ଅହମଦାବାଦ,୧୯।୧୧: ବିଶ୍ୱକପର ଅନ୍ତିମ ମ୍ୟାଚ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଉଛି। ଅହମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଉଭୟ ଦଳ ମୁହାଁମୁହିଁ ହୋଇଛନ୍ତି। ଟସ ହରାଇବା ପରେ ଭାରତୀୟ ଦଳ ପ୍ରଥମେ ବ୍ୟାଟିଂ କରିଛି। ଏଥି ସହିତ ସୋସିଆଲ ମିଡିଆରେ ଏକ ଭିଡିଓ ବେଳକୁ ବେଳ ଭାଇରାଲ ହେବାରେ ଲାଗିଛି। ଏହି ଭିଡିଓରେ ଭାରତୀୟ ପୂର୍ବତନ ଅଧିନାୟକ କପିଲ ଦେବ କହୁଛନ୍ତି ଯେ ତାଙ୍କୁ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ହେଉଥିବା ବିଶ୍ୱକପ ଫାଇନାଲ ଦେଖିବାକୁ ନିମନ୍ତ୍ରଣ କରାଯାଇ ନାହିଁ। ବର୍ତ୍ତମାନ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଏହା ବ୍ୟତୀତ ସୋସିଆଲ ମିଡିଆ ୟୁଜର୍ସ କ୍ରମାଗତ ଭାବରେ କମେଣ୍ଟ ବକ୍ସରେ ନିଜର ମତାମତ ଦେଉଛନ୍ତି।
ସୂଚନାଯୋଗ୍ୟ, ଭାରତ-ଅଷ୍ଟ୍ରେଲିଆ ଫାଇନାଲ ପାଇଁ ପୂର୍ବତନ କ୍ରିକେଟରଙ୍କ ସମେତ ଅନେକ ବଡ ବ୍ୟକ୍ତିତ୍ୱଙ୍କୁ ନିମନ୍ତ୍ରଣ କରାଯାଇଥିଲା। ସଚିନ ତେନ୍ଦୁଲକର, ଶାହାରୁଖ ଖାଁ, ରଣବୀର ସିଂ, ଦୀପିକା ପାଦୁକୋନଙ୍କ ସମେତ ବହୁ ପ୍ରସିଦ୍ଧ ଚେହେରା ପଡ଼ିଆରେ ଟିମ ଇଣ୍ଡିଆ ପାଇଁ ଉତ୍ସାହିତ ଥିବା ଦେଖିବାକୁ ମିଳିଥିଲା, କିନ୍ତୁ ପୂର୍ବତନ କିମ୍ବଦନ୍ତୀ କପିଲ ଦେବ କହିଛନ୍ତି ଯେ ତାଙ୍କୁ ନିମନ୍ତ୍ରଣ କରାଯାଇ ନାହିଁ। ଏକ ଘରୋଇ ଟେଲିଭିଜନ ଚ୍ୟାନେଲକୁ ସେ ଏହା କହିଥିବା ଜଣାପଡିଛି।