ଲକ୍ଷ୍ନୌ,୩୦।୧୨: ଉତ୍ତରପ୍ରଦେଶର କାନପୁରରୁ ଏକ ସମ୍ବେଦନଶୀଳ ମାମଲା ସାମ୍ନାକୁ ଆସିଛି। କାନପୁରରେ ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ଜଣେ ଯୁବକ ୧୪ ବର୍ଷ ବୟସ୍କା ନାବାଳକାଙ୍କୁ ବନ୍ଧକ ରଖି ଦୁଇମାସ ଧରି ଦୁଷ୍କର୍ମ କରିଥିବା ଜଣାପଡିଛି। ପୀଡିତା ଅଭିଯୋଗ କରିଛନ୍ତି ଯେ, ତାଙ୍କୁ ମାଂସ ଖାଇବାକୁ ଏବଂ ନମାଜ ପଢିବାକୁ ବାଧ୍ୟ କରାଯାଇଥିଲା। ତେବେ ବିରୋଧ କରିବାରେ ତାଙ୍କୁ ମାଡ ଦିଆଯାଉଥିଲା। ପୀଡିତା ଅନେକ ଥର ଖସିଯିବାକୁ ଚେଷ୍ଟା କରିଥିଲେ ହେଲେ ସେ ଧରାପଡିଯାଇଥିଲେ। ଏହି କାର୍ଯ୍ୟରେ ଅଭିଯୁକ୍ତର ପୁରା ପରିବାର ମଧ୍ୟ ଜଡିତ ଥିଲେ। ବିଶ୍ୱ ହିନ୍ଦୁ ପରିଷଦ ଏବଂ ବଜରଙ୍ଗ ଦଳ ପୀଡିତାଙ୍କୁ ମୁକ୍ତ କରିଛନ୍ତି। ସେପଟେ, ପୀଡିତାଙ୍କ ପିତାଙ୍କ ଅଭିଯୋଗରେ ଚକେରୀ ପୋଲିସ ଏଫଆଇଆର ରୁଜୁ କରିଛି।
ଚକେରୀ ପୋଲିସ ଷ୍ଟେଶନ ଅଞ୍ଚଳରେ ରହୁଥିବା ଜଣେ ଘରୋଇ କର୍ମଚାରୀଙ୍କ ୧୪ ବର୍ଷର ଝିଅ ଗତ ଦୁଇ ମାସ ହେବ ନିଖୋଜ ଥିଲେ। ନାବାଳିକା ତିନି ମାସ ପୂର୍ବରୁ ସୋସିଆଲ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମ ମାଧ୍ୟମରେ ଯୁବକଙ୍କ ସହ ବନ୍ଧୁତା କରିଥିଲେ। ଅଭିଯୁକ୍ତ ଯୁବକ କ୍ୟାଣ୍ଟସ୍ଥିତ ମୈକୁପୁରୱା ନିବାସୀ। ଅଭିଯୋଗ ହୋଇଛି ଯେ, ଯୁବକ ଜଣକ ନାବାଳିକାଙ୍କୁ ନିଜେ ସାଙ୍ଗରେ ନେଇ ଯାଇଥିଲେ। ବିଶ୍ୱ ହିନ୍ଦୁ ପରିଷଦର ଉପାଧ୍ୟକ୍ଷ ଆନନ୍ଦ ସିଂ କହିଛନ୍ତି ଯେ, ମୈକୁପୁରୱାଠାରେ ରହୁଥିବା ଜଣେ ଦୁର୍ଗା ବାହିନୀ କର୍ମଚାରୀ କହିଥିଲେ, ଏକ ନିର୍ଦ୍ଦିଷ୍ଟ ସମ୍ପ୍ରଦାୟର ଯୁବକ ଜଣେ ନାବାଳିକା ଆଣିଛନ୍ତି। ତାଙ୍କର ଗତିବିଧିକୁ ଦେଖିଲେ ସନ୍ଦେହଜନକ ଲାଗୁଥିଲା।
ସେ କହିଛନ୍ତି , ଏହି ସୂଚନା ଆଧାରରେ ସେ ଭିଏଚପି ଏବଂ ବଜରଙ୍ଗ ଦଳ କର୍ମୀଙ୍କ ସହ ଗୁରୁବାର ବିଳମ୍ବିତ ରାତିରେ ଯୁବକଙ୍କ ଘରେ ପହଞ୍ଚିଥିଲେ। ଘର ଭିତରେ ନାବାଳିକା ଜଣଙ୍କ ଥିବା ବେଳେ ଅଭିଯୁକ୍ତ ଯୁବକ ଏବଂ ତାଙ୍କ ପରିବାର ସଦସ୍ୟ ପଳାଇ ଯାଇଥିଲେ।