ନୂଆଦିଲ୍ଲୀ,୨୨ା୯(ପି.ଟି.):କାବେରୀ ଜଳ ବିବାଦ ପ୍ରସଙ୍ଗରେ କାବେରୀ ଜଳ ପରିଚାଳନା କର୍ତ୍ତୃପକ୍ଷ (ସିଡବ୍ଲ୍ୟୁଏମ୍ଏ)ଙ୍କ ପକ୍ଷରୁ ନିଆଯାଇଥିବା ନିଷ୍ପତ୍ତି ଉପରେ ଗୁରୁବାର ସୁପ୍ରିମକୋର୍ଟ ହସ୍ତକ୍ଷେପ କରିବାକୁ ମନା କରିଦେଇଛନ୍ତି। ଏଥିସହ ତାମିଲନାଡୁକୁ ୧୫ ଦିନ ପର୍ଯ୍ୟନ୍ତ ଦୈନିକ ୫ ହଜାର କ୍ୟୁସେକ୍ ଜଳ ଛାଡ଼ିବା ପାଇଁ କର୍ନାଟକ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।
କାବେରୀ ଜଳ ନିୟନ୍ତ୍ରଣ କମିଟି (ସିଡବ୍ଲ୍ୟୁଆର୍ସି) ସେପ୍ଟେମ୍ବର ୧୨ରେ ଏକ ନିର୍ଦ୍ଦେଶନାମା ଜାରି କରିଥିଲା, ଯାହାକୁ ସିଡବ୍ଲ୍ୟୁଏମ୍ଏ ବଳବତ୍ତର ରଖିଥିଲେ। ତାମିଲନାଡୁକୁ ୧୫ ଦିନ ଧରି ଦୈନିକ ୫,୦୦୦ କ୍ୟୁସେକ୍ ଜଳ ଛାଡ଼ିବା ପାଇଁ କର୍ନାଟକକୁ ନିର୍ଦ୍ଦେଶ ଦେଇଥିଲେ। କର୍ନାଟକ ସରକାର ଏହାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ। ଗୁରୁବାର ଜଷ୍ଟିସ୍ ବି.ଆର୍. ଗଭାଇ, ପି.ଏସ୍. ନରସିଂହ ଏବଂ ପ୍ରଶାନ୍ତ କୁମାର ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ଏହାର ଶୁଣାଣି କରି କହିଥିଲେ, ଅନାବୃଷ୍ଟି ହେତୁ ତାମିଲନାଡୁ ମରୁଡ଼ି ସ୍ଥିତିର ସମ୍ମୁଖୀନ ହେଉଛି। ସିଡବ୍ଲ୍ୟୁଏମ୍ଏ ଏବଂ ସିଡବ୍ଲ୍ୟୁଆର୍ସିରେ ଜଳସମ୍ପଦ ପରିଚାଳନା ତଥା କୃଷିକ୍ଷେତ୍ରର ଅନେକ ବିଶେଷଜ୍ଞ ରହିଛନ୍ତି। ସିଡବ୍ଲ୍ୟୁଆର୍ସି ଚଳିତବର୍ଷ ଜଳହ୍ରାସ ଓ ଗତ ୧୫ ଦିନରେ କାବେରୀ ଅବବାହିକାରେ ବଢ଼ିଥିବା ସଙ୍କଟର ସ୍ଥିତି ସହ ଆଉ କେତେକ କାରଣ ଉପରେ ଦୃଷ୍ଟି ଆକର୍ଷଣ କରିଥିଲେ, ଯାହାକୁ ଧ୍ୟାନରେ ରଖି ଏହି ନିଷ୍ପତ୍ତି ନିଆଯାଇଛି। ପ୍ରତି ୧୫ ଦିନରେ କର୍ତ୍ତୃପକ୍ଷ ସ୍ଥିତି ଉପରେ ସମୀକ୍ଷା କରୁଛନ୍ତି। ତାମିଲନାଡୁ ସରକାରଙ୍କ ପକ୍ଷରୁ ବରିଷ୍ଠ ଆଇନଜୀବୀ ମୁକୁଲ୍ ରୋହତୋଗୀ ଯୁକ୍ତି ବାଢ଼ିଥିଲେ ଯେ ରାଜ୍ୟକୁ ୬୪୦୦ କ୍ୟୁସେକ୍ ପାଣି ଛଡ଼ାଯିବା ଆବଶ୍ୟକ ଥିବାବେଳେ ଏହାକୁ ସିଡବ୍ଲ୍ୟୁଏମ୍ଏ ଏବଂ ସିଡବ୍ଲ୍ୟୁଆର୍ସି ୫ହଜାର କ୍ୟୁସେକ୍କୁ ଖସାଇ ଦେଇଛନ୍ତି।