ଦାରିଙ୍ଗବାଡ଼ି,୩।୭(ଡି.ଏନ୍.ଏ.): କନ୍ଧମାଳ ଜିଲାରେ ଜୈବିକ ପଦ୍ଧତିରେ ଉତ୍ପାଦନ କରାଯାଉଥିବା ହଳଦୀର ଚାହିଦା ସମଗ୍ର ବିଶ୍ୱରେ ରହିଥିବା ବେଳେ ଏବେ ରଥଯାତ୍ରା ଅବସରରେ ପୁରୀ ଶରଧାବାଲିରେ ଚାଲିଥିବା ମେଳାରେ ଭଲ ବିକ୍ରି ହେଉଛି। କନ୍ଧମାଳ ପ୍ରଶାସନ ସହାୟତାରେ ଦାରିଙ୍ଗବାଡ଼ି ବ୍ଲ୍ଳକର ଏକ ମହିଳା ସ୍ବୟଂ ସହାୟକ ଗୋଷ୍ଠୀ ହଳଦୀ ସହ ତେନ୍ତୁଳି, ସୋରିଷ, ମାଣ୍ଡିଆ ଆଦି ବିଭିନ୍ନ ଜଙ୍ଗଲଜାତ ଦ୍ରବ୍ୟ ନେଇ ଉକ୍ତ ମେଳାରେ ବିକ୍ରି କରୁଛନ୍ତି। ସେଠାରେ କନ୍ଧମାଳ ହଳଦୀର ଚାହିଦା ରହିଥିବା ଶୁଭଲକ୍ଷ୍ମୀ ଫୁଡ ଆଣ୍ଡ ସ୍ପାଇସେସ୍ ମହିଳା ସ୍ବୟଂ ସହାୟକ ଗୋଷ୍ଠୀ ସଦସ୍ୟା ଝରଣା ସାହୁ କହିଛନ୍ତି। ପୁରୀକୁ ଏବେ ଦୈନିକ ହଜାର ହଜାର ଲୋକ ଆସୁଥିବା ବେଳେ କନ୍ଧମାଳର ସମସ୍ତ ସାମଗ୍ରୀର ଚାହିଦା ଅଧିକ ରହିଛି ା ସୂଚନାଯୋଗ୍ୟ, ମହିଳା ସ୍ବୟଂ ସହାୟକ ଗୋଷ୍ଠୀ ପକ୍ଷରୁ ହଳଦୀ ଗୁଣ୍ଡ ପ୍ରସ୍ତୁତ କରିବା ଲାଗି ପ୍ରଥମେ ହଳଦୀକୁ ଶୁଖାଇ ଚୋପା ବାହାର କରାଯାଏ। ପରେ ତାହାକୁ ଗୁଣ୍ଡ କରି କିଲୋଗ୍ରାମ ଅନୁଯାୟୀ ପ୍ୟାକେଟ କରାଯାଏ। ସେହିପରି ତେନ୍ତୁଳୀରୁ ମଞ୍ଜି ଛଡ଼ାଇ ତାହାକୁ ପ୍ରେସ କରାଯାଇ ପ୍ୟାକେଟ ପ୍ରସ୍ତୁତ ହୁଏ। ସୋରିଷକୁ ମଧ୍ୟ ସଫା କରାଯାଇ ହାଇଜେନିକ ଭାବେ ପ୍ୟାକେଟ କରି ମହିଳା ଗୋଷ୍ଠୀ ରାଜ୍ୟ ତଥା ରାଜ୍ୟ ବାହାରେ ବିଭିନ୍ନ ମେଳାରେ ବିକ୍ରି କରିଥାନ୍ତି। ରାଜ୍ୟ ସରକାରଙ୍କ ଓଡ଼ିଶା ରୁରାଲ ଡେଭଲପ୍ମେଣ୍ଟ ଆଣ୍ଡ ମାର୍କେଟିଂ ସୋସାଇଟି (ଓଆରଏମ୍ଏଏସ୍) ପକ୍ଷରୁ ମହିଳାମାନଙ୍କୁ ମେଳାରେ କିଭଳି ବିଭିିନ୍ନ ସାମଗ୍ରୀ ବିକ୍ରି କରିବେ ସେ ନେଇ ତାଲିମ ସହ ସମସ୍ତ ସହଯୋଗ କରାଯାଉଛି ା