![](https://www.dharitri.com/wp-content/uploads/2024/06/7-5.jpg)
ରାଇକିଆ,୧୦।୬(ପ୍ରଦୀପ ବେହେରା): କନ୍ଧମାଳ ଜିଲାର ସବୁଠାରୁ ଅର୍ଥକାରୀ ଫସଲ ହଳଦୀ ଦର ଏବେ ବୃଦ୍ଧି ହୋଇଛି। ଏବେ କିଲୋ ପ୍ରତି ୧୩୦ ଟଙ୍କା ରହିଛି ହଳଦୀ ଦର। ଶେଷ ଥର ପାଇଁ ୨୦୦୯-୧୦ରେ ହଳଦୀ ଦର ୧୫୦ ଛୁଇଁ ଥିଲା। ଏକଦା ଜିଲାରେ ସର୍ବାଧିକ ଚାଷ କରାଯାଉଥିବା ହଳଦୀ ଦର କ୍ରମାଗତ ହ୍ରାସ ଯୋଗୁ ଦିନକୁ ଦିନ ଏହି ଚାଷରୁ ମୁଁହ ଫେରାଇଥିଲେ ଚାଷୀ ।
ଚାଷୀ ହଳଦୀ ଛାଡ଼ି ବିଭିନ୍ନ ପନିପରିବା ଚାଷ ପ୍ରତି ଆକର୍ଷିତ ହୋଇଥିଲେ । ପରିସ୍ଥିତି ଏପରି ଉପୁଜିଥିଲା ଜିଆଇ ମାନ୍ୟତା ପ୍ରାପ୍ତ ପ୍ରସିଦ୍ଧ କନ୍ଧମାଳ ହଳଦୀର କିଲୋ ପ୍ରତି ଦର ୪୦କୁ ଖସି ଆସିଥିଲା । ଜୁନରୁ ମାର୍ଚ୍ଚ ପର୍ଯ୍ୟନ୍ତ କଠିନ ପରିଶ୍ରମ କରି ଉତ୍ପାଦନ ପରେ ବ୍ୟବସାୟୀଙ୍କ ପାଖରେ ପହଞ୍ଚିଲା ବେଳେ ବହୁତ କମ ଦରରେ ବିକ୍ରୀ କରୁଥିଲେ ଚାଷୀ । ଗତ ଦୁଇ ବର୍ଷ ହେଲା ହଳଦୀ ଦର ସାମାନ୍ୟ ଉପର ମୁହାଁ ହୋଇଥିଲା । ପ୍ରଥମେ୫୦ ରୁ ୬୦ ଟଙ୍କାରେ ବିକ୍ରି ହୋଇଥିଲା ।
ପରବର୍ତ୍ତୀ ସମୟରେ ୭୦ରୁ ଊଦ୍ଦର୍ବ ମଧ୍ୟ ଛୁଇଁଥିଲା ଏହାର ଦର । ଚଳିତ ବର୍ଷ ୧୩୦ ଟଙ୍କାରେ ପହଞ୍ଚିଛି ହଳଦୀ । ହେଲେ ୧୫ବର୍ଷ ହେଲା ଉଚିତ ଦରରେ ବିକ୍ରି ନ ହେବା ଯୋଗୁ ଏହି ଚାଷରୁ ଦୂରେଇ ଯାଇଛନ୍ତି ଚାଷୀ । ମୁରୁଡିକୁପୁଡ଼ା ଅଞ୍ଚଳର ଚାଷୀ ବରଦତ ଦିଗାଲ କୁହନ୍ତି, ପୂର୍ବରୁ ହଳଦୀ ଚାଷ କରୁଥିଲୁ । କିନ୍ତୁ କିଛି ବର୍ଷ ହେଲା ଦର ହ୍ରାସ ଯୋଗୁ କ୍ଷତି ସହିଥିଲୁ। ଫଳରେ ଏହି ଚାଷ ଛାଡ଼ିବାକୁ ବାଧ୍ୟ ହେଲୁ । ଏହାର ଚାଷ ଆରମ୍ଭରୁ ଅମଳ ପର୍ଯ୍ୟନ୍ତ ବର୍ଷ ତମାମ ପରିଶ୍ରମ କରିବାକୁ ପଡ଼ିଥାଏ। ସେହି ତୁଳନାରେ କମ୍ ଦରକୁ ଖସି ଆସିଥିଲା ହଳଦୀ ଦର । ଏବେ ଭଲ ରେଟ୍ ଅଛି । ଏହି ପରି ଯଦି ଆଗକୁ ଦର ସ୍ଥିର ରହିବ ନିଶ୍ଚିତ ଭାବେ ଲୋକେ ଏହି ଚାଷ ପ୍ରତି ପୁଣି ମନ ବଳାଇବେ।