ବନ୍ତ,୨୭।୭(ଡି.ଏନ୍.ଏ./ସ୍ବ.ପ୍ର) : ଭଦ୍ରକ ଜିଲା ବନ୍ତ ବ୍ଲକ ଓଡ଼ଙ୍ଗ ପଞ୍ଚାୟତକୁ ସରପଞ୍ଚ କିଶୋର କିଙ୍କର ପଢ଼ିଆରୀ ସୋମବାର ସକାଳ ୭ଟାରୁ ଆସନ୍ତା ରବିବାର ସନ୍ଧ୍ୟା ୭ଟା ପର୍ଯ୍ୟନ୍ତ ୭ ଦିନ ଶଟ୍ଡାଉନ୍ ଘୋଷଣା କରିଛନ୍ତି।
ସୂଚନାଯୋଗ୍ୟ, ଓଡ଼ଙ୍ଗ ଟି.ଏମ୍.ସିରେ ୨ଟି ପଜିଟିଭ୍ କେସ ବାହାରିବା ସହିତ ବିଭିନ୍ନ ଗ୍ରାମର ଲୋକମାନଙ୍କଠାରେ ଥଣ୍ଡା କାଶ, ଜ୍ୱର ଆଦି ଲକ୍ଷଣ ଦେଖାଯାଇଛି। ଏହା ସହ ଲୋକେ ସାମାଜିକ ଦୂରତା ଅବଲମ୍ବନ କରୁ ନ ଥିବା ବେଳେ ତାସ, କ୍ରିକେଟ, ଗୁଲିଖଟି କରୁଛନ୍ତି ।ଏସବୁ ସମସ୍ୟାକୁ ଦୃଷ୍ଟିରେ ରଖି ସରପଞ୍ଚ ଶଟ୍ଡାଉନ୍ ଘୋଷଣା କରିବା ସହିତ ଆଶା ଓ ଅଙ୍ଗନୱାଡି କର୍ମୀମାନଙ୍କୁ ଘର ଘର ବୁଲି ସ୍ବାସ୍ଥ୍ୟ ପରୀକ୍ଷା କରିବାକୁ ନିର୍ଦ୍ଦେଶ ଦେଇଛନ୍ତି ।
ଏହି ସମୟରେ ଔଷଧ ଦୋକାନ, ସରକାରୀ ଡାକ୍ତରଖାନା ଖୋଲା ରହିବ । ସକାଳ ୭ଟାରୁ ୧୨ ଟା ପର୍ଯ୍ୟନ୍ତ ଗ୍ରୋସରୀ ଓ ପରିବା ଦୋକାନ ଖୋଲା ରହିବ । ସାମାଜିକ ଦୂରତା ରକ୍ଷା କରି ଚାଷ କାର୍ଯ୍ୟ ଚାଲି ପାରିବ । ପୋଷ୍ଟ ଅଫିସ, ଦୁଗ୍ଧ ଉତ୍ପାଦନ କେନ୍ଦ୍ର, ପଶୁ ଡାକ୍ତରଖାନା ଆଦି ଖୋଲା ରହିବ। ଜରୁରୀ କାର୍ଯ୍ୟ ନ ଥିଲେ କେହି ବାହାରକୁ ବାହାରିବେ ନାହିଁ ଏବଂ ଘରୁ ବାହାରିଲେ ମାସ୍କ ପିନ୍ଧିବା ବାଧ୍ୟତାମୂଳକ ବୋଲି ନିର୍ଦ୍ଦେଶ ଦିଆଯାଇଛି । ଏ ନେଇ ବିଡିଓ, ବନ୍ତ ଓ ଆଗରପଡା ଥାନାଧିକାରୀଙ୍କୁ ଅବଗତ କରାଯାଇଛି । ଏସମ୍ପର୍କରେ ବିଡିଓ ରେବେକା ବିଲୁଙ୍ଗଙ୍କୁ ପଚାରିବାରୁ ଲୋକାଲ କେସ୍ ପାଇଁ ସରପଞ୍ଚ ଶଟ୍ଡାଉନ୍ ଘୋଷଣା କରିଛନ୍ତି । ତେବେ ଯେଉଁମାନଙ୍କୁ ଥଣ୍ଡା କାଶ, ଜ୍ୱର ହୋଇଛି ସେମାନଙ୍କୁ ଅଲଗା ସ୍ଥାନରେ ରଖି ଚିକିତ୍ସା କରିବାକୁ ପରାମର୍ଶ ଦିଆଯାଇଛି ।
