ରାୟଗଡ଼ା ଅଫିସ, ୧୩ା୮: ରାୟଗଡ଼ା ଜିଲା କାଶୀପୁର ବ୍ଲକରେ ବ୍ୟାପିଥିବା ଝାଡ଼ାବାନ୍ତି ପ୍ରସଙ୍ଗକୁ କୋରାପୁଟ ଏମ୍ପି ସପ୍ତଗିରି ଉଲାକା ପାର୍ଲାମେଣ୍ଟରେ ଉଠାଇଛନ୍ତି। ଜଳବାହିତ ରୋଗ ଏବଂ ଏଥିରେ ଅନେକ ଲୋକଙ୍କ ମୃତ୍ୟୁ ଘଟିଥିବା ବିଷୟରେ ସରକାର ଅବଗତ ଅଛନ୍ତି କି ବୋଲି ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ମନ୍ତ୍ରୀଙ୍କୁ ସପ୍ତଗିରି ପ୍ରଶ୍ନ କରିଛନ୍ତି। ସେହିପରି ବାରମ୍ବାର ଉକ୍ତ ଅଞ୍ଚଳରେ ଲେକେ କଲେରାରେ ଆକ୍ରାନ୍ତ ହେଉଛନ୍ତି। ତେଣୁ ରାୟଗଡ଼ାରେ ଆର୍ଏମ୍ଆର୍ସି ୟୁନିଟ ସ୍ଥାପନ ନେଇ ସରକାରଙ୍କ କୌଣସି ପ୍ରସ୍ତାବ ରହିଛି କି ଏବଂ ଝାଡ଼ାବାନ୍ତି ନିୟନ୍ତ୍ରଣ କରିବାକୁ କ’ଣ ପଦକ୍ଷେପ ନିଆଯାଇଛି ବୋଲି ଏମ୍ପି ପ୍ରଶ୍ନ କରିଛନ୍ତି। ଏହାର ଉତ୍ତରରେ କୁହାଯାଇଛି, ଓଡ଼ିଶା ସରକାରଙ୍କ ପକ୍ଷରୁ ୨୦୦୫ ରୁ ୨୦୧୨ ପର୍ଯ୍ୟନ୍ତ ଆର୍ଏମ୍ଆର୍ସିର ଫିଲଡ ୟୁନିଟ କାର୍ଯ୍ୟକ୍ଷମ ଥିଲା। ଏହାପରେ ଲାବ୍ର ସମସ୍ତ ସାମଗ୍ରୀ ଏବଂ ଟେକ୍ନୋଲୋଜି ଜିଲା ଜନସ୍ବାସ୍ଥ୍ୟ ଲାବ୍କୁ ହସ୍ତାନ୍ତର କରାଯାଇଛି। ତାହା ଏବେ ଜିଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟକ୍ଷମ ବୋଲି କୁହାଯାଇଛି। ଅନ୍ୟପକ୍ଷରେ ଅଗଷ୍ଟ ୧ ସୁଦ୍ଧା କାଶୀପୁର ବ୍ଲକରେ ଝାଡ଼ାବାନ୍ତିରେ ୧୦ ଗ୍ରାମରୁ ୯ ଜଣଙ୍କ ମୃତ୍ୟୁ ଘଟିଥିବା ଓଡ଼ିଶା ସରକାରଙ୍କ ପକ୍ଷରୁ ସୂଚନା ଦିଅଯାଇଥିବା ଉତ୍ତର ରଖାଯାଇଛି। ଅନ୍ୟପକ୍ଷରେ ରାୟଗଡ଼ାରେ ଯଦି ଆର୍ଏମ୍ଅର୍ସିର ୟୁନିଟ ରହିଛି ତେବେ ଆକ୍ରାନ୍ତଙ୍କ ମଳ ନମୁନା ଭୁବେନେଶ୍ୱରକୁ ପରୀକ୍ଷା ପାଇଁ କାହିଁକି ପଠାଯାଉଛି ଏବଂ ପ୍ରଥମେ ଡାଇରିଆ ବୋଲି ଜଣାପଡ଼ିଥିବାବେଳେ ପରେ ରିପୋର୍ଟରୁ କଲେରା ବୋଲି କେମିତି ସ୍ପଷ୍ଟ ହେଉଛି ବୋଲି କୋରାପୁଟ ଏମ୍ପି ପ୍ରଶ୍ନ କରିଥିଲେ। ତେବେ ରାୟଗଡ଼ାରେ ଆର୍ଏମ୍ଅର୍ସିର ୟୁନିଟ ରହିଥିବା ନେଇ ପାର୍ଲାମେଣ୍ଟରେ ରଖାଯାଇଥିବା ଉତ୍ତରରେ କେତେ ସତ୍ୟତା ରହିଛି ତାହା ସ୍ପଷ୍ଟ ହେଉ ନ ଥିବା ସପ୍ତଗିରି କହିଛନ୍ତି।