ନୂଆଦିଲ୍ଲୀ,୧୩।୬: ବାବା କା ଢାବାର ମାଲିକ କାନ୍ତ ପ୍ରସାଦଙ୍କ ଭିଡିଓ ସୋସିଆଲ ମିଡିଆରେ ପୁଣି ଥରେ ଭାଇରାଲ ହେବାରେ ଲାଗିଛି। ଏହି ଭିଡିଓରେ କାନ୍ତ ପ୍ରସାଦ ଗତ ବର୍ଷ ଘଟିଥିବା ବିବାଦକୁ ସ୍ପଷ୍ଟ କରୁଥିବା ଦେଖାଯାଇଛି। ଏହି ଭିଡିଓରେ ବ୍ଲଗର୍ ଗୌରବ ଓ୍ବାସାନଙ୍କୁ କ୍ଷମା ମାଗୁଥିବା ନଜର ଆସିଛନ୍ତି। ଭିଡିଓରେ, ହାତ ଯୋଡି ସେ କହିଛନ୍ତି ଯେ, ସେ କେବେ ବି ଗୌରବଙ୍କୁ ଚୋର ବୋଲି କହି ନ ଥିଲେ। ସେ ସ୍ବୀକାର କରିଛନ୍ତି ଯେ, ସେ କିଛି ଭୁଲ କରିଛନ୍ତି ଏବଂ ଏଥିପାଇଁ ସେ ଲଜ୍ଜିତ ଓ କ୍ଷମା ପ୍ରାର୍ଥନା କରିଛନ୍ତି।
କାନ୍ତ ପ୍ରସାଦଙ୍କ କାହାଣୀ ଏକ ଚଳଚ୍ଚିତ୍ରଠାରୁ କମ ନୁହେଁ। ପ୍ରଥମ ଲକଡାଉନ ସମୟରେ ଯେତେବେଳେ ସୋସିଆଲ ମିଡିଆରେ ତାଙ୍କ ଆର୍ଥିକ ଅବସ୍ଥା ବିଷୟରେ ଚର୍ଚ୍ଚା ଆରମ୍ଭ ହେଲା, ସେତେବେଳେ ତାଙ୍କ ପାଇଁ ଅନେକ ସହାୟତାର ହାତ ବଢିଥିଲା। ଏସବୁ ଗୌରବଙ୍କ ଯୋଗୁ ସମ୍ଭବ ହୋଇଥିଲା। ଗୌରବ ହଁି ତାଙ୍କୁ ନିଜ ୟୁଟ୍ୟୁବ ମାଧ୍ୟମରେ ଲୋକଲୋଚନକୁ ଆଣିଥିଲେ। ଖୁବଶୀଘ୍ର, କାନ୍ତ ପ୍ରସାଦଙ୍କ ଦିନ ବଦଳିଗଲା ଏବଂ ସେ ସିଧାସଳଖ ଢାବାରୁ ରେଷ୍ଟୁରାଣ୍ଟ ଖୋଲିଥିଲେ। କିନ୍ତୁ ପରେ କାନ୍ତ ପ୍ରସାଦ ଗୌରବଙ୍କୁ ଚୋର ବୋଲି କହି ତାଙ୍କ ଟଙ୍କା ଚୋରି କରିଥିବା ଅଭିଯୋଗ କରିଥିଲେ। କରୋନାର ଦ୍ୱିତୀୟ ଲହରରେ ଲକ୍ଡାଉନ୍ ହେବାରୁ କାନ୍ତା ପ୍ରସାଦଙ୍କ ଆୟ ଅପେକ୍ଷା ଅଧିକ ବ୍ୟୟ ହେବାକୁ ଲାଗିଲା। ଏଭଳି ପରିସ୍ଥିତିରେ ସେ ନିଜ ପୁରୁଣା ଦୋକାନକୁ ଫେରିଲେ। କାନ୍ତ ପ୍ରସାଦ ଢାବା ଚଳାଇବା ଆରମ୍ଭ କରିସାରିଥିବାରୁ ସେ ଗୌରବଙ୍କୁ କ୍ଷମା ମାଗିଛନ୍ତି। ଏହି ଘଟଣାରେ ଏପର୍ଯ୍ୟନ୍ତ ଗୌରବଙ୍କ ପକ୍ଷରୁ କୌଣସି ପ୍ରତିକ୍ରିୟା ଆସିନାହିଁ।