ପ୍ୟାରିସ୍,୨୯ା୫: ଗ୍ରାଣ୍ଡସ୍ଲାମ ଇଭେଣ୍ଟ ଫ୍ରେଞ୍ଚ ଓପନ ଟେନିସ ଟୁର୍ନାମେଣ୍ଟର ତୃତୀୟ ଦିନ ପୁରୁଷ ସିଙ୍ଗଲ୍ସ ଇଭେଣ୍ଟରେ ସହଜ ବିଜୟ ହାସଲ କରିଛନ୍ତି କାସ୍ପର ରୁଡ୍ ଓ ଡାନିଲ ମେଡଭେଡେଭ୍। ଦିନର ଅର୍ଦ୍ଧାଧିକ ମ୍ୟାଚ୍ ବର୍ଷା କାରଣରୁ ସସ୍ପେଣ୍ଡ ହୋଇଥିବା ବେଳେ ଦୁଇ ସିଡେଡ୍ ଖେଳାଳି ସହଜ ବିଜୟ ହାସଲ କରିଛନ୍ତି। ବିଶ୍ୱ ମାନ୍ୟତାର ସପ୍ତମ ସ୍ଥାନରେ ଥିବା ନରଓ୍ବେର କାସ୍ପର ରୁଡ୍ ୬-୩, ୬-୪ ଓ ୬-୩ ସେଟ୍ରେ ବ୍ରାଜିଲ୍ର ଫେଲିପ୍ ଆଲ୍ଭ୍ସଙ୍କୁ ପରାସ୍ତ କରିଛନ୍ତି। ପ୍ରଥମ ସର୍ଭରେ ୮୦ ପ୍ରତିଶତ ଓ ଦ୍ୱିତୀୟ ସର୍ଭରେ ୮୮ ପ୍ରତିଶତ ପଏଣ୍ଟ ହାସଲ କରିଥିଲେ ରୁଡ୍। ଅନ୍ୟ ଏକ ମ୍ୟାଚ୍ରେ ବିଶ୍ୱ ମାନ୍ୟତାର ୫ ନମ୍ବର ସ୍ଥାନରେ ଥିବା ରୁଷିଆର ଡାନିଲ ମେଡଭେଡେଭ ୬-୩, ୬-୪, ୫-୭ ଓ ୬-୩ ସେଟ୍ରେ ଜର୍ମାନୀର ଡୋମିନିକ୍ କୋପଫରଙ୍କୁ ପରାସ୍ତ କରିଛନ୍ତି। ଅନ୍ୟ ଏକ ମ୍ୟାଚ୍ରେ ୨୮ ନମ୍ବର ଖେଳାଳି ଥୋମାସ୍ ମାର୍ଟିନ୍ ଏଚେଭେରୀ ୩-୬, ୬-୨, ୬-୧, ୬-୪ ସେଟ୍ରେ ଫ୍ରାନ୍ସର ଆର୍ଥର କାଜାକ୍ସଙ୍କୁ ପରାସ୍ତ କରିଛନ୍ତି। ପ୍ରଥମ ସେଟ୍ରେ ପରାସ୍ତ ହୋଇଥିଲେ ମଧ୍ୟ ପରବର୍ତ୍ତୀ ୩ ସେଟରେ ବିଜୟୀ ହୋଇ ଦ୍ୱିତୀୟ ରାଉଣ୍ଡରେ ପ୍ରବେଶ କରିଥିଲେ ଥୋମାସ୍ ମାର୍ଟିନ୍ ଏଚେଭେରୀ। ଇଟାଲୀର ଫାବିଓ ଫଗନିନି ଏକ ମ୍ୟାଚରେ ଫ୍ରାନ୍ସର ଅଣ ସିଡେଡ ଖେଳାଳି ବୋଟିକ୍ ଭାନ୍ ଡେ ଜାଣ୍ଡସ୍କଲ୍ପଙ୍କୁ ୬-୧, ୬-୧, ୭-୫ରେ ପରାସ୍ତ କରିଥିଲେ।
ମହିଳା ବିଭାଗରେ ମଧ୍ୟ ଏକାଧିକ ମ୍ୟାଚ୍ ସସ୍ପେଣ୍ଡ ହୋଇଥିଲା। ତେବେ ଆରିନା ସାବାଲେଙ୍କା, ଏଲେନା ରିବାକିନା, କ୍ୱିନଓ୍ବେନ ଝେଙ୍ଗ ଓ ବର୍ନାର୍ଡା ପେରାଙ୍କ ପରି ଖେଳାଳି ଦ୍ୱିତୀୟ ରାଉଣ୍ଡରେ ପହଞ୍ଚିଛନ୍ତି। ବିଶ୍ୱ ମାନ୍ୟତାର ଦୁଇ ନମ୍ବର ସ୍ଥାନରେ ରହିଥିବା ବେଲାରୁଷର ସାବାଲେଙ୍କା ୬-୧, ୬-୨ ସେଟରେ ଏରିକା ଆଣ୍ଡ୍ରିଭାଙ୍କୁ ପରାସ୍ତ କରିଥିଲେ। ୪ନମ୍ବର ସ୍ଥାନରେ ଥିବା ଏଲେନା ରିବାକିନା ମଧ୍ୟ ଏକ ସହଜ ବିଜୟ ସହ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। କାଜାଖସ୍ତାନର ରିବାକିନା ୬-୨, ୬-୩ ସେଟରେ ବେଲଜିୟମର ଗ୍ରିଟ ମିନ୍ନେନ୍ଙ୍କୁ ପରାସ୍ତ କରିଛନ୍ତି। ବିଶ୍ୱ ମାନ୍ୟତାର ୭ ନମ୍ବର ସ୍ଥାନରେ ଥିବା ଚାଇନାର କ୍ୱିନଓ୍ବେନ୍ ଝେଙ୍ଗ ସ୍ଥାନୀୟ ଖେଳାଳି ଆଲିଜ୍ କର୍ନେଟଙ୍କୁ ୬-୨, ୬-୧ରେ ପରାସ୍ତ କରିଥିଲେ। ମହିଳା ସିଙ୍ଗଲ୍ସରେ ମଧ୍ୟ ଏକ ବିପର୍ଯ୍ୟୟ ଦେଖିବାକୁ ମିଳିଥିଲା। ବିଶ୍ୱ ମାନ୍ୟତାର ୧୩ ତମ ସ୍ଥାନରେ ଥିବା ବ୍ରାଜିଲର ବିଟ୍ରିଜ୍ ହଦଦ ମାଇଆ ଇଟାଲୀର ଏଲିସାବେଟା କୋସିଆରେଟୋଙ୍କ ନିକଟରୁ ୩-୬, ୬-୪ ଓ ୬-୧ ସେଟରେ ପରାଜିତ ହୋଇଥିଲେ। ଗତ ବର୍ଷର ସେମି ଫାଇନାଲିଷ୍ଟ ରହିଥିବା ବିଟ୍ରିଜ ପ୍ରଥମ ସେଟ୍ ଜିତିଥିଲେ ମଧ୍ୟ ପରବର୍ତ୍ତୀ ଦୁଇ ରାଉଣ୍ଡରେ ହାରି ଯାଇଥିଲେ।