ବେଙ୍ଗାଲୁରୁ/ନୂଆଦିଲ୍ଲୀ,୩୦ା୩: କର୍ନାଟକ ବିଧାନସଭାର ୨୨୪ ଆସନ ପାଇଁ ମେ’ ୧୦ରେ ଭୋଟ ଗ୍ରହଣ କରାଯିବ ବୋଲି ବୁଧବାର ମୁଖ୍ୟ ନିର୍ବାଚନ କମିଶନର (ସିଇସି) ରାଜୀବ କୁମାର ଘୋଷଣା କରିଛନ୍ତି। ଏକ ଖବରଦାତା ସମ୍ମିଳନୀରେ ସିଇସି କୁମାର କହିଛନ୍ତି, ଭୋଟରମାନେ ସପ୍ତାହାନ୍ତ ଛୁଟିରେ ସହର ଛାଡ଼ି ଗଲେ ମତଦାନ ହାର କମିଥାଏ। ଏହାକୁ ଦୃଷ୍ଟିରେ ରଖି ସୋମବାର କିମ୍ବା ଶୁକ୍ରବାର ପରିବର୍ତ୍ତେ ବୁଧବାର ଭୋଟ ଗ୍ରହଣ କରାଯିବ। ନିର୍ବାଚନ ପାଇଁ ଏପ୍ରିଲ ୧୩ରେ ବିଜ୍ଞପ୍ତି ଜାରି କରାଯିବ। ନାମାଙ୍କନପତ୍ର ଦାଖଲର ଶେଷ ତାରିଖ ଏପ୍ରିଲ ୨୦। ୨୧ରେ ସେଗୁଡ଼ିକୁ ଯାଞ୍ଚ କରାଯିବ।
ଏପ୍ରିଲ ୨୪ ହେଉଛି ନାମାଙ୍କନପତ୍ର ପ୍ରତ୍ୟାହାରର ଶେଷ ଦିନ। ସିଇସିଙ୍କ ଏହି ଘୋଷଣା ସହ ରାଜ୍ୟରେ ଆଦର୍ଶ ଆଚରଣ ବିଧି ଲାଗୁ ହୋଇଛି। ନିର୍ବାଚନ କମିଶନଙ୍କ ସତର୍କ ଦୃଷ୍ଟି ଓ ତତ୍ପରତା ଯୋଗୁ କିଛି ନ ହେଉଣୁ ରାଜନୈତିକ ବ୍ୟକ୍ତିମାନଙ୍କଠାରୁ ୮୦ କୋଟି ଟଙ୍କା ଜବତ କରାଗଲାଣି। ଶତ ପ୍ରତିଶତ ମତଦାନ ସୁନିଶ୍ଚିତ କରିବା ପାଇଁ ଏଥର ଅନେକ ପଦକ୍ଷେପ ନିଆଯାଇଛି। ୫.୨୪ କୋଟି ଭୋଟର ମତଦାନ ପାଇଁ ଯୋଗ୍ୟ ବିବେଚିତ ହୋଇଛନ୍ତି। ସୁରୁଖୁରୁରେ ମତଦାନ ପାଇଁ ରାଜ୍ୟରେ ମୋଟ ୫୮,୨୮୨ ପୋଲିଂ ଷ୍ଟେଶନର ବ୍ୟବସ୍ଥା କରାଯିବ। ୧,୩୨୦ ପୋଲିଂ ଷ୍ଟେଶନର ପରିଚାଳନା ଦାୟିତ୍ୱ ମହିଳା ଅଧିକାରୀମାନଙ୍କୁ ନ୍ୟସ୍ତ କରାଯିବ। ୫୦% ମତଦାନ କେନ୍ଦ୍ରରେ ଓ୍ବେବ୍କାଷ୍ଟିଂ ସୁବିଧା ରହିବ।
ମେ’ରେ କର୍ନାଟକ ବିଧାନସଭାର ଶେଷ ନିର୍ବାଚନ ଅନୁଷ୍ଠିତ ହୋଇଥିଲା। କର୍ନାଟକ ଭୋଟର ଖଣ୍ଡିତ ଜନାଦେଶ ଦେବାରୁ ଝୁଲା ସ୍ଥିତି ଉପୁଜିଥିଲା। ଭାଜପା ୧୦୪ ଆସନ ଦଖଲ କରି ଏକକ ସଂଖ୍ୟାଗରିଷ୍ଠ ଦଳ ଭାବେ ଉଭା ହୋଇଥିଲା। କିନ୍ତୁ ମ୍ୟାଜିକ୍ ନମ୍ବର (୧୧୩) ହାସଲ କରିପାରି ନ ଥିଲା। ଫଳରେ କଂଗ୍ରେସ (୮୦) ଏବଂ ୩୭ ଆସନରେ ବିଜୟୀ ହୋଇଥିବା ଧର୍ମନିରପେକ୍ଷ ଜନତା ଦଳ (ଜେଡିଏସ୍) ମେଣ୍ଟ ସରକାର ଗଢ଼ିଥିଲେ। ଜେଡିଏସ୍ ମୁଖ୍ୟ ତଥା ପୂର୍ବତନ ପ୍ରଧାନମନ୍ତ୍ରୀ ଏଚ୍.ଡି. ଦେବେଗୌଡ଼ାଙ୍କ ପୁଅ ଏଚ୍.ଡି. କୁମାରସ୍ବାମୀ ମୁଖ୍ୟମନ୍ତ୍ରୀ ହୋଇଥିଲେ। ତେବେ ଶାସକ ମେଣ୍ଟର ଅନେକ ବିଧାୟକ ଇସ୍ତଫା ଦେଇ ଭାଜପାରେ ସାମିଲ ହୋଇଥିବାରୁ ଏହି ମେଣ୍ଟ ଭାଙ୍ଗିଯାଇଥିଲା। କୁମାରସ୍ବାମୀ ସରକାରଙ୍କ ପତନ ଘଟିଥିଲା। ଭାଜପା ଲିଙ୍ଗାୟତ ଷ୍ଟ୍ରଙ୍ଗ୍ମ୍ୟାନ୍ ବି.ଏସ୍. ୟେଦୁରପ୍ପାଙ୍କୁ ମୁଖ୍ୟମନ୍ତ୍ରୀ ଆସନରେ ବସାଇଥିଲା।
୨୦୨୧ରେ ସେ ଇସ୍ତଫା ଦେଇଥିଲେ। ତାଙ୍କ ସ୍ଥାନରେ ପୂର୍ବତନ ମୁଖ୍ୟମନ୍ତ୍ରୀ ଏସ୍. ଆର. ବୋମାଇଙ୍କ ପୁଅ ତଥା ଗୃହମନ୍ତ୍ରୀ ବାସବରାଜ ବୋମାଇଙ୍କୁ ଦଳ ମୁଖ୍ୟମନ୍ତ୍ରୀ କରିଥିଲା। ଇତିମଧ୍ୟରେ ୟେଦୁରପ୍ପା ସକ୍ରିୟ ରାଜନୀତିରୁ ଅବସର ଘୋଷଣା କରିସାରିଛନ୍ତି। କର୍ନାଟକ ବିଧାନସଭାରେ ଏବେ ଶାସକ ଭାଜପାର ୧୧୯ ବିଧାୟକ ଅଛନ୍ତି। କଂଗ୍ରେସ ଏମ୍ଏଲ୍ଏ ସଂଖ୍ୟା ୭୫ ଥିବାବେଳେ ଜେଡିଏସ୍ ୨୮ରେ ସୀମିତ ରହିଛି। ଅନ୍ୟ ୨ଟି ଆସନ ଖାଲି ପଡ଼ିଛି। ରାଜ୍ୟର ୪୦% ଜନସଂଖ୍ୟା (ସର୍ବାଧିକ ଭୋଟର) ଥିବା ଲିଙ୍ଗାୟତ ଓ ଭୋକାଲିଙ୍ଗା ସମ୍ପ୍ରଦାୟର ଭୋଟରଙ୍କୁ ନିଜ ଆଡ଼କୁ ଟାଣିବା ପାଇଁ ଗୈରିକ ଦଳ ପ୍ରାଣପଣେ ଉଦ୍ୟମ ଜାରି ରଖିଛି। ଏହିକ୍ରମରେ ନିକଟରେ ଭାଜପା ଦୁଇ ସମ୍ପ୍ରଦାୟ ପାଇଁ ଶିକ୍ଷା ଓ ସରକାରୀ ନିଯୁକ୍ତି କ୍ଷେତ୍ରରେ ସଂରକ୍ଷଣ ବୃଦ୍ଧି କରିଛି। ଏଥିସହ ପୂର୍ବର କଂଗ୍ରେସ ସରକାର ମୁସଲମାନ ସମ୍ପ୍ରଦାୟ ପାଇଁ କରିଥିବା ୪% ସଂରକ୍ଷଣକୁ ଭାଜପା ଉଚ୍ଛେଦ କରିଛି। ଇତିମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଅନେକ ଥର କର୍ନାଟକ ଗସ୍ତ କରି ବହୁ କୋଟି ଟଙ୍କାର ବିକାଶମୂଳକ କାର୍ଯ୍ୟର ଭିତ୍ତିପ୍ରସ୍ତର ସ୍ଥାପନ ଓ ଉଦ୍ଘାଟନ କରିଛନ୍ତି। ତେଣୁ ମୋଦି-ଶାହା ଯୋଡ଼ି ପାଇଁ କର୍ନାଟକ ନିର୍ବାଚନ ଅଗ୍ନିପରୀକ୍ଷା ସଦୃଶ ହେବ।
ଅନ୍ୟପକ୍ଷେ ଭାଜପା ସାମ୍ପ୍ରଦାୟିକ ରାଜନୀତି ଓ ଦୁର୍ନୀତିରେ ମଜ୍ଜି ରହିଥିବା କଂଗ୍ରେସ ଅଭିଯୋଗ ଆଣିଛି। ଦଳ କ୍ଷମତାକୁ ଆସିଲେ ବେକାର ଗ୍ରାଜୁଏଟ୍ମାନଙ୍କୁ ୨ ବର୍ଷ ପର୍ଯ୍ୟନ୍ତ ମାସିକ ୩,୦୦୦ ଟଙ୍କା ଲେଖାଏ ଭତ୍ତା ଦିଆଯିବ ବୋଲି ଘୋଷଣା କରିଛି। ସେହିପରି ପଛୁଆ ବର୍ଗ, ସଂଖ୍ୟାଲଘୁ ଓ ଦଳିତ ଭୋଟରଙ୍କୁ ଆକର୍ଷିତ କରିବା ପାଇଁ ମଧ୍ୟ କଂଗ୍ରେସର ଉଦ୍ୟମ ଜାରି ରହିଛି। ପୂର୍ବତନ ମୁଖ୍ୟମନ୍ତ୍ରୀ ସିଦ୍ଦାରାମାୟା ଇମୋଶନାଲ କାର୍ଡ ଖେଳି ଭୋଟରଙ୍କୁ ଆଶୀର୍ବାଦ ଭିକ୍ଷା କରିଛନ୍ତି। ବରିଷ୍ଠ କଂଗ୍ରେସ ନେତା ସିଦ୍ଦାରାମାୟା କହିଛନ୍ତି, ଏହା ହେଉଛି ତାଙ୍କର ଶେଷ ନିର୍ବାଚନ। ଏଥର ହାରିଲେ ସେ ଆଉ ରାଜନୀତି କରିବେ ନାହିଁ। ‘ସବୁ ମୋଦି ଚୋର’ ମନ୍ତବ୍ୟ ଦେଇ ୨ ବର୍ଷ ଜେଲ ଦଣ୍ଡାଦେଶ ପାଇବା ସହ ଲୋକ ସଭା ସଦସ୍ୟତା ହରାଇଥିବା କଂଗ୍ରେସ ନେତା ରାହୁଲ ଗାନ୍ଧୀ ଏଥର ମାରାଥନ ପ୍ରଚାର କରିବେ।
ଦଳକୁ କ୍ଷମତାକୁ ଫେରାଇ ଆଣିବା ପାଇଁ ସେ ଧୂଅଁାଧାର ପ୍ରଚାର କରିବେ ବୋଲି କଂଗ୍ରେସ ସୂତ୍ରରୁ ପ୍ରକାଶ। ଜେଡିଏସ୍ କର୍ନାଟକ ରାଜନୀତିରେ କିଙ୍ଗ୍ମେକର ଭୂମିକା ନେଇଥାଏ। ଦେବେଗୌଡ଼ାଙ୍କ ଦଳ ଉଭୟ ଭାଜପା ଏବଂ କଂଗ୍ରେସଠାରୁ ସମଦୂରତ୍ୱ ବଜାୟ ରଖିବା ସହ ନିର୍ବାଚନ ପରବର୍ତ୍ତୀ ମେଣ୍ଟ ପାଇଁ ବିକଳ୍ପ ଖୋଲା ରଖିଥାଏ। କୃଷକ କଲ୍ୟାଣ ଓ ଆଞ୍ଚଳିକ ବିକାଶ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ଉପରେ ଜେଡିଏସ୍ର ଫୋକସ ରହିଥାଏ। ତେଣୁ ଏଥର ନିର୍ବାଚନ ବେଳେ କୁମାରସ୍ବାମୀ କେଉଁ ରଣନୀତି ଆପଣାଉଛନ୍ତି ତା’ ଉପରେ ସମସ୍ତଙ୍କ ନଜର ରହିବ।