ବେଙ୍ଗାଲୁରୁ,୧୫।୪-କର୍ନାଟକ ବିଧାନସଭା ନିର୍ବାଚନ ପାଇଁ ୪୩ ପ୍ରାର୍ଥୀଙ୍କ ତୃତୀୟ ତାଲିକା କଂଗ୍ରେସ ଜାରି କରିଛି। କିଛିଦିନ ପୂର୍ବରୁ ଭାଜପା ଛାଡ଼ି କଂଗ୍ରେସରେ ଯୋଗଦେଇଥିବା ପୂର୍ବତନ ଉପ ମୁଖ୍ୟମନ୍ତ୍ରୀ ଲକ୍ଷ୍ମଣ ସାବାଡି ଆଥାନି ଆସନରୁ ଟିକେଟ ପାଇଛନ୍ତି। କୋଥୁର ଜି ମଞ୍ଜୁନାଥଙ୍କୁ କୋଲାର ସିଟ୍ ଦିଆଯାଇଛି। କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ତଥା କଂଗ୍ରେସ ନେତା ସିଦ୍ଧରମେୟା ଭରୁନ ନିର୍ବାଚନମଣ୍ଡଳୀରୁ ଆଗାମୀ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ।
କର୍ନାଟକ ବିଧାନସଭାରେ ମୋଟ ୨୨୪ଟି ଆସନ ଅଛି। ତୃତୀୟ ତାଲିକା ସହିତ କଂଗ୍ରେସ ବର୍ତ୍ତମାନ ମୋଟ ୨୦୯ ପ୍ରାର୍ଥୀଙ୍କ ନାମ ଘୋଷଣା କରିଛି। କର୍ନାଟକ କଂଗ୍ରେସ ସଭାପତି ଡି.କେ ଶିବକୁମାର କନକପୁରା ଆସନରୁ ପ୍ରତିଦ୍ୱନ୍ଦ୍ୱିତା କରୁଥିବାବେଳେ କଂଗ୍ରେସ ସଭାପତି ମଲ୍ଲିକାର୍ଜୁନ ଖାର୍ଗେଙ୍କ ପୁଅ ପ୍ରିୟାଙ୍କ ଖାର୍ଗେ କାଲାବୁରାଗୀ ଅଞ୍ଚଳର ଚିତାପୁର ଆସନରୁ ଲଢ଼ିବେ। କଂଗ୍ରେସର ପୂର୍ବତନ ଏମ୍ପି ଏଚ୍. ମୁନିୟାପ୍ପାଙ୍କୁ ଦେବନହଲ୍ଲୀ ଆସନ ଲାଗି ଟିକେଟ ଦିଆଯାଇଛି।
ମେ’ ୧୦ରେ କର୍ନାଟକ ବିଧାନସଭା ନିର୍ବାଚନ ହେବ। ସେହିମାସ ୧୩ରେ ଫଳାଫଳ ଘୋଷଣା କରାଯିବ।