ମୋରଡ଼ା,୧୧।୬(ଡି.ଏନ.ଏ): ଲୁହରେ ଭିଜୁଛି ମୟୁରଭଞ୍ଜ ଜିଲା ମୋରଡା ବ୍ଲକ ଗଡିଆ ପଞ୍ଚାୟତର ପୁଟୁକିଶୋଳ ଗ୍ରାମ । ସାରା ଗାଁରେ ଶୋକାକୁଳ ହୋଇଯାଇଛି। ବାଲେଶ୍ୱର ଜିଲା ବାହନଗା ଷ୍ଟେସନରୁ ମାତ୍ର ଅଳ୍ପ କିଛି ଦୂରରେ ଘଟିଥିବା କରମଣ୍ଡଳ ଟ୍ରେନ ଦୁର୍ଘଟଣାରେ ମୋଟ ୨୮୮ ଜଣ ଯାତ୍ରୀଙ୍କ ମୃତ୍ୟୁ ଘଟିଥିବା ବେଳେ ମୋରଡା ବ୍ଲକର ଚାରିଜଣ ଯୁବକ କୀର୍ତନ ସି, ଭରତ ଦାସ, ବ୍ରହ୍ମାକାନ୍ତ ଦାସ ଓ ସତ୍ୟନାଥ ପାଟବନ୍ଧା ଉକ୍ତ ଟ୍ରେନରେ ଥିଲେ । ଏମାନଙ୍କ ମଧ୍ୟରୁ ୩ଜଣଙ୍କ ମୃତଦେହ ଗ୍ରାମରେ ପହଞ୍ଚିଥିବାବେଳେ ବ୍ରହ୍ମାକାନ୍ତଙ୍କ ମୃତଦେହ ଚି଼ହ୍ନଟରେ ବିଳମ୍ବ ହୋଇଛି। ତାଙ୍କ ମୃତଦେହ ଚିହ୍ନଟ ପାଇଁଁ ଡିଏନଏ ଟେଷ୍ଟ ରିପୋର୍ଟକୁ ଅପେକ୍ଷା କରିବାକୁ ପଡିଛି। ଫଳରେ ମୃତଦେହ ଘରକୁ ଆସିପାରିନାହିଁ ।
ତେବେ ଆଜି ଘଟଣା ଘଟିବାର ଦଶ ଦିନ ହୋଇଥିବାରୁ ଶୋକାକୁଳ ପରିବେଶରେ ପୁଟୁକିଶୋଳ ଗ୍ରାମରେ ଚାଲିଛି ଦଶାହ କ୍ରିୟାକର୍ମ । କୀର୍ତନ ସି ଏବଂ ସତ୍ୟନାଥ ପାଟବନ୍ଧାଙ୍କ ଦଶାହ କ୍ରିୟା ଆଜି ଚାଲିଥିବାବେଳେ ଭରତ ଦାସ ଏବଂ ବ୍ରହ୍ମାକାନ୍ତ ଦାସଙ୍କ ଦଶାହ କ୍ରିୟା ହୋଇପାରିନାହିଁ। ବ୍ରହ୍ମାକାନ୍ତଙ୍କ ମରଶରୀର ଘରେ ପହଞ୍ଚି ନ ଥିବାରୁ ତାଙ୍କ ଦାଦା ପୁଅ ସାନଭାଇ ଭରତ ଦାସଙ୍କର ମଧ୍ୟ କ୍ରିୟାକର୍ମ ହୋଇ ପାରିନାହିଁ।
ଏଠାରେ କହି ରଖୁଛୁ, କୀର୍ତନଙ୍କର ଗୋଟିଏ ନଅ ବର୍ଷର ଝିଅ ଏବଂ ଦେଢ଼ ବର୍ଷର ପୁଅ ଥିବା ବେଳେ ପାଠପଢା ସହାୟତା ପାଇଁ ସରକାରଙ୍କୁ ଗୁହାରୀ କରିଛନ୍ତି ବାପା ଅକ୍ଷୟ ।
ସେହିପରି ଭରତ ଦାସ ସ୍ବର୍ଗତ ଭାଗୀରଥି ଦାସଙ୍କ ଏକମାତ୍ର ରୋଜଗାରିଆ ପୁଅ ଥିବାବେଳେ ଏବେ କେମିତି ତାଙ୍କର ୫ବର୍ଷର ଝିଅ ଏବଂ ୯ମାସର ପୁଅକୁ ଲାଳନପାଳନ କରି ବଡ଼ କରିବେ କହିଛନ୍ତି ସ୍ତ୍ରୀ ସଙ୍ଗୀତା ଦାସ । ତେଣୁ ସେ ମଧ୍ୟ ପିଲାଙ୍କ ପାଠପଢା ସହାୟତା ପାଇଁ ସରକାରଙ୍କୁ ଗୁହାରୀ କରିଛନ୍ତି।
ବ୍ରହ୍ମାକାନ୍ତ ଦାସଙ୍କ ମୃତଦେହ ଚି଼ହ୍ନଟ ପାଇଁ ଡିଏନଏ ଟେଷ୍ଟ ରିପୋର୍ଟକୁ ଅପେକ୍ଷା କରିଥିବାରୁ ଏଯାଏଁ ତାଙ୍କ ପରିବାରକୁ ଆର୍ଥିକ ସହାୟତା ମିଳିପାରିନାହିଁ ବୋଲି କହିଛନ୍ତି ତାଙ୍କ ସ୍ତ୍ରୀ ମିନା ଦାସ । ଜଣଙ୍କ ରୋଜଗାରରେ ଘର ସମ୍ପୂର୍ଣ ରୂପେ ଚଳୁଥିବା ବେଳେ ବ୍ରହ୍ମାକାନ୍ତଙ୍କ ଯିବା ପରେ ସ୍ତ୍ରୀ, ୨ପୁଅ ଏବେ ଅସହାୟ ପାଲଟିଯାଇଛନ୍ତି ।
ତେବେ କୀର୍ତନ ସିଙ୍କ ପରିବାରକୁ ଛାଡି ଦେଲେ ଅନ୍ୟ ୩ଜଣଙ୍କ ପରିବାର ଲୋକେ ଭଙ୍ଗା କୁଡ଼ିଆ ଛପର ଘରେ ରହୁଛନ୍ତି। ତେଣୁ ଏମାନଙ୍କୁ ଯଥାଶୀଘ୍ର ପ୍ରଶାସନ ଏଦିଗରେ ଦୃଷ୍ଟି ଦେଇ ସରକାରୀ ଯୋଜନାରେ ପକ୍କାଘର ମିଳୁବୋଲି ଗ୍ରାମବାସୀ ଦାବି କରିଛନ୍ତି।