ଦାରିଙ୍ଗବାଡି, ୧୬।୧୦(ଅରୁଣ ସାହୁ): ଦିଲ୍ଲୀ ପ୍ରଗତି ମୈଦାନରେ ଚାଲିଥିବା ବାଣିଜ୍ୟ ମେଳାରେ ଓଡିଶାରୁ ପ୍ରାୟ ୪୦ଟି ଷ୍ଟଲ ପଡିଛି। ସେଥିମଧ୍ୟରେ ମିଶନ ଶକ୍ତି ପକ୍ଷରୁ ପାରମ୍ପରିକ ଖାଦ୍ୟ କନ୍ଧମାଳର ଜୈବିକ କଞ୍ଚା, ଶୁଖିଲା ଓ ଗୁଣ୍ଡ ହଳଦୀ ସମେତ ତେନ୍ତୁଳି, ଭଜା ମୁଗଡାଲି ଆଦିର ଚାହିଦା ଅଧିକା ରହିଛି। ହଳଦୀଠାରୁ ତେନ୍ତୁଳିର ବିକ୍ରି ଅଧିକା ରହିଥିବା ମିଶନ ଶକ୍ତିର ମହିଳା ତଥା ଲକ୍ଷ୍ୟପତି ଦିଦି ଝରଣା ସାହୁ କହିଛନ୍ତି।
ଝରଣା କନ୍ଧମାଳ ଜିଲା ଦାରିଙ୍ଗବାଡିରୁ ଏହି ମେଳାରେ ଯୋଗଦେବାକୁ ଯାଇଛନ୍ତି। ତାଙ୍କୁ ସେଠି ପ୍ରଭାକର ସାହୁ ବିକ୍ରିବଟାରେ ସହାୟତା କରୁଥିବା ବେଳେ ପ୍ରଥମ ଦିନରେ ୧୧ ହଜାର ଟଙ୍କା ବିକ୍ରି ହୋଇଥିବାବେଳେ ଦିତୀୟଦିନ ଅର୍ଥାତ ଶୁକ୍ରବାର ୩୫ ହଜାର ଟଙ୍କା ବିକ୍ରି ହୋଇଛି। ସର୍ବାଧିକ ତେନ୍ତୁଳି ବିକ୍ରି ହେଉଛି। କନ୍ଧମାଳର ତେନ୍ତୁଳି ଅଧିକା ଖଟା ଓ ସୁସ୍ବାଦ ଯୋଗୁ ଦିଲ୍ଲୀବାସୀ ଏହି ତେନ୍ତୁଳିକୁ ଅଧିକା ପସନ୍ଦ କରୁଥିବା ଝରଣା କହିଛନ୍ତି।
ସେ କହିଛନ୍ତି, ଦାରିଙ୍ଗବାଡିରେ ତେନ୍ତୁଳି କିଲୋଗ୍ରାମ ପିଛା ୧୭୦ ରୁ ୨୦୦ ପର୍ଯ୍ୟନ୍ତ ବିକ୍ରି ହେଉଥିବାବେଳେ ଦିଲ୍ଲୀରେ ଏହାର ଦାମ ୩୦୦ ପର୍ଯ୍ୟନ୍ତ ବିକ୍ରି କରାଯାଉଛି। ସେହିପରି ହଳଦୀ ଗୁଣ୍ଡ ଦାରିଙ୍ଗବାଡିରେ ୧୭୦ରେ ବିକ୍ରି କରାଯାଉଥିବା ବେଳେ ଦିଲ୍ଲୀରେ ଏହାର ଦାମ ୩୫୦ ଟଙ୍କା ପର୍ଯ୍ୟନ୍ତ ବିକ୍ରି କରାଯାଉଛି। ସେହିପରି ଅନ୍ୟସାମଗ୍ରୀ ମଧ୍ୟରେ ଭଜା ଓ କଞ୍ଚା ମୁଗଡାଲି, ସୋରିଷ,ଗରମ ମସଲା, ତ୍ରିଫଳା, ଅଁଳା,ଫୁଲ ଝାଡୁ, ମୁଢି, ମାଣ୍ଡିଆ ଚୁନା, ଆଦି ବିକ୍ରି କରାଯାଉଛି।
ସୂଚନାଯୋଗ୍ୟ ଯେ, ସରକାରଙ୍କ ମିଶନ ଶକ୍ତିର ମହିଳା ମାନଙ୍କୁ ବିଭିନ୍ନ ମେଳାରେ ବିକ୍ରିବଟା କରିବାକୁ ସୁଯୋଗ ସୃଷ୍ଟି କରିବାରୁ ଏବେ ମହିଳାମାନେ ସ୍ବାବଲମ୍ବୀ ହେବା ସହ ଉଦ୍ୟୋଗୀ ହୋଇପାରୁଛନ୍ତି,ଯାହା ଏହି ଝରଣା ସାହୁଙ୍କ ସମେତ ଅନେକ ମହିଳାଙ୍କ କ୍ଷେତ୍ରରେ ଦେଖିବାକୁ ମିଳିଛି।