ବେଙ୍ଗାଲୁରୁ,୨୯।୩: କର୍ନାଟକରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା ହୋଇଛି। ପ୍ରଥମଥର ପାଇଁ କର୍ନାଟକ ବିଧାନସଭାର ସମସ୍ତ ଆସନରେ ଆମ୍ ଆଦ୍ମୀ ପାର୍ଟି ପ୍ରାର୍ଥୀ ଦେବ ବୋଲି ଦଳର ସଭାପତି ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି।
ଏଥର ଆମେ କର୍ନାଟକର ସମସ୍ତ ଆସନରେ ପ୍ରାର୍ଥୀ ଦେବୁ। ଆଶା କରେ ଫଳାଫଳ ଭଲ ହେବ। ଯେଉଁଠାରେ ଭାଜପା ସରକାର ଅଛି, ସେମାନେ ଅନେକ ପ୍ରତିଶ୍ରୁତି ଦିଅନ୍ତି। କିନ୍ତୁ ତାହା କାର୍ଯ୍ୟକାରୀ କରନ୍ତି ନାହିଁ। ଆମେ ଦେଇଥିବା ପ୍ରତିଜ୍ଞା ପୂରଣ କରୁ ବୋଲି କେଜ୍ରିୱାଲ କହିଛନ୍ତି।
ସୂଚନାଯୋଗ୍ୟ, କର୍ନାଟକରେ ବିଧାନସଭା ନିର୍ବାଚନ ମେ ୧୦ରେ ଗୋଟିଏ ପର୍ଯ୍ୟାୟରେ ହେବ ଏବଂ ଫଳାଫଳ ମେ ୧୩ରେ ଘୋଷଣା କରାଯିବ। କର୍ନାଟକରେ ୨୨୪ ସଦସ୍ୟ ବିଶିଷ୍ଟ ବିଧାନସଭା ଅଛି। ବର୍ତ୍ତମାନ ଭାଜପା ପାଖରେ ୧୧୯ଟି ଆସନ ଥିବାବେଳେ କଂଗ୍ରେସରେ ୭୫ଟି ଆସନ ରହିଛି। ଦୁଇଟି ଆସନ ଖାଲି ଥିବାବେଳେ ଜେଡି (ଏସ) ର ୨୮ ଜଣ ବିଧାୟକ ଅଛନ୍ତି।
ନିର୍ବାଚନ ପାଇଁ ବିଜ୍ଞପ୍ତି ଏପ୍ରିଲ ୧୩ରେ ପ୍ରକାଶ କରାଯିବ। ନାମାଙ୍କନପତ୍ର ଦାଖଲ କରିବାର ଶେଷ ତାରିଖ ୧୦ ଏପ୍ରିଲ ରହିଛି। ନାମାଙ୍କନପତ୍ରର ଯାଞ୍ଚ ଏପ୍ରିଲ ୨୧ରେ ହେବ ଏବଂ ନାମାଙ୍କନ ପ୍ରତ୍ୟାହାରର ଶେଷ ତାରିଖ ୨୪ ଏପ୍ରିଲ ହେବ।
