ବେଙ୍ଗାଲୁରୁ,୧୧।୮: କର୍ନାଟକର କେତେକ ସ୍ଥାନରେ ଦିବ୍ୟାଙ୍ଗ ଶିଶୁଙ୍କୁ ସୁସ୍ଥ କରିବା ପାଇଁ ବେକ ପର୍ଯ୍ୟନ୍ତ ଏକ ଗାତରେ ପୋତିଦିଆଯିବା ନେଇ ଏକ ପ୍ରଥା ରହିଛି। ଯାହାକୁ ନେଇ ଜାତୀୟ ମାନବ ଅଧିକାର ଆୟୋଗ (NHRC) ରାଜ୍ୟ ସରକାରଙ୍କୁ ସୋମବାର ଏକ ନୋଟିସ ଜାରି କରଛନ୍ତି। ଆୟୋଗ ଉକ୍ତ ନୋଟିସରେ ଉଲ୍ଲେଖ କରିଛନ୍ତି ଯେ, ଏହି ପ୍ରଥା ଦ୍ୱାରା ଗରିବ ପିଲାମାନଙ୍କ ପ୍ରତି ଅଜବ, ଅନୈତିକ ଓ ନିଷ୍ଠୁର କାର୍ଯ୍ୟ କରାଯାଉଛି। ସେମାନଙ୍କୁ ବିଶ୍ୱାସ ନାମରେ ଅମାନୁଷିକ ବ୍ୟବହାର କରାଯାଉଛି ବୋଲି ଏନଏଚଆରସି ପକ୍ଷରୁ କୁହାଯାଇଛି। ସୂଚାଯୋଗ୍ୟ, ଗତ କିଛି ଦିନ ତଳେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହୋଇଥିଲା। ଯେଉଁଥିରେ କିଛି ଦିବ୍ୟାଙ୍ଗ ପିଲାଙ୍କୁ ସୁସ୍ଥ କରିବା ପାଇଁ ଏକ ଗାତରେ ପୋତାଯାଇଥିବା ଦେଖିବାକୁ ମିଳିଥିଲା। କର୍ନାଟକର କୁଲବର୍ଗିରେ ସୂର୍ଯ୍ୟ ଗ୍ରହଣ ସମୟରେ ଭିନ୍ନକ୍ଷମ ପିଲାମାନଙ୍କୁ ବେକ ପର୍ଯ୍ୟନ୍ତ ଏକ ଗାତରେ ପୋତି ଦିଆଯିବାର ପ୍ରଥା ରହିଛି। ଯାହାଦ୍ୱାରା ସେମାନେ ସୁସ୍ଥ ହୋଇଯାଆନ୍ତି ବୋଲି ବିଶ୍ୱାସ ରହିଛି। ବିଶେଷ କରି ଏହି ପ୍ରଥା ରାଜ୍ୟର ୩ଟି ଗାଁରେ ରହିଛି। ଯଥା କୁଲବର୍ଗୀ କସବେର ତାଜ ସୁଲତାନପୁର, ଚିଞ୍ଚୋଲି ତହସିଲର ଏନୋଲି ଓ ଗଡ଼ି-ଲିଙ୍ଗଡାଲ୍ଲୀ ଗାଁରେ ରହିଛି। ତେବେ ଏହି ଘଟଣା ସର୍ବସମ୍ମୁଖକୁ ଆସିବା ପରେ ଏନଅଚଆରସି ପକ୍ଷରୁ କାର୍ଯ୍ୟାନୁଷ୍ଠାନ ନିଆଯାଇଛି। ଏଥିସହ ଏହି ମାମଲାରେ ମୁଖ୍ୟ ଶାସନ ସଚିବଙ୍କ ମାଧ୍ୟମରେ ଆୟୋଗ କର୍ନାଟକ ସରକାରଙ୍କୁ ନୋଟିସ ଜାରି କରି ବିସ୍ତୃତ ରିପୋର୍ଟ ମାଗିଛନ୍ତି।