ବରଗଡ଼ ଅଫିସ୍,୧୧।୧୧:ବରଗଡ଼ ଧନୁଯାତ୍ରା ମହୋତ୍ସବ କଳାକାର ଚୟନ ପ୍ରକ୍ରିୟାର ଫଳାଫଳ ଗୁରୁବାର ପ୍ରକାଶ ପାଇଛି। ରାତି ପ୍ରାୟ ୧୧ଟାରେ ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋ ଫଳାଫଳ ଘୋଷଣା କରିଛନ୍ତି। ହୃଷୀକେଶ ଭୋଇ କଂସ ଚରିତ୍ର ପାଇଁ ମନୋନିତ ହୋଇଛନ୍ତି। ସେ ଏହାପୂର୍ବରୁ ୯ଥର ବରଗଡ଼ ଧନୁଯାତ୍ରା ମହୋତ୍ସବରେ କଂସ ଭୂମିକାରେ ଅଭିନୟ କରିଥିଲେ। ମାତ୍ର ଧର୍ମଶାଳା ମହୋତ୍ସବରେ କଂସ ଭୂମିକାରେ ଅଭିନୟ କରି ସେ ବିବାଦୀୟ ହୋଇ ପଡ଼ିଥିଲେ ଏବଂ ପରବର୍ତ୍ତୀ ଚୟନ ପ୍ରକ୍ରିୟାରୁ ବାଦ୍ ପଡ଼ିଥିଲେ। ସେହିପରି ଉଗ୍ରସେନ ଭୂମିକାରେ ଅଭିନୟ କରିଆସୁଥିବା ଆର୍ତ୍ତତ୍ରାଣ ମହାପାତ୍ରଙ୍କୁ ପୁଣି ଥରେ ସୁଯୋଗ ମିଳିଛି। ନାରଦ ଏବଂ ଅକ୍ରୂର ଭୂମିକାରେ ଜଗନ୍ନାଥ ସାହୁ ମନୋନିତ ହୋଇଛନ୍ତି। ସେ ଉଭୟ ଚରିତ୍ର ମଧ୍ୟରୁ ଯେଉଁ ଚରିତ୍ରକୁ ବାଛିବେ, ସେଥିପାଇଁ ତାଙ୍କୁ ସୁଯୋଗ ଦିଆଯିବ ବୋଲି ଫଳାଫଳ ଘୋଷଣାବେଳେ ଅତିରିକ୍ତ ଜିଲାପାଳ ଟପ୍ପୋ କହିଛନ୍ତି। ସେହିପରି ବସୁଦେବ ଚରିତ୍ର ପାଇଁ ମନୋଜ କୁମାର ସାହୁ ମନୋନିତ ହୋଇଥିବାବେଳେ ଦେବକୀ ଚରିତ୍ରରେ କନକ ଡନସନା ଚୌଧୁରୀ, ମୁଷ୍ଟିକ ଚରିତ୍ରରେ ସୂର୍ଯ୍ୟ ପ୍ରକାଶ କର୍ଣ୍ଣ, ଚାଣୁର ଚରିତ୍ରରେ ମୁନେଶ ଚାନ୍ଦ ଆଚାର୍ଯ୍ୟ, ସେନାପତି ଚରିତ୍ରରେ ଦୟାନନ୍ଦ ମାଝି, ସାର୍ତ୍ତକୀ ଚରିତ୍ରରେ ସେବାନନ୍ଦ ନାଏକ, ମହାମନ୍ତ୍ରୀ ଚରିତ୍ରରେ ଗୋଲାପ ଚନ୍ଦ୍ର ଦାଶ ମନୋନିତ ହୋଇଛନ୍ତି ।