ଭଞ୍ଜନଗର,୨୨ା୫(ଡି.ଏନ୍.ଏ.): ଭଞ୍ଜନଗର ଉତ୍ତର ଘୁମୁସର ବନଖଣ୍ଡ କାର୍ଯ୍ୟାଳୟ କୋଠା ବ୍ରିଟିଶ ଶାସନ ସମୟରେ ନିର୍ମିତ ହୋଇଥିଲା। ବର୍ତ୍ତମାନ ତାହା ଭଗ୍ନ ଅବସ୍ଥାକୁ ଚାଲିଆସିଲାଣି। ଉପଯୁକ୍ତ ରକ୍ଷଣାବେକ୍ଷଣ ଅଭାବ ଯୋଗୁ କେଉଁ ମୁହୂର୍ତ୍ତରେ ଉକ୍ତ କୋଠା ଭୁଶୁଡ଼ି ପଡ଼ିବା ସମ୍ଭାବନା ରହିଛି। ବିଭିନ୍ନ ସମୟରେ ଉକ୍ତ କୋଠାର ସମ୍ମୁଖ ଭାଗ ଏବଂ ରୁମ୍ ଭିତର ମରାମତି କରାଯାଉଛି। କିନ୍ତୁ କୋଠାର ପଛପଟ କାନ୍ଥର ମରାମତି ପ୍ରତି ଧ୍ୟାନ ଦିଆଯାଉନାହିଁ । ତେଣୁ କୋଠାର ପଛ ଭାଗ ଜଙ୍ଗଲ ହୋଇଗଲାଣି। ପାଣି ଟାଙ୍କି ଉପରେ ଲଟା ବୁଦା ହୋଇଗଲାଣି। ଏଥିସହ କାନ୍ଥର ବିଭିନ୍ନ ସ୍ଥାନରେ ବର, ଓସ୍ତ ସମେତ ଅନ୍ୟାନ୍ୟ ଗଛ ହୋଇଗଲାଣି। ଗଛଗୁଡ଼ିକୁ ବାହାର କରିବାକୁ କାହାର ଆଗ୍ରହ ନାହିଁ। କିଛି ଦିନ ପୂର୍ବେ ଡିଏଫ୍ଓଙ୍କ ରୁମ୍କୁ ଲକ୍ଷାଧିକ ଟଙ୍କା ବ୍ୟୟରେ ଚକାଚକ କରାଯାଇଥିଲା। ଏହାପରେ ଛୋଟିଆ ଉଦ୍ଘାଟନ କାର୍ଯ୍ୟକ୍ରମ ମଧ୍ୟ ହୋଇଥିଲା। କିନ୍ତୁ ପଛପଟ ପ୍ରତି ଧ୍ୟାନ ଦିଆଯାଇ ନ ଥିଲା। ତେଣୁ ଉକ୍ତ କୋଠାର ସ୍ଥାୟିତ୍ୱ ପ୍ରତି ବିପଦ ଦେଖାଦେଇଛି। ଉକ୍ତ କୋଠାକୁ ଭାଙ୍ଗି ସେଠାରେ ନୂତନ କୋଠା ନିର୍ମାଣ କରାଯାଉା ନଚେତ ୱାର୍କିଂ ପ୍ଲାନ୍ ଅଫିସରଙ୍କ ପାଇଁ ସୂଚନା କେନ୍ଦ୍ର ସମ୍ମୁଖରେ ଥିବା ବିରାଟ କୋଠାଟି ବହୁବର୍ଷ ହେବ ଖାଲି ପଡ଼ିଥିବା ବେଳେ ତାହାକୁ ବନଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ଭାବେ ବ୍ୟବହାର କରାଯାଉ। ଏ ନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବା ପାଇଁ ଦାବି ହୋଇଛି। ଅପରପକ୍ଷେ ବନ ବିଭାଗରେ କାର୍ଯ୍ୟକାରୀ ହେଉଥିବା ବିଭିନ୍ନ ଯୋଜନାର ଅର୍ଥ ମଧ୍ୟ ନିର୍ଦ୍ଧାରିତ ସମୟରେ ଆସୁନାହିଁ। ତେଣୁ ଶ୍ରମିକମାନେ ବେଳେବେଳେ ୬ମାସ ପର୍ଯ୍ୟନ୍ତ ପାରିଶ୍ରମିକ ପାଇପାରୁନାହାନ୍ତି। ଗତବର୍ଷ କାମ୍ପା ଯୋଜନାରେ ୧୮ ମାସିଆ ଚାରା ଉପତ୍ାଦନ କରାଯାଇଥିଲା। ଚଳିତ ବର୍ଷ ଉକ୍ତ ଚାରାଗୁଡ଼ିକ ରୋପଣ କରାଯିବା ସହ ଲୋକଙ୍କୁ ମଧ୍ୟ ବଣ୍ଟନ କରାଯିବ। ଉକ୍ତ ଚାରା ଉପତ୍ାଦନ ପାଇଁ ଖର୍ଚ୍ଚ ହୋଇଥିବା ପ୍ରାୟ ୪୦ ଲକ୍ଷ ଟଙ୍କା ବର୍ତ୍ତମାନ ସୁଦ୍ଧା ଆସିନାହିଁ। ଉକ୍ତ ଯୋଜନାରେ କାମ କରିଥିବା ଶ୍ରମିକମାନଙ୍କୁ ପାରିଶ୍ରମିକ ପ୍ରଦାନରେ ଅସୁବିଧା ହେଉଛି, ଯାହାକୁ ନେଇ ଶ୍ରମିକମାନଙ୍କ ମଧ୍ୟରେ ବିଭିନ୍ନ ସମୟରେ ଅସନ୍ତୋଷ ପ୍ରକାଶ ପାଉଛି। ଫଳରେ କର୍ମଚାରୀମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି । ରାଜ୍ୟର ଅନ୍ୟ ବନଖଣ୍ଡରେ କାମ୍ପା ଯୋଜନାରେ ହୋଇଥିବା ଚାରା ଉପତ୍ାଦନ ଅର୍ଥ ଆସିନାହିଁ। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବା ପାଇଁ ଦାବି ହୋଇଛି। ଏ ନେଇ ମୁଜାଗଡ଼ ରେଞ୍ଜର ବିମ୍ବାଧର ସାହୁଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, କାମ୍ପା ଯୋଜନାରେ ଟଙ୍କା ଆସି ନ ଥିବାରୁ ଶ୍ରମିକମାନଙ୍କୁ ନିର୍ଦ୍ଧାରିତ ସମୟରେ ପାରିଶ୍ରମିକ ପ୍ରଦାନ କରାଯାଇପାରୁନାହିଁ। ଯେତେବେଳେ ଟଙ୍କା ଆସୁଛି ପ୍ରଦାନ କରାଯାଉଛି। ଶ୍ରମିକମାନେ ବକେୟା ପାରିଶ୍ରମିକକୁ ନେଇ ଅସନ୍ତୋଷ ପ୍ରକାଶ କଲେ ବାଧ୍ୟହୋଇ ସେମାନଙ୍କୁ କାର୍ଯ୍ୟରୁ ବାହାର କରିଦେବୁ। ରେଞ୍ଜରଙ୍କ ଏଭଳି ମନ୍ତବ୍ୟକୁ ନେଇ ବିଭିନ୍ନ ଶ୍ରମିକ ସଙ୍ଗଠନ ପକ୍ଷରୁ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏ ନେଇ ଶ୍ରମିକନେତା ତଥା ଆଇନଜୀବୀ ଗୋପାଳ କୃଷ୍ଣ ବିଷୋୟୀଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ଗୋଟିଏ ପରିବାର ଭୋକରେ ରହୁଥିବା ବେଳେ ସେମାନଙ୍କୁ ମାସ ମାସ ଧରି ପାରିଶ୍ରମିକ ପ୍ରଦାନ କରାଯାଉନାହିଁ। ପାରିଶ୍ରମିକ କଥା ଉଠିଲେ ଓଲଟା କାର୍ଯ୍ୟରୁ ଛଟେଇ ପାଇଁ ଧମକ ଦିଆଯାଉଛି। ଏହା ଅତ୍ୟନ୍ତ ନିନ୍ଦନୀୟ ଘଟଣା। ଯଦି
କୌଣସି ଶ୍ରମିକଙ୍କୁ ଛଟେଇ କରାଯାଏ ତେବେ ଶ୍ରମିକମାନେ ବାଧ୍ୟହୋଇ ଆନ୍ଦୋଳନ ପନ୍ଥା ଅପଣାଇବେ।