ଚମକାଇଲା ସର୍ଭେ, ରାଷ୍ଟ୍ରପତି ନିର୍ବାଚନରେ ଟ୍ରମ୍ପଙ୍କୁ ପରାସ୍ତ କରିବେ ଭାରତବଂଶୀ କମଲା ହାରିସ

ଓ୍ବାଶିଂଟନ୍‌,୨୪।୭:ନଭେମ୍ବର ୨ରେ ଆମେରିକାରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏଭଳି ପରିସ୍ଥିତିରେ ଡୋନାଲ୍ଡ ଟ୍ରମ୍ପ ରିପବ୍ଲିକାନ ପକ୍ଷରୁ ଏବଂ କମଲା ହାରିସ ଡେମୋକ୍ରାଟିକ ପକ୍ଷରୁ ଲଢିବାକୁ ଯାଉଛନ୍ତି। ଯଦିଓ ଏହା ସ୍ପଷ୍ଟ ହୋଇନି, ନଭେମ୍ବରରେ ପୂର୍ବତନ ରିପବ୍ଲିକାନ ରାଷ୍ଟ୍ରପତି ଟ୍ରମ୍ପଙ୍କ ସହ ମୁହାଁମୁହିଁ ହେବା ପାଇଁ ଭାରତୀୟ ବଂଶଜ ହାରିସ ବର୍ତ୍ତମାନ ଡେମୋକ୍ରାଟିକ ପ୍ରାର୍ଥୀ ହେବେ। ଉଭୟ ପ୍ରତିଦ୍ୱନ୍ଦ୍ୱୀଙ୍କ ମଧ୍ୟରେ କଡ଼ା ମୁକାବିଲା ହେବାକୁ ଯାଉଛି। ଏହି ସମୟ ମଧ୍ୟରେ ଏକ ସର୍ଭେ କରାଯାଇଛି, ଯେଉଁଥିରେ ହାରିସ ଟ୍ରମ୍ପଙ୍କୁ ପରାସ୍ତ କରିବେ ବୋଲି କୁହାଯାଉଛି।

ରଏଟର୍ସ / ଇପ୍ସୋସ ସର୍ଭେରେ ଟ୍ରମ୍ପଙ୍କ ଠାରୁ ହାରିସ ଦୁଇ ପ୍ରତିଶତ ଆଗୁଆ ଅଛନ୍ତି। ରାଷ୍ଟ୍ରପତି ନିର୍ବାଚନ ପ୍ରଚାରରୁ ଜୋ ବାଇଡେନ ପ୍ରତ୍ୟାହାର ଘୋଷଣା କରିବା ପରେ ଏହି ସର୍ଭେ କରାଯାଇଛି। ଜୁନ ୨୭ରେ ଡୋନାଲ୍ଡ ଟ୍ରମ୍ପଙ୍କ ସହ ହୋଇଥିବା ବିତର୍କରେ ତାଙ୍କର ଖରାପ ପ୍ରଦର୍ଶନ ପରେ, ନିର୍ବାଚନରେ ପ୍ରତିଦ୍ୱନ୍ଦ୍ୱିତା ନ କରିବାକୁ ତାଙ୍କ ଉପରେ କ୍ରମାଗତ ଚାପ ପଡୁଥିଲା।

ବର୍ତ୍ତମାନ ସଦ୍ୟତମ ସର୍ଭେରେ କମଲା ହାରିସଙ୍କର ୪୪ ପ୍ରତିଶତ ସମର୍ଥନ ଥିବାବେଳେ ରିପବ୍ଲିକାନ ପ୍ରାର୍ଥୀ ଡୋନାଲ୍ଡ ଟ୍ରମ୍ପଙ୍କୁ ୪୨ ପ୍ରତିଶତ ଲୋକ ସମର୍ଥନ କରିଛନ୍ତି। ଜାତୀୟ ସର୍ଭେରୁ ଜଣାପଡିଛି ଯେ ହାରିସଙ୍କ ସମର୍ଥନ ଧୀରେଧିରେ ବୃଦ୍ଧି ପାଉଛି। ରାଜନୈତିକ ପ୍ରାର୍ଥୀ ପାଇଁ ଆମେରିକାର ଲୋକଙ୍କ ମନୋବଳ ବିଷୟରେ ଗୁରୁତ୍ୱପୂର୍ଣ୍ଣ ସଙ୍କେତ ଦେଇଥାଏ। ନିକଟରେ ହୋଇଥିବା ଏକ ସର୍ଭେରେ ୫୬ ପ୍ରତିଶତ ଭୋଟର ବିଶ୍ୱାସ କରନ୍ତି ଯେ ୫୯ ବର୍ଷୀୟ ହାରିସ ମାନସିକ ଭାବେ ବିଚକ୍ଷଣ ଏବଂ ଚ୍ୟାଲେଞ୍ଜଗୁଡିକୁ ଗ୍ରହଣ କରିବାରେ ସକ୍ଷମ। ଯେତେବେଳେ କି ୪୯ ପ୍ରତିଶତ ଭୋଟରଙ୍କ ଟ୍ରମ୍ପଙ୍କ ବିଷୟରେ ଏହି ରାୟ ରହିଛି।