ସାଧାରଣତଃ ବିବାହ ପରେ ବାପଘରୁ ଶାଶୁଘରକୁ କନ୍ୟା କାନ୍ଦି କାନ୍ଦି ବିଦାୟ ନେଇ ଯାଇଥାନ୍ତି। ମାତ୍ର ଆଜି ଏମିତି ଜଣେ କନ୍ୟାଙ୍କ ବିଷୟରେ କହିବୁ ଯିଏକି ବିଦାବେଳେ ଟିକେ ବି କାନ୍ଦି ନ ଥିଲେ କି ମନରେ ଦୁଃଖ ନ ଥିଲା। ନିଜେ ମହିନ୍ଦ୍ରାର ଏକ ଦାମୀ କାର୍ ‘ଥର’ ଚଲାଇ ଶାଶୁଘର ଯାଇଥିଲେ। ତାଙ୍କର ଏହି ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି।
ଏମିତି ବିବାହ ଦୁଇଦିନ ତଳେ ଉତ୍ତର କଶ୍ମୀରର ବାରମୂଳା ଜିଲାରେ ହୋଇଥିଲା। ନବଦମ୍ପତି କଶ୍ମୀରର ଅଟନ୍ତି। କନ୍ୟାଙ୍କ ଭାଇ ଜମ୍ମୁ-କଶ୍ମୀର ପୋଲିସରେ କାର୍ଯ୍ୟରତ। ବର ହେଉଛନ୍ତି ଜଣେ କଂଗ୍ରେସ ନେତା। ଏହି କଂଗ୍ରେସ ନେତାଙ୍କ ବିବାହ କଶ୍ମୀରରେ ରହୁଥିବା ଜଣେ ଯୁବତୀଙ୍କୁ ଦୁଇଦିନ ତଳେ ବିବାହ କରିଥିଲେ। ବିଦାୟ ସମୟରେ କନ୍ୟା ଭିନ୍ନ ଏକ ଉପାୟ ଆପଣାଇଥିଲେ। ଲେହେଙ୍ଗା ପିନ୍ଧି ମହିନ୍ଦ୍ରାର ‘ଥର’ ଗାଡ଼ି ଡ୍ରାଇଭିଂ କରୁଥିବା ବେଳେ ପାଖରେ ବର ବସିଥିବା ନଜର ଆସିଛନ୍ତି। ମଣ୍ଡପ ନିକଟରୁ ଗାଡ଼ି ଚଲାଇ କନ୍ୟା ଶାଶୁଘରେ ପହଞ୍ଚିଛନ୍ତି। ସେଠାରେ ପହଞ୍ଚିବା ପରେ ଲୋକେ ତାଙ୍କୁ ଜୋରଦାର ସ୍ବାଗତ ଜଣାଇଛନ୍ତି।
A bride driving herself with the groom to her in-laws. #KhudkafeelKashmir pic.twitter.com/lwRRy4QRw5
— Ahmed Ali Fayyaz (@ahmedalifayyaz) August 24, 2021
ଏହି କନ୍ୟାଙ୍କ ନାମ ସନା ବାଣୀ ଏବଂ ବରଙ୍କ ନାମ ଶେଖ୍ ଅମୀର। ଭିଡିଓ ଭାଇରାଲ ହେବା ପରେ ଅମୀର କହିଛନ୍ତି, ସନା ଗାଡ଼ି ଚଲାଇବା ପାଇଁ ମୋତେ ପଚାରିଥିଲେ ମୁଁ ତୁରନ୍ତ ତାଙ୍କୁ ଗାଡ଼ି ଚଲାଇବାକୁ କହିଥିଲି। ମୁଁ ଜାଣି ନ ଥିଲି ଏହି ଭିଡିଓ ଏତେ ମାତ୍ରାରେ ଭାଇରାଲ ହେବ।
ସନା କହିଛନ୍ତି, ମୋ’ ପିତା ମୋତେ ଗାଡ଼ି ଚଳାଇବା ଶିଖାଇଥିଲେ। କିନ୍ତୁ ଭାବି ନ ଥିଲି ମୋ’ ବିବାହ ଦିନ ଗାଡ଼ି ଚଲାଇବି ବୋଲି। ତାହା ପୁଣି ଶାଢ଼ି ପିନ୍ଧି। କିଛି ଲୋକ ଏନେଇ ସମାଲୋଚନା କରୁଛନ୍ତି। କିନ୍ତୁ ମୋତେ କୌଣସି ଫରକ ପଡୁନି।
