ଚେନ୍ନାଇ,୧୩।୧୨: ନୂଆ ସଂସଦ ଭବନ ନିର୍ମାଣ ନେଇ ଦକ୍ଷିଣ ଫିଲ୍ମ ଅଭିନେତା କମଲ ହାସନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶ୍ନ କରିଛନ୍ତି। ସେ କହିଛନ୍ତି ଯେ, କରୋନା ମହାମାରୀ ସଙ୍କଟ ସମୟରେ ଦେଶର ଅଧା ଜନସଂଖ୍ୟା ଭୋକିଲା ଥିବାବେଳେ ନୂଆ ସଂସଦ ଭବନ ନିର୍ମାଣରେ ୯୭୧ କୋଟି ଟଙ୍କା ଖର୍ଚ୍ଚ କରାଯିବା କେତେଦୂର ଯୁକ୍ତିଯୁକ୍ତ। କମଲ ହାସନ ଟୁଇଟ୍ କରି ମୋଦିଙ୍କୁ ଏଭଳି ପ୍ରଶ୍ନ କରିଛନ୍ତି। ସେ ଚାଇନାର ବିଶାଳ ପ୍ରାଚୀରର ଉଦାହରଣ ଦେଇ କହିଛନ୍ତି ଯେ, ଏହାର ନିର୍ମାଣ ସମୟରେ ବହୁ ଲୋକଙ୍କ ମୃତ୍ୟୁ ଘଟିଥିଲା। ସେତେବେଳେ ଚାଇନା ଶାସକ ଏହା ଲୋକଙ୍କ ସୁରକ୍ଷା ପାଇଁ ନିର୍ମିତ ହେଉଥିବା କହିଥିଲେ। ଏବେ ଭାରତରେ ଏହାର ପୁୁନରାବୃତ୍ତି ଘଟିଛି। ଦେଶର ଲୋକେ ଦୁଇବେଳା ଦୁଇମୁଠା ଖାଇବାକୁ ପାଉ ନ ଥିବାବେଳେ ସଂସଦ ଭବନ ନିର୍ମାଣ ସରକାର ସାଧାରଣ ଲୋକଙ୍କ ପାଇଁ କେତେ ପ୍ରତିଶ୍ରୁତିବଦ୍ଧ ସେ ନେଇ ପ୍ରଶ୍ନବାଚୀ ସୃଷ୍ଟି କରିଥିବା ସେ କହିଛନ୍ତି।