ତରବୋଡ/ନୂଆପଡ଼ା ଅଫିସ,୧୪।୧: ନୂଆପଡ଼ା ଜିଲା କୋମନା ବନାଞ୍ଚଳ ସିଆଲଟି ପଞ୍ଚାୟତ ବାଗମୁଣ୍ଡା ଗାଁ ନିକଟସ୍ଥ କରଙ୍ଗାସାଗର ଜଙ୍ଗଲରେ ୨ଟି କଲରାପତରିଆ ବାଘ ଦେଖିବାକୁ ମିଳିଛି। ଗତ ସପ୍ତାହରେ କୋମନା ବନାଞ୍ଚଳ ଅଧୀନ ଭରୁଆମୁଣ୍ଡା ଗ୍ରାମରେ ବାଘ ଆତଙ୍କ ଦେଖାଦେଇଥିଲା। ଗୁରୁବାର ସକାଳେ ବାଗମୁଣ୍ଡା ଗାଁର ମହେନ୍ଦ୍ର ମଟାରୀ ଜମିକୁ ଚଣା ଓ ପନିପରିବା ଚାଷ ଜଗିବା ପାଇଁ ଯାଇଥିଲେ। ସେହି ସମୟରେ ସେ ୨ଟି କଲରାପତରିଆ ବାଘକୁ ଦେଖି ଲୋକଙ୍କୁ ଫୋନ କରି ଜଣାଇଥିଲେ। ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ବାଘକୁ ଦେଖି କୋମନା ବନ ବିଭାଗକୁ ଖବର ଦେଇଥିଲେ। କୋମନା ବନ ବିଭାଗ ରେଞ୍ଜର ଜଗଦୀଶ ଦୁରିଆଙ୍କ ସହ ବନ କର୍ମଚାରୀ ବାଗମୁଣ୍ଡା ଗାଁରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ। ଏପରି କି ବାଗମୁଣ୍ଡା, କରଙ୍ଗାଭଟା, ଭାଲୁକୋନା, ସିଆଲଟି, ଦିଆମୁଣ୍ଡା ଗ୍ରାମବାସୀଙ୍କୁ ସଚେତନ ରହିବାକୁ ପରାମର୍ଷ ଦେଇଥିଲେ। ଏପରି କି ଡାକବାଜି ଯନ୍ତ୍ର ଯୋଗେ ଲୋକଙ୍କୁ ସନ୍ଧ୍ୟା ହେଲେ ଘରୁ ନ ବାହାରିବାକୁ କୁହାଯାଇଛି। ବାଘଟି ସୁନାବେଡା ଅଭୟାରଣ୍ୟ ଗୋଡାପାହାଡ କାକେରମେଞ୍ଜ ଘାଟି ଦେଇ ବାଗମୁଣ୍ଡା ଗାଁକୁ ପ୍ରବେଶ କରିଥିବା ଅନୁମାନ କରାଯାଉଛି। ଜନସାଧାରଣ ଭୟଭିତ ନ ହୋଇ ସତର୍କ ରୁହନ୍ତୁ ବୋଲି କୋମନା ବନାଞ୍ଚଳ ରେଞ୍ଜର ଦୁରିଆ କହିଛନ୍ତି।