ଆବୁଧାବି,୧୭।୧୦(ପି.ଟି.): ଉଇକେଟକିପର ବ୍ୟାଟ୍ସମ୍ୟାନ ଦୀନେଶ କାର୍ତ୍ତିକ ଶୁକ୍ରବାର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଫ୍ରାଞ୍ଚାଇଜ୍ କୋଲକାତା ନାଇଟ ରାଇଡର୍ସ ଅଧିନାୟକ ପଦରୁ ଇସ୍ତଫା ଦେଇଛନ୍ତି। ଇଂଲଣ୍ଡ ସୀମିତ ଓଭର ଅଧିନାୟକ ଇଅନ ମୋର୍ଗାନଙ୍କୁ ସେ ନେତୃତ୍ୱ ହସ୍ତାନ୍ତର କରିଛନ୍ତି। ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚ୍ ଆରମ୍ଭ ହେବାର ଠିକ୍ ପୂର୍ବରୁ କାର୍ତ୍ତିକ ମୋର୍ଗାନଙ୍କୁ ଏହି ଗୁରୁଦାୟିତ୍ୱ ପ୍ରଦାନ କରିଛନ୍ତି।
ବ୍ୟାଟିଂ ଉପରେ ମନୋନିବେଶ କରିବାକୁ ଚାହୁଁଛି ଓ ଏ ନେଇ ମ୍ୟାନେଜମେଣ୍ଟକୁ ଅବଗତ କରାଇଛି ବୋଲି କାର୍ତ୍ତିକ ତାଙ୍କ ପ୍ରତିକ୍ରିୟାରେ ଉଲ୍ଲେଖ କରିଛନ୍ତି। ଟିମ୍ ପ୍ରତି ଅଧିକ ଯୋଗଦାନ କରିବାକୁ ଚାହୁଁଛି ବୋଲି ସେ କହିଛନ୍ତି। ୨୦୧୮ରେ ୩୫ ବର୍ଷୀୟ କାର୍ତ୍ତିକ କୋଲକାତାର ଅଧିନାୟକ ନିଯୁକ୍ତ ହୋଇଥିଲେ ଓ ଦଳ ପାଇଁ ସେ ୩୭ଟି ମ୍ୟାଚ୍ରେ ନେତୃତ୍ୱ ନେଇଥିଲେ। ସେତେବେଳେ ସେ ଗୌତମ ଗମ୍ଭୀରଙ୍କଠାରୁ ନେତୃତ୍ୱ ଗ୍ରହଣ କରିଥିଲେ। କାର୍ତ୍ତିକଙ୍କ ଭଳି ଅଧିନାୟକ ପାଇ ଆମେ ବେଶ୍ ଭାଗ୍ୟବାନ ମନେ କରୁଛୁ। ଏଭଳି ସାହସିକ ନିଷ୍ପତ୍ତି ନେଇଥିବାରୁ ସେ ପ୍ରଶଂସାର ପାତ୍ର ବୋଲି କୋଲକାତା ସିଇଓ ଭେଙ୍କି ମହୀଶୂର କହିଛନ୍ତି। ତାଙ୍କର ଏହି ନିଷ୍ପତ୍ତିକୁ ନେଇ ଆମେ ଚକିତ। ତେବେ ତାଙ୍କର ଇଚ୍ଛାକୁ ଆମେ ସମ୍ମାନ ଦେଉଛୁ ବୋଲି ସେ କହିଛନ୍ତି। ଚଳିତ ଆଇପିଏଲ୍ରେ କୋଲକାତା ଏପର୍ଯ୍ୟନ୍ତ ୪ଟି ବିଜୟ ଓ ୩ଟି ପରାଜୟ ସହ ପଏଣ୍ଟ ତାଲିକାର ଚତୁର୍ଥ ସ୍ଥାନରେ ରହିଛି। କାର୍ତ୍ତିକ ଓ ମୋର୍ଗାନ ମିଳିତ ଭାବେ ଟୁର୍ନାମେଣ୍ଟରେ ଭଲ କାର୍ଯ୍ୟକରିଛନ୍ତି। ଗତ ଦେଢବର୍ଷ ହେବ ଦଳ ପ୍ରତି କାର୍ତ୍ତିକଙ୍କର ବହୁ ଅବଦାନ ରହିଛି। ଦଳ ତରଫରୁ ଆମେ କାର୍ତ୍ତିକଙ୍କୁ ଧନ୍ୟବାଦ୍ ଜଣାଉଛୁ। ମୋର୍ଗାନ ଏବେ ଦଳକୁ ଆଗକୁ ନେବେ ବୋଲି ମହୀଶୂର କହିଛନ୍ତି। ଉଲ୍ଲେଖଥାଉ କି, ଦଳର ଦୁର୍ବଳ ପ୍ରଦର୍ଶନ ପାଇଁ କାର୍ତ୍ତିକଙ୍କ ନେତୃତ୍ୱକୁ ନେଇ ଚର୍ଚ୍ଚା ଚାଲିଥିଲା ଓ ସମାଲୋଚନାର ଶିକାର ହୋଇଥିଲେ। କାର୍ତ୍ତିକଙ୍କ ବ୍ୟକ୍ତିଗତ ପ୍ରଦର୍ଶନ ମଧ୍ୟ ଭଲ ନ ଥିଲା।
