ନୂଆଦିଲ୍ଲୀ, ୧୪ା୮ (ପି.ଟି.)-ଭାରତ ଓ କିଙ୍ଗ୍ସ ଇଲେଭେନ୍ ବ୍ୟାଟ୍ସମ୍ୟାନ କରୁଣ ନାୟାର କୋଭିଡ୍-୧୯ରୁ ଆରୋଗ୍ୟ ଲାଭ କରିଛନ୍ତି। ସେପ୍ଟେମ୍ବର ୧୯ରୁ ଆରମ୍ଭ ହେବାକୁଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଖେଳିବା ଲାଗି ସେ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ଯିବେ। ନାୟାରଙ୍କର ଗତ ମାସରେ କୋଭିଡ୍ ଟେଷ୍ଟ ହୋଇଥିଲା ଏବଂ ଫଳାଫଳ ପଜିଟିଭ୍ ଆସିଥିଲା। କରୋନା ଟେଷ୍ଟରେ ନେଗେଟିଭ୍ ଆସିବା ପୂର୍ବରୁ ସେ ଦୁଇ ସପ୍ତାହରୁ ଊର୍ଦ୍ଧ୍ୱ ଦିନ ଧରି ସେଲ୍ଫ ଆଇସୋଲେଶନରେ ଥିଲେ। ଏହି ରିପୋର୍ଟ ଉପରେ ଫ୍ରାଞ୍ଚାଇଜ୍ ତରଫରୁ କୌଣସି ମନ୍ତବ୍ୟ ଦିଆଯାଇ ନାହିଁ। କିନ୍ତୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଏକ ସୂତ୍ରରୁ ପ୍ରକାଶ କ୍ୱାରାଣ୍ଟାଇନ ଶେଷ ହେବା ପରେ ଅଗଷ୍ଟ ୮ରେ ହୋଇଥିବା କୋଭିଡ୍ ଟେଷ୍ଟରେ ତାଙ୍କର ନେଗେଟିଭ୍ ଆସିଥିଲା। ଅଗଷ୍ଟ ୨୦ରେ ୟୁଏଇ ଗସ୍ତ ପୂର୍ବରୁ ଦଳର ଅବଶିଷ୍ଟ ସଦସ୍ୟଙ୍କ ସହିତ ତାଙ୍କୁ ଆହୁରି ତିନୋଟି ଟେଷ୍ଟରେ ଉତ୍ତୀର୍ଣ୍ଣ ହେବାକୁ ପଡ଼ିବ। ଟେଷ୍ଟରେ ଏକ ତ୍ରିଶତକ ହାସଲ କରିଥିବା ନାୟାର ଗତଥର ୨୦୧୭ରେ ଭାରତ ତରଫରୁ ଖେଳିଥିଲେ। ୨୦୧୮ରୁ ସେ କିଙ୍ଗ୍ସ ଇଲେଭେନ ପଞ୍ଜାବ ଦଳର ଜଣେ ସଦସ୍ୟ ରହିଆସିଛନ୍ତି। ୨୮ ବର୍ଷୀୟ ଏହି କ୍ରିକେଟର ତାଙ୍କ କର୍ନାଟକ ଟିମ୍ମେଟ୍ ମୟଙ୍କ ଅଗ୍ରଓ୍ବାଲ ଓ କେ.ଏଲ୍ ରାହୁୁଲଙ୍କ ସହିତ ଖେଳିବେ। ରାହୁଲଙ୍କୁ ପ୍ରଥମ ଥର ଦଳର ଅଧିନାୟକ କରାଯାଇଛି। କିଙ୍ଗ୍ସ ଇଲେଭେନ ପଞ୍ଜାବ ଦୁବାଇରେ ଅବସ୍ଥାନ କରିବ। ସେଠାରେ ପହଞ୍ଚତ୍ବା ପରେ ଅନ୍ୟ ଦଳଗୁଡ଼ିକ ଭଳି ଏହାର ଖେଳାଳିମାନେ ୬ ଦିନ କ୍ୱାରାଣ୍ଟାଇନ୍ରେ ରହିବେ। ଏକତ୍ର ଟେନିଂ ଆରମ୍ଭ କରିବା ପୂର୍ବରୁ ଖେଳାଳିଙ୍କର ୩ଥର ଟେଷ୍ଟରେ ନେଗେଟିଭ୍ ଆସିବା ଦରକାର। ମଙ୍ଗଳବାର ରାଜସ୍ଥାନ ରୟାଲ୍ସର ଫିଲ୍ଡିଂ କୋଚ୍ ଦିଶାନ୍ତ ୟାଗନିକ୍ଙ୍କର କରୋନା ଭାଇରସ ଟେଷ୍ଟ ହୋଇଥିଲା। ହୋମ୍ ଟାଉନ୍ ଉଦୟପୁରରେ ବର୍ତ୍ତମାନ ସେ କ୍ୱାରାଣ୍ଟାଇନରେ ଅଛନ୍ତି। ଆଇପିଏଲ୍ ସେପ୍ଟେaମ୍ବର ୧୯ରୁ ନଭେମ୍ବର ୧୦ ପର୍ଯ୍ୟନ୍ତ ତିନୋଟି ଭେନ୍ୟୁ ଦୁବାଇ, ଶାରଜା ଓ ଆବୁଧାବୀରେ ଖେଳାଯିବ।
