![](https://www.dharitri.com/wp-content/uploads/2023/11/Kapil-Sharma.jpg)
ମୁମ୍ବାଇ: କମେଡି କିଙ୍ଗ କପିଲ ଶର୍ମାଙ୍କ ବିମାନ ବୁଧବାର ବିଳମ୍ବ ହୋଇଥିଲା, ଯାହା ପରେ ସେ ଇଣ୍ଡିଗୋ ଏୟାରଲାଇନ୍ସ ଉପରେ ରାଗିଥିବା ଦେଖାଯାଇଛି। ଏହି ରାଗକୁ ନେଇ ସେ ସୋସିଆଲ ମିଡିଆରେ କହିଛନ୍ତି ଯେ ଅନ୍ୟ ଯାତ୍ରୀମାନଙ୍କ ସହିତ ସେ ପ୍ରାୟ ଏକ ଘଣ୍ଟା ଧରି ଟ୍ରାଞ୍ଜିଟ ବସରେ ଅଟକି ରହିଥିଲେ ଏବଂ ତାଙ୍କୁ ବିମାନ ସମ୍ପର୍କରେ କୌଣସି ଅପଡେଟ ଦିଆଯାଇନଥିଲା। କପିଲ କହିଛନ୍ତି ଯେ ତାଙ୍କୁ କେବଳ କୁହାଯାଇଥିଲା ଯେ ପାଇଲଟ ଟ୍ରାଫିକରେ ଅଟକି ରହିଛନ୍ତି।
ତାଙ୍କ ଏକ୍ସ ଆକାଉଣ୍ଟରେ ପୋଷ୍ଟ କରି କମେଡିଆନ ଲେଖିଛନ୍ତି, ଡିୟର ଇଣ୍ଡିଗୋ ଆପଣ ଆମକୁ ୫୦ ମିନିଟ ପର୍ଯ୍ୟନ୍ତ ବସରେ ଅପେକ୍ଷା କରାଇଲେ ଆଉ ଏବେ ଆପଣଙ୍କ ଟିମ କହୁଛନ୍ତି କି ପାଇଲଟ ଟ୍ରାଫିକରେ ଫସିଯାଇଛନ୍ତି। ଏହା କ’ଣ ସତ। ଆମେ ରାତି ୮ ଟା ସୁଦ୍ଧା ବିମାନ ଉଡ଼ାଣ କରିବାର ଥିଲା ଏବଂ ଏବେ ୯ଟା ୨୦ ହୋଇସାରିଲାଣି,ତଥାପି କକପିଟରେ କୌଣସି ପାଇଲଟ ନାହାଁନ୍ତି, ଆପଣ ଭାବୁଥିବେ କି ଏହି ୧୮୯ଯାତ୍ରୀ ପୁନର୍ବାର ଇଣ୍ଡିଗୋରେ ଉଡ଼ିବେ? କଦାପି # ଇଣ୍ଡିଗୋ 6E 5149 # ଲଜ୍ଜାଜନକ।
କମେଡିଆନ ଆହୁରି ଏକ ଅପଡେଟରେ ଲେଖିଛନ୍ତି – ‘ବର୍ତ୍ତମାନ ସେମାନେ ବିମାନରୁ ସମସ୍ତ ଯାତ୍ରୀଙ୍କୁ ଓହ୍ଲାଇ ଦେଇଛନ୍ତି ଏବଂ କହିଛନ୍ତି ଯେ ଆମେ ଆପଣଙ୍କୁ ଅନ୍ୟ ବିମାନକୁ ପଠାଇବୁ କିନ୍ତୁ ପୁନର୍ବାର ସୁରକ୍ଷା ଯାଞ୍ଚ ବା ସିକ୍ୟୁରିଟି ଚେକ ପାଇଁ ଟର୍ମିନାଲକୁ ଫେରିବାକୁ ପଡିବ।
ଏହା ପରେ କପିଲ ଶର୍ମା ଅନ୍ୟ ଏକ ପୋଷ୍ଟ କରି ଲେଖିଛନ୍ତି – ତୁମ ପାଇଁ ଲୋକମାନେ ସଂଘର୍ଷ କରୁଛନ୍ତି ଏବଂ ଇଣ୍ଡିଗୋ କେବଳ ମିଥ୍ୟା, ମିଥ୍ୟା ଏବଂ ମିଥ୍ୟା କହୁଛନ୍ତି। ହ୍ବିଲ ଚେୟାରରେ କେତେଜଣ ପୁରୁଣା ଯାତ୍ରୀ ଅଛନ୍ତି, ଯାହାର ସ୍ବାସ୍ଥ୍ୟ ଅବସ୍ଥା ଭଲ ନୁହେଁ । ଏହାକୁ ନେଇ ଲଜ୍ଜିତ ହେବା କଥା।