ମୁମ୍ବାଇ,୧୯।୧୨: ମହାରାଷ୍ଟ୍ର-କର୍ନାଟକ ମଧ୍ୟରେ ବେଲାଗାଭିକୁ ନେଇ ବିବାଦ ସୋମବାର ତେଜିବାରେ ଲାଗିଛି। ସୀମାରେ ଦୁଇ ପକ୍ଷ ମଧ୍ୟରେ ମୁହାଁମୁହିଁ ପରିସ୍ଥିତି ଉପୁଜିବା ସହ ଉତ୍ତେଜନା ଦେଖାଦେଇଛି। ଉଭୟ ରାଜ୍ୟ ବେଲାଗାଭିକୁ ନିଜ ଅଞ୍ଚଳ ଭାବେ ଦାବି କରି ଆସୁଛନ୍ତି। ଏଭଳି ସ୍ଥିତିରେ ମହାରାଷ୍ଟ୍ରର କଂଗ୍ରେସ, ଏନ୍ସିପି ଏବଂ ଶିବସେନା ମିଳିତ ଭାବେ ସୋମବାର ଆନ୍ଦୋଳନକୁ ଜୋରଦାର କରିଛନ୍ତି। ୩୦୦ କର୍ମକର୍ତ୍ତା ବିଭିନ୍ନ ନାରାବାଜି କରିବା ସହ ସୀମା ଅତିକ୍ରମ କରିବାକୁ ଚେଷ୍ଟା କରିଥିଲେ। ସେହି ସମୟରେ କର୍ନାଟକ ପୋଲିସ ଆନ୍ଦୋନଳକାରୀଙ୍କୁ ଅଟକାଇ ବୁଝାଶୁଝା କରିବାକୁ ଚେଷ୍ଟା କରିଥିଲା। ଏପରିକି ପୋଲିସ କେତେକ ଆନ୍ଦେଳନକାରୀଙ୍କୁ ହେପାଜତକୁ ନେଇ ଅଟକ ରଖିଥିବା ଜଣାପଡିଛି। ସୀମାରେ ତେଜିଥିବା ଏହି ବିବାଦ ପାଇଁ ମହାରାଷ୍ଟ୍ର କଂଗ୍ରେସ ସଭାପତି ନାନା ପାଟୋଲ କେନ୍ଦ୍ର ସରକାରଙ୍କୁ ଦାୟୀ କରିଛନ୍ତି।
ଦୀର୍ଘ ଦଶନ୍ଧି ଧରି ଚାଲିଥିବା ରାଜ୍ୟ ସୀମା ବିବାଦକୁ ନେଇ ସୁପ୍ରିମକୋର୍ଟରେ ମାମଲା ଚାଲିଛି। ସୁପ୍ରମକୋର୍ଟର ରାୟ ନ ଆସିବା ଯାଏ କେହି ଉକ୍ତ ଅଞ୍ଚଳକୁ କୌଣସି ଦାବି କରିପାରିବେ ନାହିଁ ବୋଲି କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଗତ ସପ୍ତାହରେ ଦୁଇ ନେତାଙ୍କ ସହ ଆଲୋଚନା ପରେ କହିଥିଲେ।
ଅନ୍ୟପକ୍ଷେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଏହି ପ୍ରସଙ୍ଗ ମହାରାଷ୍ଟ୍ରର ଗର୍ବ। ତେଣୁ ରାଜ୍ୟ ଦୃଢ଼ ଆଭିମୁଖ୍ୟ ଗ୍ରହଣ କରିଛି ବୋଲି ସେ କହିଛନ୍ତି। ସ୍ବରାଷ୍ଟ୍ରମନ୍ତ୍ରୀ ନିଜେ ଗଣମାଧ୍ୟମକୁ ଏହି ବିଷୟରେ ସୂଚନା ଦେଇଛନ୍ତି। ଏହାକୁ ନେଇ କୌଣସି ରାଜନୀତି ହେବା ଉଚିତ ନୁହେଁ ବୋଲି ଶିନ୍ଦେ ଟୁଇଟ କରି କହିଛନ୍ତି।