ବେଙ୍ଗାଲୁରୁ,୨୦।୩: ଚଳିତ ବର୍ଷ ମେ’ରେ କର୍ନାଟକରେ ୨୨୪ଟି ବିଧାନସଭା ଆସନ ପାଇଁ ନିର୍ବାଚନ ଅନୁଷ୍ଠିତ ହେବ। ନିର୍ବାଚନ ପାଇଁ ବିଭିନ୍ନ ଦଳ ଅଣ୍ଟା ଭିଡ଼ିଥିବା ବେଳେ ଭୋଟରଙ୍କୁ ଆକୃଷ୍ଟ କରିବା ପାଇଁ ନୂଆ ନୂଆ ଯୋଜନା ଘୋଷଣା କରୁଛନ୍ତି। ଇତିମଧ୍ୟରେ ଆମ ଆଦମୀ ପାର୍ଟି(ଏଏପି) ସୋମବାର କର୍ନାଟକ ବିଧାନସଭା ନିର୍ବାଚନ ପାଇଁ ନିଜ ପ୍ରାର୍ଥୀଙ୍କ ପ୍ରଥମ ତାଲିକା ଜାରି କରିଛି। ୨୨୪ଟି ବିଧାନସଭା ଆସନରୁ ଏଏପି ପ୍ରଥମ ତାଲିକାରେ ୮୦ଜଣ ପ୍ରାର୍ଥୀଙ୍କୁ ବିଧାନସଭା ଟିକେଟ ଦେଇଛି। କର୍ନାଟକର ସମସ୍ତ ୨୨୪ ବିଧାନସଭା ନିର୍ବାଚନମଣ୍ଡଳୀରେ ଏଏପି ପ୍ରାର୍ଥୀ ଦେବ ବୋଲିି ଦଳ କହିଛି। ଏଏପିର ପ୍ରଥମ ତାଲିକାରେ ସୁପ୍ରିମକୋର୍ଟର ଓକିଲ ବ୍ରିଜେଶ କଲପ୍ପାଙ୍କୁ ଚିକପେଟ ବିଧାନସଭା ଆସନରୁ ଟିକେଟ ଦିଆଯାଇଛି। ସୋମବାର ଏକ ଖବରଦାତା ସମ୍ମିଳନୀକୁ ସମ୍ବୋଧିତ କରି ଦଳର ରାଜ୍ୟ ମୁଖ୍ୟ ପୃଥ୍ବୀ ରେଡ୍ଡୀ ଏନେଇ ଘୋଷଣା କରିିଛନ୍ତି। ସେ କହିଛନ୍ତି, ସର୍ଭେ ପରେ ହିଁ ପ୍ରାର୍ଥୀ ଚୟନ କରାଯାଇଥିବା ବେଳେ ୬୯ଜଣ ପ୍ରାର୍ଥୀ ନୂଆ ଚେହେରା ରହିଛନ୍ତି। ଏହି ତାଲିକାରେ ଯୁବକ, ମହିଳା, କୃଷକ ଏବଂ ବିଭିନ୍ନ ବର୍ଗର ବ୍ୟକ୍ତି ଅନ୍ତର୍ଭୁକ୍ତ। ଆମର ତାଲିକାରେ ବହୁତ ଶିକ୍ଷିତ ବ୍ୟକ୍ତି ଅଛନ୍ତି। ଆମର ପ୍ରଥମ ତାଲିକାରେ ୧୩ ଜଣ ଆଇନଜୀବୀ, ୩ଜଣ ଡାକ୍ତର ଏବଂ ୪ଜଣ ଆଇଟି ପ୍ରଫେସନାଲ ଅଛନ୍ତି ବୋଲି ଏଏପି ନେତା କହିଛନ୍ତି।
