ବେଙ୍ଗାଲୁରୁ, ୯ା୫: କର୍ନାଟକର ୨୨୪ ଆସନ ବିଶିଷ୍ଟ ବିଧାନସଭା ନିର୍ବାଚନ ଲାଗି ବୁଧବାର ମତଦାନ ହେବାକୁ ଥିବାବେଳେ ପ୍ରଚାର ଶେଷ ହୋଇଛି। ଶେଷ ଦିନରେ ସବୁ ଦଳ ପକ୍ଷରୁ ଜୋର୍ଦାର ପ୍ରଚାର କରାଯାଇଥିଲା। ବୁଧବାର ଭୋଟରମାନେ ପ୍ରାର୍ଥୀମାନଙ୍କ ଭାଗ୍ୟ ନିର୍ଦ୍ଧାରଣ କରିବେ। କେତେକ ଜନମତ ସର୍ଭେ ଅନୁଯାୟୀ ଶାସକ ଭାଜପା ଏବଂ ବିରୋଧୀ କଂଗ୍ରେସ ମଧ୍ୟରେ ଜୋର୍ଦାର ଟକ୍କର ହେବାକୁ ଯାଉଥିବାବେଳେ କିଙ୍ଗ୍ ମେକର ଭୂମିକା ନେବାକୁ ଜେଡିଏସ୍ ଆଶା ରଖିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରଚାରରୁ ଭାଜପା ଲାଭ ଉଠାଇବା ନେଇ ଆଶାବାଦୀ ରହିଛି। କଂଗ୍ରେସ ଆଗରେ ରହିବ ବୋଲି କେତେକ ଜନମତ ସର୍ଭେରେ ପ୍ରକାଶ ପାଇଥିବାବେଳେ ଶେଷ ପର୍ଯ୍ୟାୟରେ ମୋଦି ପ୍ରଚାରକୁ ଓହ୍ଲାଇ ୨୦ରୁ ଊର୍ଦ୍ଧ୍ୱ ରାଲିରେ ସାମିଲ ହୋଇଥିଲେ। ବେଙ୍ଗାଲୁରୁରେ କ୍ରମାଗତ ଦୁଇଦିନ ଧରି ମେଗା ରୋଡ୍ଶୋ’ ହୋଇଥିଲା। ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ମଧ୍ୟ ଏକାଧିକ ନିର୍ବାଚନୀ ସଭାରେ ଯୋଗଦେଇ କଂଗ୍ରେସକୁ ଟାର୍ଗେଟ କରିଥିଲେ। ମୋଦି, ଶାହାଙ୍କ ପ୍ରଚାର ଭାଜପା ମନୋବଳ ବଢ଼ାଇଥିଲେ ମଧ୍ୟ ଏହା ଭୋଟ ହାତେଇବାରେ କେତେଦୂର ସଫଳ ହେବ ତାହା ଫଳାଫଳରୁ ଜଣାପଡ଼ିବ। ଭାଜପା ପୁଣିଥରେ କ୍ଷମତାକୁ ଫେରିବା ନେଇ ଆଶାବାଦୀ ଥିବାବେଳେ ଶାସକ ବିରୋଧୀ ହାଓ୍ବାରୁ କଂଗ୍ରେସ ଫାଇଦା ଉଠାଇବାକୁ ଲକ୍ଷ୍ୟ ରଖିଛି।