ଶ୍ରୀନଗର,୨୯।୭: କଶ୍ମୀର ପାଇଲଟ୍ ହିଲାଲ୍ ଅହମଦ ରାଥର ଫ୍ରାନ୍ସରୁ ଭାରତ ଆସୁଥିବା ଯୁଦ୍ଧବିମାନ ରାଫାଲକୁ ପ୍ରଥମେ ଚଳାଇବେ ବୋଲି ଜଣାପଡ଼ିଛି। ଭାରତୀୟ ବାୟୁସେନାର ଏହି ଅଧିକାରୀ ଏବେ ଫ୍ରାନ୍ସରେ ପ୍ରଶିକ୍ଷଣ ନେଉଛନ୍ତି। ଦକ୍ଷିଣ କଶ୍ମୀରର ଅନନ୍ତନାଗ ଜିଲାର ଏକ ମଧ୍ୟବିତ୍ତ ପରିବାରରେ ତାଙ୍କର ଜନ୍ମ। ତାଙ୍କ ବାପା ସ୍ବର୍ଗତ ମହମ୍ମଦ ଅବଦୁଲ୍ଲା ଜମ୍ମୁ-କଶ୍ମୀର ପୋଲିସର ଜଣେ ଡିଏସ୍ପି ଥିଲେ। ହିଲାଲ୍ ଜମ୍ମୁର ନାଗ୍ରୋତାସ୍ଥିତ ସୈନିକ ସ୍କୁଲରେ ପାଠପଢ଼ି ୧୯୮୮ ଡିସେମ୍ବର ୧୭ରେ ଭାରତୀୟ ବାୟୁସେନାର ପାଇଲଟ୍ ଭାବେ ଯୋଗ ଦେଇଥିଲେ। ୧୯୯୩ରେ ସେ ଫ୍ଲାଇଟ୍ ଲ୍ୟୁଟ୍ନାଣ୍ଟ ହେବାର ସୌଭାଗ୍ୟ ଅର୍ଜନ କରିଥିଲେ। ୨୦୦୪ରେ ସେ ଓ୍ବିଙ୍ଗ୍ କମାଣ୍ଡର, ୨୦୧୬ରେ ଗ୍ରୁପ୍ କ୍ୟାପ୍ଟେନ୍ ଓ ୨୦୧୯ରେ ଏୟାର୍ କୋମ୍ମୋଡୋର ହୋଇଥିଲେ। ଆମେରିକାର ଏୟାର୍ ଓ୍ବାର୍ କଲେଜରେ ସେ ଡିଷ୍ଟିଙ୍କଶନ ସହ ସ୍ନାତକ ଡିଗ୍ରୀ ହାସଲ କରିଥିଲେ। ଏନ୍ଡିଏରେ ତାଙ୍କୁ ସୋଡ୍ ଅଫ୍ ଅନ ସମ୍ମାନରେ ସମ୍ମାନିତ କରାଯାଇଥିଲା। ସେ ବାୟୁସେନା ମେଡାଲ ଓ ବିଶିଷ୍ଟ ସେବା ମେଡାଲ ହାସଲ କରିଛନ୍ତି। ମିରେଜ୍-୨୦୦୦, ମିଗ୍-୨୯, କିରନ୍ ବିମାନ ଚଳାଇବାରେ ସେ ସିଦ୍ଧହସ୍ତ। ଏବେ ତାଙ୍କୁ ପ୍ରଥମ ଥର ଲାଗି ରାଫାଲ ଯୁଦ୍ଧବିମାନ ଉଡ଼ାଇବାର ସୁଯୋଗ ମିଳିଛି।
