କଣ୍ଟାବାଞ୍ଜି,୨୧ା।୧(ଡି.ଏନ.ଏ.): ବଲାଙ୍ଗୀର ଜିଲାପାଳ ଚଞ୍ଚଲ ରାଣା ସୋମବାର କଣ୍ଟାବାଞ୍ଜି ନିୟନ୍ତ୍ରିତ ବଜାର କମିଟି ମୁଖ୍ୟ ପ୍ରାଙ୍ଗଣରେ କପାମଣ୍ଡିର ଶୁଭ ଉଦ୍ଘାଟନ କରିଛନ୍ତି। ଏଠାରେ ସୋମବାର, ମଙ୍ଗଳବାର, ବୁଧବାର, ଗୁରୁବାର ଓ ଶୁକ୍ରବାର ଦିନ ମଣ୍ଡୀରେ କପା କ୍ରୟ କରାଯିବ। ଏହାସହିତ ଟିଟିଲାଗଡ଼ ଉପବଜାର ପ୍ରାଙ୍ଗଣରେ ମଙ୍ଗଳବାର, ଗୁରୁବାର ଓ ଶୁକ୍ରବାର କ୍ରୟ କରାଯିବ ବୋଲି ସୂଚନା ଦିଆଯାଇଥିଲା।
ଏହି ଅବସରରେ କଣ୍ଟାବାଞ୍ଜି ନିୟନ୍ତ୍ରିତ ବଜାର କମିଟି ଅଧୀନ ବିଭିନ୍ନ ମିଲର ମା’ ମଙ୍ଗଳା ଗିନିଙ୍ଗ ମିଲ, ଜୟ ଦୁର୍ଗା ଗିନିଙ୍ଗ ମିଲ, ଆଲିଶାନ ଗିନିଙ୍ଗ ମିଲ, ପ୍ରତିମା ଏଗ୍ରୋ ଏଣ୍ଡ ପେପର୍ସ କଟନ ପ୍ରାଇଭେଟ ଲିଃ, କଟନ କର୍ପୋରେଶନ ଅଫ ଇଣ୍ଡିଆର ମାଲିକ ଏବଂ ପ୍ରତିନିଧିମାନେ ଉପସ୍ଥିତ ଥିଲେ। ପରେ କଣ୍ଟାବାଞ୍ଜି ନିୟନ୍ତ୍ରିତ ବଜାର କମିଟି ପ୍ରାଙ୍ଗଣରେ ଜିଲାପାଳ କପା ବିକ୍ରୟ ଉପରେ ଚାଷୀ ଓ ମିଲରଙ୍କ ମଧ୍ୟରେ ଏକ ବୈଠକ ହୋଇଥିଲା। ସଭାରେ ସ୍ଥାନୀୟ ଆରଏମସି ସେକ୍ରେଟାରୀ ସରୋଜ କୁମାର ପ୍ରଧାନ, ଜିଲା ମୁଖ୍ୟ କୃଷି ଅଧିକାରୀ ବଲାଙ୍ଗୀର, ତୁରେକେଲା ବ୍ଲକ କୃଷି ଅଧିକାରୀ, ମୁରିବାହାଲ ବ୍ଲକ କୃଷି ଅଧିକାରୀଙ୍କ ସହ ଆରଏମସି ସୁପରଭାଇଜର ଶିବାନନ୍ଦ ଦାସ ଉପସ୍ଥିତ ଥିଲେ । ଚଳିତ ବର୍ଷ ସରକାରଙ୍କ ଦ୍ୱାରା ଏଫଏକ୍ୟୁ କପାର ମୂଲ୍ୟ ୬୩୮୦ଙ୍କା ଓ ୬୨୮୦ଙ୍କା ଧାର୍ଯ୍ୟ ହୋଇଛି। ସରକାରୀ ଧାର୍ଯ୍ୟ ମୂଲ୍ୟଠାରୁ ଖୋଲା ବଜାରରେ କୁଇଣ୍ଟାଲ ପିଛା ଦର ଅଧିକ ଥିବାରୁ ଚାଷୀ ମଣ୍ଡିକୁ କପା ନ ଆଣିବା ମୁଖ୍ୟ କାରଣ ବୋଲି ଚାଷୀମାନେ ବୈଠକରେ କହିଥିଲେ।