ବମ୍ବେ: ଝିଅ ରୂପରେ ଅଭିନେତା ନବାଜୁଦ୍ଦିନ ସିଦ୍ଧକିଙ୍କ ଫଟୋ ହେଉଛି ଭାଇରାଲ। ଅଭିନେତ୍ରୀ କଙ୍ଗନା ରାଣାଓ୍ବତ ଫଟୋଗୁଡ଼ିକୁ ଶେୟାର କରିବା ପରେ ପ୍ରଶଂସକଙ୍କ ଉତ୍କଣ୍ଠା ବଢ଼ିଛି। ଇଏ କେଉଁ ରୂପ, କ’ଣ ପାଇଁ ସେ ନିଜକୁ ଝିଅ ଭାବେ ସଜାଇଛନ୍ତି ତାହା ଜାଣିବାକୁ ସମସ୍ତେ ଚାହୁଁଛନ୍ତି। ତେବେ କହିରଖୁଛୁ ଫଟୋଗୁଡ଼ିକ ନବାଜଙ୍କ ଆଗାମୀ ଫିଲ୍ମ ‘ଟିକୁ ଓ୍ବେଡ୍ସ ଶେରୁ’ର।
ଗୋଲ୍ଡେନ୍ ସିମରୀ ଗାଉନ୍ ପିନ୍ଧିଳ ମୁଣ୍ଡରେ କ୍ରାଉନ୍ ଲଗାଇ, ଲମ୍ବା ଚୁଟିରେ ନଜର ଆସୁଛନ୍ତି ନବାଜ। କୁହାଯାଉଛି ଶ୍ରୀଦେବୀଙ୍କ ଲୋକପ୍ରିୟ ଗୀତ ‘ହବା ହବାଇ’ରୁ ଏହି ଲୁକ୍ ପ୍ରେରିତ ହୋଇଛି। ଫିଲ୍ମର ଏକ ଗୀତରେ ନବାଜ୍ ମୁଖ୍ୟ ଅଭିନେତ୍ରୀ ଅବନୀତ କୌରଙ୍କୁ ଅପହରଣକାରୀଙ୍କଠାରୁ ଉଦ୍ଧାର କରିବା ଲାଗି ଏଭଳି ରୂପରେ ଛଳ କରୁଛନ୍ତି। ଏହି ଲୁକ୍ ଲାଗି ମେକ୍ଅପ୍ ଏବଂ ଷ୍ଟାଇଲିଂ ଟିମ୍କୁ ଚାରି ଘଣ୍ଟା ସମୟ ଲାଗିଥିଲା।
କଙ୍ଗନାଙ୍କ ମଣିକର୍ନିକା ପ୍ରଯୋଜନା ସଂସ୍ଥା ଅଧୀନରେ ନିର୍ମାଣ ହେଉଛି ଏହି ଫିଲ୍ମ।ଏଥିରେ ଅବନୀତ ନିଜର ଡେବ୍ୟୁ କରିବେ। ନବାଜ୍ ଫିଲ୍ମରେ ଶେରୁ ଏବଂ ଅବନୀତ ଟିକୁ ଭୂମିକାରେ ନଜର ଆସିବେ। ଆମାଜନ ପ୍ରାଇମ୍ରେ ଏହା ରିଲିଜ ହେବ।