ବମ୍ବେ: ବଲିଉଡ ଅଭିନେତା କାର୍ତ୍ତିକ ଆର୍ୟନ ଆଜି ନିଜର ଜନ୍ମଦିନ ପାଳନ କରୁଛନ୍ତି। ଏହି ଖାସ୍ ଦିନରେ ତାଙ୍କର ଅପ୍କମିଂ ଫିଲ୍ମକୁ ନେଇ ବଡ଼ ଘୋଷଣା କରାଯାଇଛି, ଯାହାକି ଅନେକଙ୍କୁ ଚକିତ କରିଛି। କାରଣ ବଲିଉଡର ଲୋକପ୍ରିୟ ନିର୍ଦ୍ଦେଶକ କରନ ଜୋହର ସମସ୍ତ ବାଦ ବିବାଦ ଭୁଲି କାର୍ତ୍ତିକଙ୍କ ସହ ଫିଲ୍ମ କରିବାକୁ ହାତ ମିଶାଇଛନ୍ତି। କରନ୍ ସୋସିଆଲ ମିଡିଆରେ ଏକ ପୋଷ୍ଟ କରି ଏନେଇ ଜଣାଇଛନ୍ତି।
ଆଜିର ଦିନକୁ ଏକ ସ୍ବତନ୍ତ୍ର ଖବର ସହ ଆରମ୍ଭ କରିବା। କାର୍ତ୍ତିକଙ୍କ ସହ ଏହି ଫିଲ୍ମରେ କାମ କରିବା ଲାଗି ସେ ବହୁତ ଉତ୍ସାହିତ। ତେବେ କାର୍ତ୍ତିକଙ୍କୁ ଜନ୍ମଦିନର ଅନେକ ଅନେକ ଶୁଭେଚ୍ଛା ବୋଲି ସେ କହିଛନ୍ତି।
ଫିଲ୍ମଟି କରନ୍ଙ୍କ ବ୍ୟାନରରେ ନିର୍ମାଣ କରାଯିବ। ଏହାର ନିର୍ଦ୍ଦେଶନା ସନ୍ଦୀପ ମୋଦି କରିବେ। ଫିଲ୍ମକୁ ହୀରୁ ୟଶ ଜୋହର, କରନ ଜୋହର, ଅପୂର୍ବା ମେହେଟ୍ଟା, ଶୋଭା କପୁର ଏବଂ ଏକତା କପୁର ମିଶି ପ୍ରଯୋଜନା କରିବେ। ଫିଲ୍ମର କାହାଣୀଟିକୁ ଅସୀମ ଅରୋରା ଲେଖିଛନ୍ତି। ତେବେ ‘ଚନ୍ଦୁ ଚାମ୍ପିୟନ’ର ଶୁଟିଂ ଶେଷ କରିବା ପରେ କାର୍ତ୍ତିକ ଏହି ଫିଲ୍ମରେ କାମ କରିବେ। ଏହାଛଡ଼ା ଅଭିନେତାଙ୍କ ହାତରେ ‘ଭୁଲ ଭୁଲୈୟା ୩’, ‘ଆଶିକି ୩’, ‘ପତି ପତ୍ନୀ ଔର ବୋ ୨’ ଆଦି ଫିଲ୍ମ ରହିଛି।