ମୁମ୍ବାଇ,୩୦।୮: ୨୦୨୦ରେ ବିବାଦୀୟ ଟୁଇଟ ପାଇଁ ଅଭିନେତା କମଲ ରସିଦ ଖାନଙ୍କୁ ମଙ୍ଗଳବାର ମୁମ୍ବାଇର ମାଲାଡ ପୋଲିସ ଗିରଫ କରିଛି। ତାଙ୍କୁ ମୁମ୍ବାଇ ବିମାନବନ୍ଦରରେ ଗିରଫ କରାଯାଇଥିଲା। ଆଜି ଅର୍ଥାତ୍ ମଙ୍ଗଳବାର ବୋରିଭାଲୀ କୋର୍ଟରେ ହାଜର କରାଯିବ।
କମଲ ରସିଦ ଖାନ ତାଙ୍କର ବିବାଦୀୟ ମନ୍ତବ୍ୟ ପାଇଁ ପ୍ରାୟତଃ ଚର୍ଚ୍ଚାରେ ରହିଥାନ୍ତି। କେଆରକେ ପ୍ରତିଦିନ କିଛି ଫିଲ୍ମ କିମ୍ବା ସେଲିବ୍ରିଟିଙ୍କ ବିଷୟରେ ବିବାଦୀୟ ଟୁଇଟ୍ କରି ଟ୍ରୋଲ ହୁଅନ୍ତି। ପୂର୍ବରୁ ସୁପରଷ୍ଟାର ସଲମାନ ଖାନ ତାଙ୍କ ବିରୋଧରେ ମାନହାନି ମୋକଦ୍ଦମା ଦାୟର କରିଥିଲେ।
ନିକଟରେ ମୁକ୍ତିଲାଭ କରିଥିବା ଅମିର ଖାନଙ୍କ ଫିଲ୍ମ ଲାଲ ସିଂ ଚଢା ଉପରେ ମଧ୍ୟ କେଆରକେ ନେଗେଟିଭ୍ ରିଭ୍ୟୁ ଦେଇଥିଲେ। ଏହା ବ୍ୟତୀତ ସେ ଅମିରଙ୍କୁ ମଧ୍ୟ ଟାର୍ଗେଟ କରିଥିଲେ। କମଲ ଆର ଖାନ ଅନେକ ହିନ୍ଦୀ ଫିଲ୍ମରେ ମଧ୍ୟ କାମ କରିଛନ୍ତି। ସେ ୨୦୦୫ରେ ଫିଲ୍ମ ‘ସୀତମ’ ଜରିଆରେ ନିଜର କ୍ୟାରିୟର ଆରମ୍ଭ କରିଥିଲେ।