ମୁମ୍ବାଇ, ୧୮ା୧୦: ସୋସିଆଲ ମିଡିଆରେ ଏକ ଟୁଇଟ୍କୁ ନେଇ ଅଭିନେତ୍ରୀ କଙ୍ଗନା ରାଣାଓ୍ବତ୍ ଓ ତାଙ୍କ ଭଉଣୀ ରଙ୍ଗୋଲି ଚାଣ୍ଡେଲ ଫସିଯାଇଛନ୍ତି। ସେମାନଙ୍କ ଟୁଇଟ୍ ମାରାତ୍ମକ ଓ ଏହା ସ।ମ୍ପ୍ରଦାୟିକ ଭେଦଭାବ ସୃଷ୍ଟିକରିବ ବୋଲି ଅଭିଯୋଗ ହୋଇଥିଲା। ଏନେଇ କାଷ୍ଟିଂ ନିର୍ଦ୍ଦେଶକ ତଥା ଫିଟ୍ନେସ୍ ଟ୍ରେନର ମୁନ୍ନାଓ୍ବାରିଲି ସୟେଦ ଅଭିଯୋଗ ଆଣି ଏହାର ତଦନ୍ତ ଲାଗି ଦାବିକରିବା ପରେ ବାନ୍ଦ୍ରା କୋର୍ଟର ବିଚାରପତି ଜୟଦେଓ ଖୁଲେ ତୁରନ୍ତ କଙ୍ଗନା ଓ ରଙ୍ଗୋଲିଙ୍କ ବିରୋଧରେ ମାମଲା ରୁଜୁକରିବା ଲାଗି ନିର୍ଦ୍ଦେଶ ଦେଇଥିଲେ। କୋର୍ଟ ନିର୍ଦ୍ଦେଶ କ୍ରମେ ମୁମ୍ବାଇ ପୋଲିସ ଦୁଇ ଭଉଣୀଙ୍କ ବିରୋଧରେ ମାମଲା ରୁଜୁ କରିଛି। ପ୍ରକାଶଥାଉ କି, ଟୁଇଟ୍ରେ କଙ୍ଗନା ମୁମ୍ବାଇକୁ ପିଓକେ ସହ ତୁଳନା କରିଥିଲେ। କଙ୍ଗନାଙ୍କ ମୁମ୍ବାଇସ୍ଥିତ ଘର ଭଙ୍ଗାଯିବା ବେଳେ ବିଏମ୍ସି ସହ ତାଙ୍କ ସମ୍ପର୍କ ତିକ୍ତ ହୋଇପଡ଼ିଥିଲା। ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ କଙ୍ଗନା ଶିବସେନା ନେତୃତ୍ୱାଧୀନ ସରକାର ବିରୋଧରେ ମଧ୍ୟ ଟୁଇଟ୍ କରିଥିଲେ। ଏମିତିକି କୋର୍ଟରେ ମାମଲା ବିଚାରାଧୀନ ଥିବାବେଳେ ବି ସେ ସୋସିଆଲ ମିଡିଆରେ ଏନେଇ କିଛି ନା କିଛି ଲେଖୁଥିଲେ। କୃଷି ଆଇନ ସମ୍ପର୍କରେ ମଧ୍ୟ ସେ ଟୁଇଟ୍ କରି ସିଏଏ ବିରୋଧରେ ମିଥ୍ୟା ପ୍ରଚାର କରୁଥିବା ଲୋକ କୃଷି ଆଇନକୁ ବିରୋଧ କରି ମିଥ୍ୟା ପ୍ରଚାର ଚଳାଇଛନ୍ତି ବୋଲି ସେ ଉଲ୍ଲେଖ କରିଥିଲେ।
