ଅମୃତସର,୩।୧୨: ବିବାଦୀୟ ମନ୍ତବ୍ୟ ଦେଇ ଚର୍ଚ୍ଚାରେ ରହୁଥିବା ବଲିଉଡ୍ ଅଭିନେତ୍ରୀ କଙ୍ଗନା ରାଣାଓ୍ବତଙ୍କୁ ପଞ୍ଜାବର ଚାଷୀମାନେ ଶୁକ୍ରବାର ଘେରିଯାଇଥିଲେ। କଙ୍ଗନା କାର୍ରେ ଯାଉଥିବା ବେଳେ କୃଷକମାନେ କିରଟପୁର ସାହିବରେ କଳାପତାକା ଦେଖାଇ ତାଙ୍କ ବିରୋଧରେ ସ୍ଲୋଗାନ ଦେଇଥିଲେ। ଏପରି କି ଚାଷୀ ତାଙ୍କୁ ଅଟକାଇ କ୍ଷମା ମାଗିବାକୁ କହିଥିଲେ।
ଏନେଇ ଇନ୍ଷ୍ଟାଗ୍ରାମରେ ଏକ ଭିଡିଓ ପୋଷ୍ଟ କରି କଙ୍ଗନା କହିଛନ୍ତି, ସେ ଭିଡ଼ ଭିତରେ ଘେରିହୋଇ ରହିଛନ୍ତି। ଚାଷୀମାନେ ତାଙ୍କୁ ଦୁର୍ବ୍ୟବହାର କରିବା ସହ ହତ୍ୟା ଧମକ ଦେଇଛନ୍ତି। ପ୍ରକାଶ ଯେ, କେନ୍ଦ୍ରର କୃଷି ଆଇନ ପ୍ରତ୍ୟାହାର ଦାବିରେ ହଜାର ହଜାର କୃଷକ ଦିଲ୍ଲୀ ସୀମାରେ ଆନ୍ଦୋଳନ କରୁଥିବା ସମୟରେ ଭାଜପା ସମର୍ଥକ କଙ୍ଗନା ସେମାନଙ୍କୁ ‘ଖଲିସ୍ତାନୀ ଓ ଅସାମାଜିକ ତତ୍ତ୍ୱ’ ବୋଲି କହିଥିଲେ।