ନୂଆଦିଲ୍ଲୀ,୧୮।୯: ଏଥର ଭାରତରେ ବିଶ୍ୱକପ୍ ୨୦୨୩ ଆୟୋଜିତ ହେବ। ଏହି ଟୁର୍ନାମେଣ୍ଟ ୫ ଅକ୍ଟୋବରରୁ ଆରମ୍ଭ ହେଉଥିବା ବେଳେ ଫାଇନାଲ ମ୍ୟାଚ ୧୯ ନଭେମ୍ବରରେ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯିବ। ଭାରତୀୟ ପ୍ରଶଂସକମାନେ ଆଶା କରୁଛନ୍ତି ଯେ ଟିମ ଇଣ୍ଡିଆ ନିଶ୍ଚିତ ଭାବରେ ୧୨ ବର୍ଷ ପରେ ବିଶ୍ୱକପ୍ ଟ୍ରଫି ଜିତିବାରେ ସଫଳ ହେବ। ତେବେ ପୂର୍ବତନ ଅଧିନାୟକ କପିଲ ଦେବ ବିଶ୍ୱକପ୍ରେ ଟିମ ଇଣ୍ଡିଆର ଜିତିବା ଆଶା ଉପରେ ନିଜର ମତ ରଖିଛନ୍ତି।
କପିଲ ଦେବ କହିଛନ୍ତି, ପ୍ରଥମେ ଆମର ପ୍ରାଥମିକତା ଟପ -୪ରେ ସ୍ଥାନ ପାଇବା ଉଚିତ୍। ବିଶ୍ୱକପ୍ ପରି ଏକ ବଡ଼ ଟୁର୍ନାମେଣ୍ଟରେ ଭାଗ୍ୟ ଆପଣଙ୍କ ସହ ରହିବା ଜରୁରୀ ଅଟେ। ତେବେ ଏହି ମୁହୂର୍ତ୍ତରେ ଆମେ କହିପାରିବା ଯେ ରୋହିତ ଶର୍ମାଙ୍କ ନେତୃତ୍ୱରେ ଭାରତୀୟ ଦଳ ବିଶ୍ୱକପ୍ ପାଇଁ ମଜବୁତ ପ୍ରତିଦ୍ୱନ୍ଦ୍ୱୀମାନଙ୍କ ମଧ୍ୟରୁ ଗୋଟିଏ। ଆମ ଦଳ ଭଲ ପ୍ରଦର୍ଶନ କରେ, ଏଥିରେ କୌଣସି ସନ୍ଦେହ ନାହିଁ । କିନ୍ତୁ ଏହି ମୁହୂର୍ତ୍ତରେ ହୃଦୟ ଅନ୍ୟ କିଛି କହୁଥିବାବେଳେ ମନ ଅନ୍ୟ କିଛି କହୁଛି। ମନ ଆମକୁ କହୁଛି ଯେ ଆମ ଦଳକୁ ବହୁତ କଠିନ ପରିଶ୍ରମ କରିବାକୁ ପଡିବ। ସେ ଆହୁରି ମଧ୍ୟ କହିଛନ୍ତି, ଆମ ଦଳକୁ ମୁଁ ଭଲ ଭାବେ ଜାଣିଛି। ଅନ୍ୟ ଦଳ ବିଷୟରେ ଅଧିକ ଜାଣେ ନାହିଁ ।