ବରଗଡ଼ ଅଫିସ,୧।୮: ବରଗଡ଼ ଜିଲାରେ ଶନିବାର ପୁଣି ୧୩ ଜଣ ନୂଆ କରୋନା ପଜିଟିଭ ଚିହ୍ନଟ ହୋଇଛନ୍ତି। ତେବେ ଜିଲାରେ ପ୍ରଥମ ଥର ପାଇଁ ପଦ୍ମପୁର ସବ୍ଜେଲକୁ କରୋନା ପଶିଥିବା ଜଣାପଡିଛି। ଆକ୍ରାନ୍ତଙ୍କ ମଧ୍ୟରେ ପଦ୍ମପୁର ସବ୍ଜେଲରେ ଥିବା ଜଣେ ବିଚାରାଧୀନ କଏଦୀ କରୋନା ପଜିଟିଭ୍ ହୋଇଛନ୍ତି। ଏହା ସହ ଜେଲ କ୍ୟାମ୍ପସର ଅନ୍ୟ ୩ ଜଣ, ବରଗଡ଼ ପୌରାଞ୍ଚଳ ଓ୍ବାର୍ଡ ନଂ- ୧୬ର ୪ଜଣ, ଓ୍ବାର୍ଡ ନଂ-୭ର ଜଣେ, କଟାପାଲି ଅବରୋଧ ଅଞ୍ଚଳର ଜଣେ, ଭାରତୀ ନଗରର ଜଣେ, କୁଳିପଡ଼ାର ୨ଜଣ ରହିଛନ୍ତି । ଆକ୍ରାନ୍ତ ବିଚାରାଧୀନ କଏଦୀଙ୍କୁ ଜେଲର ଅବରୋଧ ଅଞ୍ଚଳରେ ଏବଂ ଅନ୍ୟମାନଙ୍କୁ ବରଗଡ଼ କୋଭିଡ ହସ୍ପିଟାଲରେ ଚିକିତ୍ସା କରାଯାଉଛି ବୋଲି ଜିଲା ସୂଚନା ଓ ଲୋକସମ୍ପର୍କ ଅଧିକାରୀ କଲ୍ୟାଣୀ ଦାଶ ସୂଚନା ଦେଇଛନ୍ତି।
ଉପରୋକ୍ତ ଆକ୍ରାନ୍ତ ମାନଙ୍କ ୯ ଜଣ ପୁରୁଷ ଏବଂ ୪ଜଣ ମହିଳା ଅଛନ୍ତି। ଏହାକୁ ମିଶାଇ ଜିଲାରେ ଆକ୍ରାନ୍ତଙ୍କ ସଂଖ୍ୟା ୪୨୬ରେ ପହଞ୍ଚିଛି। ସେମାନଙ୍କ ମଧ୍ୟରୁ ୩୪୮ ଜଣ ସୁସ୍ଥ ହୋଇ ଥିବା ବେଳେ ଜଣଙ୍କର ମୃତ୍ୟୁ ଘଟିଛି। ଅନ୍ୟ ୭୭ ଜଣ କୋଭିଡ ହସ୍ପିଟାଲରେ ଚିକିତ୍ସାଧୀନ ଅଛନ୍ତି।