ଦାରିଙ୍ଗବାଡ଼ି,୨୮।୭(ଡି.ଏନ୍.ଏ): କନ୍ଧମାଳ ଜିଲାରେ ଦିନକୁ ଦିନ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବା ଯୋଗୁ ଜିଲା ପ୍ରଶାସନ ବୁଧବାର ସନ୍ଧ୍ୟା ୫ଟାରୁ ଆସନ୍ତା ୭ ତାରିଖ ପର୍ଯ୍ୟନ୍ତ ଜିଲାକୁ ଲକ୍ଡାଉନ ଘୋଷଣା କରିଛନ୍ତିି। ଏହି ସମୟରେ କେବଳ ଅତ୍ୟାବଶ୍ୟକୀୟ ସାମଗ୍ରୀ ଯେପରି ରାସନ, ଔଷଧ, କ୍ଷୀର ଆଦି ସକାଳ ୭ରୁ ଅପରାହ୍ନ ୧ଟା ପର୍ଯ୍ୟନ୍ତ ଖୋଲାରହିବ। ସେହିପରି ଅପରାହ୍ନ ୧ଟାରୁ ତା’ପରଦିନ ସକାଳ ୫ଟା ପର୍ଯ୍ୟନ୍ତ ଜନସାଧାରଣଙ୍କୁ ବାହାରକୁ ବାହାରିବାକୁ ସମ୍ପୂର୍ଣ୍ଣ ବାରଣ କରାଯାଇଛି। କୋଭିଡ୍ ନିୟମ ଉଲ୍ଲଂଘନ କଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କନ୍ଧମାଳ ଜିଲାପାଳ ତାଙ୍କ ଚିଠିରେ ଦର୍ଶାଇଛନ୍ତି। ଲକ୍ଡାଉନ ସମୟରେ ପେଟ୍ରୋଲ ପମ୍ପ ସମେତ ବିଦ୍ୟୁତ ସେବା, ସ୍ବାସ୍ଥ୍ୟସେବା ଅଗ୍ନୀଶମ, ଜରୁରୀ ସରକାରୀ ସେବା ଆମ୍ବୁଲାନ୍ସ, ସ୍ବାସ୍ଥ୍ୟସେବା ଆଦି ଖୋଲାରହିବ।
ସୂଚନାଯୋଗ୍ୟ, ଗତ ୪ ଦିନ ହେଲା ଜିଲାରେ ଶଟ୍ଡାଉନ ହୋଇ ରହିଛି। ମଙ୍ଗଳବାର ଶଟଡାଉନର ଶେଷ ଦିନ। ଏହି ସମୟରେ ଦାରିଙ୍ଗବାଡ଼ିର ପ୍ରାୟ ୮ହଜାର ଲୋକଙ୍କ ସ୍ବାସ୍ଥ୍ୟକୁ ସ୍ବାସ୍ଥ୍ୟବିଭାଗ ପକ୍ଷରୁ ଥର୍ମାଲ ସ୍କ୍ରିନିଂ କରାଯାଉଛି। ସାହି ସାହି ବୁଲି ଘରର ସମସ୍ତ ସଦଶ୍ୟଙ୍କ ପରୀକ୍ଷା କରାଯିବା ସହ ସମସ୍ତ ତଥ୍ୟକୁ କର୍ମଚାରୀ ଲିଖିତ ଭାବେ ରେକର୍ଡ଼ ସଂଗ୍ରହ କରୁଛନ୍ତିି। କୌଣସି ତଥ୍ୟ ନ ଲୁଚାଇ ପ୍ରଶାସନକୁ ସହଯୋଗ କରିବା ପାଇଁ ତହସିଲଦାର ନିତିସ କୁମାର ତ୍ରୀପାଠି ନିବେଦନ କରିଥିଛନ୍ତି।