ମୁମ୍ବାଇ,୧୮।୫: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ୨୦୨୨ ସିଜନରେ ସନରାଇଜର୍ସ ହାଇଦ୍ରାବାଦ ଦଳକୁ ଲାଗିଛି ବଡ଼ ଝଟ୍କା। ଦଳର ଅଧିନାୟକ କେନ ଓ୍ବିଲିୟମସନ ଆଉ ଦଳ ପାଇଁ ଖେଳିବେ ନାହିଁ। ତାଙ୍କ ସ୍ତ୍ରୀ ସାରା ରହିମ ଦ୍ୱିତୀୟ ସନ୍ତାନ ଜନ୍ମ ଦେବାକୁ ଯାଉଥିବାରୁ ସେ ସ୍ବଦେଶ ଫେରିଯାଇଛନ୍ତି। ସେ ପ୍ରସବ ସମୟରେ ସ୍ତ୍ରୀଙ୍କ ସହ ରହିବାକୁ ଚାହୁଁଛନ୍ତି। ଏଥିଲାଗି ସେ ଦଳ ପାଇଁ ଶେଷ ମ୍ୟାଚ୍ ଖେଳିବେ ନାହିଁ ବୋଲି ଫ୍ରାଞ୍ଚାଇଜ୍ ପକ୍ଷରୁ ଟୁଇଟ୍ କରି ସୂଚନା ଦିଆଯାଇଛି।
ମଙ୍ଗଳବାର ହାଇଦ୍ରାବାଦ ଟିମ୍ ରୋହିତ ଶର୍ମାଙ୍କ ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚ୍କୁ ଜିତିନେଇଛି। ଏହାଛଡ଼ା ଦଳ ଆଉ ଗୋଟିଏ ମ୍ୟାଚ୍ ଖେଳିବା ବାକି ଅଛି। ପଞ୍ଜାବ କିଙ୍ଗ୍ସ ବିପକ୍ଷରେ ମେ’ ୨୨ରେ ଏହି ମ୍ୟାଚ୍ ଖେଳାଯିବ। ତେବେ ପ୍ଲେଅଫ୍ ଦୌଡ଼ରେ ରହିବାକୁ ହେଲେ ହାଇଦ୍ରାବାଦକୁ ମ୍ୟାଚ୍କୁ ବିଶାଳ ଅନ୍ତରରେ ଜିତିବାକୁ ହେବ।
ପ୍ରକାଶ ଯେ, ଓ୍ବିଲିୟମସନ ଚଳିତ ସିଜନରେ ଭଲ ପ୍ରଦର୍ଶନ କରିନାହାନ୍ତି। ସେ ଦଳ ଲାଗି ୧୩ ମ୍ୟାଚ୍ ଖେଳିଥିବା ବେଳେ ୨୧୬ ରନ୍ କରିଛନ୍ତି। ସେହିଭଳି ତାଙ୍କ ନେତୃତ୍ୱରେ ଦଳ ଏଯାବତ ୧୩ ମ୍ୟାଚ୍ ଖେଳିଥିବା ବେଳେ ସେଥିରୁ ୬ଟିରେ ବିଜେତା ହୋଇଛି। ଦଳ ୧୨ ପଏଣ୍ଟ ସହ ଅଙ୍କ ତାଲିକାର ୮ମ ସ୍ଥାନରେ ରହିଛି।