ମୁମ୍ବାଇ: ଅଭିନେତା କାର୍ତ୍ତିକ ଆର୍ଯ୍ୟନଙ୍କ ପାଇଁ ବର୍ଷ ୨୦୨୪ ବେଶ୍ ଭଲ ରହିଥିଲା। ବକ୍ସ ଅଫିସ୍ରେ ହିଟ୍ ହୋଇଥିବା ‘ଭୁଲ୍ ଭୁଲୈୟା ୩’ ଚଳଚ୍ଚିତ୍ରରେ କାର୍ତ୍ତିକଙ୍କ ଅଭିନୟକୁ ଦର୍ଶକ ବେଶ୍ ପସନ୍ଦ କରିଥିଲେ। ଏକ ରିପୋର୍ଟ ଅନୁଯାୟୀ, ‘ଭୁଲ୍ ଭୁଲୈୟା ୩’ର ସଫଳତା ପରେ କାର୍ତ୍ତିକ ନିଜର ପାରିଶ୍ରମିକକୁ ବୃଦ୍ଧି କରିଛନ୍ତି। କାର୍ତ୍ତିକଙ୍କୁ ଖୁବ୍ଶୀଘ୍ର କରନ୍ ଜୋହରଙ୍କ ଆଗାମୀ ଚଳଚ୍ଚିତ୍ର ‘ତୁ ମେରୀ ମେ ତେରା, ମେ ତେରା ତୁ ମେରୀ’ରେ ଦେଖିବାକୁ ମିଳିବ। ଏହି ଫିଲ୍ମର ଘୋଷଣା ହୋଇସାରିଛି। ରିପୋର୍ଟ୍ ଅନୁଯାୟୀ, ଧର୍ମା ପ୍ରଡକ୍ସନ ଏବଂ ନାମା ପିକ୍ଚର୍ସ ବ୍ୟାନରରେ ନିର୍ମିତ ଏହି ଚଳଚ୍ଚିତ୍ରରେ କାର୍ତ୍ତିକ ମୁଖ୍ୟ ଭୂମିକାରେ ଅଭିନୟ କରିବାକୁ ଯାଉଛନ୍ତି ଏବଂ ଏଥିପାଇଁ ସେ ଫିଲ୍ମ ନିର୍ମାତାଙ୍କଠାରୁ ଅଧିକ ପାରିଶ୍ରମିକ ଦାବି କରିଛନ୍ତି। ‘ଭୁଲ୍ ଭୁଲୈୟା ୩’ର ସଫଳତା ପରେ
କାର୍ତ୍ତିକ ‘ତୁ ମେରୀ ମେ ତେରା, ମେ ତେରା ତୁ ମେରୀ’ ଚଳଚ୍ଚିତ୍ର ପାଇଁ ୧୦ରୁ ୨୦ କୋଟି ଟଙ୍କା ନୁହେଁ ବରଂ ୫୦ କୋଟି ଟଙ୍କା ପାରିଶ୍ରମିକ ଆକାରରେ ନେବା ପାଇଁ ଦାବି କରିଛନ୍ତି। ତେବେ ଏନେଇ କାର୍ତ୍ତିକ କିମ୍ବା ଫିଲ୍ମ ନିର୍ମାତାଙ୍କ ପକ୍ଷରୁ କୌଣସି ଆଧିକାରିକ ବିବୃତି ଦିଆଯାଇ ନାହିଁ। ‘ତୁ ମେରୀ ମେ ତେରା, ମେ ତେରା ତୁ ମେରୀ’ ଏକ ରୋମାଣ୍ଟିକ ଡ୍ରାମା ଚଳଚ୍ଚିତ୍ର ହୋଇଥିବା ବେଳେ ଏହା ୨୦୨୬ରେ ରିଲିଜ୍ ହେବାକୁ ଯାଉଛି। ଏହି ଫିଲ୍ମ ଜରିଆରେ ପ୍ରଥମ ଥର ପାଇଁ କରନ୍ଙ୍କ ସହ କାର୍ତ୍ତିକ ଏକାଠି କାମ କରିବେ। ଫିଲ୍ମରେ ମୁଖ୍ୟ ଅଭିନେତ୍ରୀଙ୍କ ନାମ ବର୍ତ୍ତମାନ ସୁଦ୍ଧା ସାମ୍ନାକୁ ଆସିନାହିଁ।