,୬।୧୦(ଉତ୍ତମ କୁମାର ଦାଶ): କଳାହାଣ୍ଡି ଭବାନୀପାଟଣା ସହରର ଝିଅ ଅନମୋଲ ଅଙ୍କିତା ନୂଆଦିଲ୍ଲୀସ୍ଥିତ ନୂଆ ସଂସଦ ଭବନରେ ଲାଲବାହାଦୁର ଶାସ୍ତ୍ରୀଙ୍କ ଉପରେ ଇଂଲିଶରେ ବକ୍ତୃତା ଉପସ୍ଥାପନା କରି ଏବେ ଚର୍ଚ୍ଚାକୁ ଆସିଛନ୍ତି। ନିକଟରେ କେନ୍ଦ୍ର କ୍ରୀଡା ଓ ଯୁବ ବ୍ୟାପାର ମନ୍ତ୍ରଣାଳୟ ଆନୁକୂଲ୍ୟରେ ଅନ୍ଲାଇନରେ ମହାତ୍ମା ଗାନ୍ଧୀ ଓ ଲାଲ ବାହାଦୁର ଶାସ୍ତ୍ରୀଙ୍କ ଉପରେ ଏକ ବକ୍ତୃତା ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏଥିରେ ଅଙ୍କିତା ଜିଲା ତଥା ରାଜ୍ୟରେ ପ୍ରଥମ ସ୍ଥାନ ଅଧିକାର କରିଥିଲେ। ଦେଶବ୍ୟାପୀ ଅନୁଷ୍ଠିତ ପ୍ରତିଯୋଗିତାରେ ଅଙ୍କିତା ପ୍ରଥମ ୭ଜଣଙ୍କ ମଧ୍ୟରେ ସ୍ଥାନ ପାଇଥିଲେ। ଫଳରେ ସେ ସଂସଦ ଭବନରେ ଲାଲବାହଦୁର ଶାସ୍ତ୍ରୀଙ୍କ ଉପରେ ଇଂଲିଶରେ ବକ୍ତୃତା ରଖିବାକୁ ଯୋଗ୍ୟ ବିବେଚିତ ହୋଇଥିଲେ। କଳାହାଣ୍ଡିର ଝିଅ ସଂସଦ ଭବନରେ ବକ୍ତୃତା ରଖିବା ପ୍ରଥମ ଘଟଣା।
ଏହି ସଫଳତାକୁ ନେଇ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି। ଭବାନୀପାଟଣା ମନ୍ଦାରବଗିଚା ପଡାର ରାକେଶ କୁମାର ସ୍ବାଇଁ ଓ ଶୁଭଶ୍ରୀ ସାମନ୍ତଙ୍କ ଝିଅ ଅଙ୍କିତା ସ୍ଥାନୀୟ ବିମଳା କନଭେଣ୍ଟରୁ ଦଶମ ଶ୍ରେଣୀ ପାସ କରିବା ପରେ ଖୋର୍ଦ୍ଧାସ୍ଥିତ ୱାନନେଶ ଇଣ୍ଟରନ୍ୟାଶନାଲ ସ୍କୁଲରୁ ଯୁକ୍ତ ୨ ପାସ୍ କରିଥିଲେ। ଏହି ନିକଟରେ କଳାହାଣ୍ଡି ବିଶ୍ୱବିଦ୍ୟାଳୟରୁ ସ୍ନାତକ ଡିଗ୍ରୀ ହାସଲ ପରେ ଏବେ ସେ ବିଭିନ୍ନ ପ୍ରତିଯୋଗିତାପାଇଁ ପ୍ରସ୍ତୁତ ହେଉଛନ୍ତି।