ବେଙ୍ଗାଲୁରୁ,୨୯।୯: କାବେରୀ ଜଳ ବିବାଦକୁ ନେଇ କର୍ନାଟକ ଏବଂ ତାମିଲନାଡୁ ମଧ୍ୟରେ ବିବାଦ କ୍ରମାଗତ ଭାବେ ବୃଦ୍ଧି ପାଉଛି। ଏଥି ସହିତ ଶୁକ୍ରବାର ଅନେକ ସଂଗଠନ କର୍ନାଟକରେ ଏକ ବନ୍ଦ ଡାକରା ଦେଇଛନ୍ତ, ଯେଉଁଥିରେ ବିଭିନ୍ନ ସଂଗଠନ ରାସ୍ତାରେ ବିରୋଧ କରୁଛନ୍ତି। ବିକ୍ଷୋଭ ସମୟରେ ପୋଲିସ ଅନେକ ଲୋକଙ୍କୁ ଅଟକ ରଖିଥିବା ସୂଚନା ମିଳିଛି।
କାବେରୀ ଜଳ ବିବାଦକୁ ନେଇ ବିଭିନ୍ନ କୃଷକ ସଂଗଠନ ପକ୍ଷରୁ ‘କର୍ନାଟକ ବନ୍ଦ’ ଡାକରା ଦିଆଯାଇଛି। ଏହି ବନ୍ଦକୁ ଦୃଷ୍ଟିରେ ରଖି ରାଜ୍ୟର ପ୍ରାୟ ସମସ୍ତ ସ୍କୁଲ ଏବଂ କଲେଜ ଶନିବାର ବନ୍ଦ ରହିବ।
ଏଥି ସହିତ କର୍ନାଟକ ବନ୍ଦ ସମୟରେ ଅନେକ ସଂଗଠନ କ୍ରମାଗତ ଭାବରେ ବିରୋଧ କରୁଛନ୍ତି। କବେରୀ ଜଳ ବାଣ୍ଟିବା ପ୍ରସଙ୍ଗରେ ବେଙ୍ଗାଲୁରୁର ଫ୍ରିଡମ ପାର୍କରେ ପ୍ରୋ-କନ୍ନଡ ସଂଗଠନ ବିରୋଧ କରିଥିଲେ। ପୋଲିସ ପ୍ରଶାସନ ମଧ୍ୟ ଘଟଣାସ୍ଥଳରେ ଉପସ୍ଥିତ ଅଛନ୍ତି।
କର୍ନାଟକ ବନ୍ଦ ଯୋଗୁଁ କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରୁ ଆସିବାକୁ ଥିବା ୨୨ଟି ବିମାନ ଓ ଯିବାକୁ ଥିବା ୨୨ଟି ବିମାନର ଉଡ଼ାଣ ବାତିଲ କରାଯାଇଛି।
ବିମାନବନ୍ଦର ଅଧିକାରୀଙ୍କ କହିବାନୁସାରେ, କାର୍ଯ୍ୟକ୍ଷମ ସମସ୍ୟା ଯୋଗୁଁ ୪୪ ବିମାନକୁ ବାତିଲ କରାଯାଇଛି ଏବଂ ଯାତ୍ରୀମାନଙ୍କୁ ଏ ବିଷୟରେ ପୂର୍ବରୁ ସୂଚନା ଦିଆଯାଇଥିଲା।
ଏହି ସମୟରେ ତାମିଲନାଡୁର ତ୍ରିଚିରେ କୃଷକ ସଙ୍ଗଠନ କାବେରୀ ଜଳ ମଧ୍ୟରେ ଠିଆ ହୋଇ ବିରୋଧ ପ୍ରଦର୍ଶନ କରିଛନ୍ତି। ଏହି କୃଷକମାନେ ତାମିଲନାଡୁକୁ କାବେରୀ ଜଳ ଛାଡିବାକୁ ଦାବି କରୁଛନ୍ତି।
